ວິຊາການຈາກ ກະຊວງວິທະຍາສາດ ແລະ ເຕັກໂນໂລຊີ, ກະຊວງສຶກສາທິການ ແລະ ກິລາ ແລະ ມະຫາວິທະຍາໄລແຫ່ງຊາດ ໄດ້ຮ່ວມກັນປຶກສາຫາລືໂຄງການຄົ້ນຄວ້າ ແລະ ພັດທະນາ ຫລັກສູດການຮຽນ-ການສອນດ້ານເຕັກໂນໂລຊີ ແລະ ນະວັດຕະກຳ “ການສ້າງຫ້ອງຮຽນວິທະຍາສາດ ເຕັກໂນໂລຊີວິສະວະກຳ ແລະ ຄະນິດສາດໃນໂຮງຮຽນ” ເຊິ່ງໂຄງການດັ່ງກ່າວ ແມ່ນໄດ້ຮັບການສະໜັບສະໜູນດ້ານງົບປະມານ ຈາກກອງທຶນຄົ້ນຄວ້າວິທະຍາສາດ.
ທ່ານ ສຸມານະ ຈູນລະມະນີ ຫົວໜ້າກົມເຕັກໂນໂລຊີ ແລະ ນະວັດຕະກຳ ກະຊວງວິທະຍາສາດ ແລະ ເຕັກໂນໂລຊີ ທັງເປັນປະທານກອງປະຊຸມປຶກສາຫາລືຄັ້ງນີ້ ກ່າວວ່າ: ໃນຍຸກໂລກາພິວັດ, ຄວາມຮູ້ ແລະ ນະວັດຕະກຳ ເສດຖະກິດ ໄດ້ກາຍເປັນປັດໄຈພື້ນຖານສຳຄັນ ຂອງການສ້າງຊັບພະຍາກອນມະນຸດ, ຫລາຍປະເທດໄດ້ຖືເອົານະວັດຕະກຳເປັນວາລະແຫ່ງຊາດ ເພື່ອປ່ຽນແປງການພັດທະນາເສດຖະກິດ ຈາກລະດັບຕໍ່າໄປສູ່ລະດັບສູງ. ແຕ່ແນວໃດກໍຕາມ, ນະວັດຕະກຳຍັງແມ່ນບັນຫາໃໝ່ສຳລັບ ສປປ ລາວ ແຕ່ລັດຖະບານກໍໄດ້ມີນະໂຍບາຍດ້ານດັ່ງກ່າວ ເພື່ອພັດທະນາເສດຖະກິດໃຫ້ມີຄວາມກ້າວໜ້າ ແລະ ພັດທະນາພື້ນຖານໂຄງລ່າງໃຫ້ເຂັ້ມແຂງ ໃນການຫັນເປັນອຸດສາຫະກຳທັນສະໄໝ ແລະ ແກ້ໄຂຄວາມທຸກຍາກ ເພື່ອສ້າງພື້ນຖານເສດຖະກິດແຫ່ງພູມປັນຍາ, ສີຂຽວ ແລະ ເປັນມິດກັບສິ່ງແວດລ້ອມ.
