ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ໄດ້ເປີດເຜີຍເມື່ອບໍ່ດົນມານີ້ວ່າ: ພາຍຫລັງກະຊວງການເງິນໄດ້ຄົ້ນຄວ້າວິໄຈ ສະພາບເສດຖະກິດຂອງປະເທດຢ່າງລະອຽດ ແລ້ວເຫັນວ່າໃນໄລຍະ 4 ປີຕໍ່ໜ້ານີ້ ຈະຕ້ອງໄດ້ປັບຫລຸດຄາດໝາຍ ທີ່ສະພາແຫ່ງຊາດໄດ້ຮັບຮອງໃນຂອບ 5 ປີເບື້ອງຕົ້ນ ແລະ ອັດຕາການຂາດ ດູນງົບປະມານກໍປັບສູງຂຶ້ນເລັກໜ້ອຍ ຕາມສະພາບການຕົວຈິງຄື: ໃນປີ 2017 ນີ້ ການຂາດດູນຍັງຈະຢູ່ໃນລະດັບສູງສົມຄວນປະມານ 6,52% ຂອງ GDP, ເຊິ່ງສາເຫດພື້ນຖານແມ່ນມາຈາກແຜນລາຍຈ່າຍທີ່ໄດ້ມີການຮັບຮອງຈາກລັດຖະບານແລ້ວ ເປັນຕົ້ນການເພີ່ມດັດຊະນີເງິນເດືອນ, ເງິນອຸດໜູນເບ້ຍລ້ຽງນັກຮຽນ-ນັກສຶກສາ, ເງິນອຸດໜູນນາຍ ບ້ານ ແລະ ອື່ນໆ, ເຊິ່ງເປັນລາຍຈ່າຍທີ່ມີຄວາມຈຳເປັນຕ້ອງໄດ້ປະຕິບັດ.
ພ້ອມດຽວກັນ ການຈັດເກັບລາຍຮັບງົບປະມານກໍຄາດວ່າຍັງຈະມີສິ່ງທ້າທາຍຫລາຍດ້ານຢູ່ ແລະ ຄາດວ່າໃນໄລຍະແຕ່ປີ 2019-2020 ສະພາບເສດຖະກິດຈຶ່ງຄ່ອຍໆປັບໂຕເຂົ້າສູ່ສະພາບປົກກະຕິ ແລະ ດ້ວຍການເພີ່ມທະວີການຈັດເກັບລາຍຮັບດ້ວຍຫລາຍມາດຕະການ, ການສ້າງຖານລາຍຮັບໃໝ່ດ້ວຍການອອກນິຕິກຳ ແລະ ກົດໝາຍເຊັ່ນ: ກົດໝາຍອາກອນສິ່ງແວດລ້ອມ, ກົດໝາຍອາກອນທີ່ດິນ, ກົດໝາຍວ່າດ້ວຍອາກອນຊັບສິນ ແລະ ອື່ນໆ, ສົມທົບກັບການ ເພີ່ມປະສິດທິພາບ ໃນການຈັດເກັບລາຍຮັບ ດ້ວຍການນຳໃຊ້ເຄື່ອງມືທີ່