ທ່ານຫົວໜ້າກົມເຕັກໂນໂລຊີ ແລະ ນະວັດຕະກຳ ກ່າວວ່າ: ການສ້າງຫ້ອງຮຽນວິທະຍາສາດ, ເຕັກໂນໂລຊີວິສະວະກຳ ແລະ ຄະນິດສາດການສຶກສາ ແມ່ນການນຳຄວາມຮູ້ທາງດ້ານວິທະຍາສາດ ຂອງວຽກງານດັ່ງກ່າວມາປະສົມປະສານ ເພື່ອໃຫ້ເກີດນະວັດຕະກຳໃໝ່, ເກີດມີທຸລະກິດໃໝ່, ອາຊີບໃໝ່ ແລະ ສ້າງສັງຄົມໃໝ່ທີ່ສີວິໄລ. ນອກຈາກນີ້ ການສຶກສາວິທະຍາສາດ ຍັງສາມາດສະແດງໃຫ້ເຫັນເຖິງການເຊື່ອມໂຍງ ຂອງຊີວິດການເປັນຢູ່ປະຈຳວັນ. ຕົວຢ່າງ: ນັກຮຽນເມື່ອຮຽນຈົບລະດັບມັດທະຍົມແລ້ວ ແມ່ນມີ 3 ເປົ້າໝາຍຫລັກຄື: (1) ອາຊີບ, (2) ການຮຽນຕໍ່ໃນລະດັບສູງກວ່າ ແລະ (3) ການເປັນພົນລະເມືອງທີ່ມີຄວາມສາມາດ. ສະນັ້ນ ສິ່ງສຳຄັນແມ່ນບັນດາຕຳລາ, ຫລັກສູດການຮຽນ-ການສອນຕ່າງໆ ຕ້ອງຮັບປະກັນໃຫ້ແກ່ການຮຽນຮູ້ທີ່ຈຳເປັນ ດ້ານວິທະຍາສາດເຕັກໂນໂລຊີ ເຊິ່ງຈະເປັນເງື່ອນໄຂທີ່ດີ ຂອງການພັດທະນາປະເທດ ແລະ ສາມາດຜະລິດເປັນສິນຄ້ານະວັດຕະກຳ ທີ່ສ້າງມູນຄ່າເພີ່ມ ທັງສາມາດຍາດແຍ່ງການແຂ່ງຂັນ ໃນຕະຫລາດພາກພື້ນ ແລະ ສາກົນໄດ້. ອັນສຳ ຄັນຈະເຮັດໃຫ້ປະຊາກອນລາວ ກາຍເປັນຜູ້ມີຄວາມຮູ້ຄວາມສາມາດ ປະກອບສ່ວນເຂົ້າໃນການພັດທະນາທ້ອງຖິ່ນ, ສາມາດເຊື່ອມໂຍງໃນການເຄື່ອນຍ້າຍອາຊີບ ຢູ່ບັນດາປະເທດສະມາຊິກອາຊຽນຢ່າງມີຄຸນນະພາບອີກດ້ວຍ.
ທ່ານ ສຸລິເດດ ສຸວັນນະລາດ ຫົວໜ້າໂຄງການຄົ້ນຄວ້າ ແລະ ພັດທະນາ ຫລັກສູດການຮຽນ-ການສອນເຕັກໂນໂລຊີ ແລະ ນະວັດຕະກຳ ກ່າວວ່າ: ໂຄງການນີ້ມີເປົ້າໝາຍ ເພື່ອສ້າງຊັບພະຍາກອນທີ່ມີຄຸນນະພາບ ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມແຫ່ງຊາດ ໃນອະນາຄົດຂ້າງໜ້າ ເຊິ່ງຜົນການຄົ້ນຄວ້າການສ້າງກຳລັງຄົນ ໃຫ້ມີທັກສະນະໃນສະຕະວັດທີ 21 ດ້ວຍການປະສົມປະສານ ລະຫວ່າງວິທະຍາສາດເຕັກໂນໂລຊີ ວິສະວະກຳສາດ ແລະ ຄະນິດສາດ ແມ່ນຈະກໍ່ໃຫ້ເກີດມີແນວຄວາມຄິດສ້າງສັນໃໝ່ ທີ່ກ້າວໄປສູ່ການມີຜະລິດຕະພັນໃໝ່, ບໍລິການໃໝ່, ອາຊີບໃໝ່, ຜູ້ປະກອບການໃໝ່, ທຸລະກິດໃໝ່ ແລະ ສັງຄົມໃໝ່.
ກອງປະຊຸມປຶກສາຫາລືດັ່ງກ່າວຈັດຂຶ້ນໃນວັນທີ 15 ພະຈິກນີ້ ທີ່ສະຖາບັນຄົ້ນຄວ້າວິທະຍາ ສາດການສຶກສາ ກະຊວງສຶກສາທິການ ແລະ ກິລາ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!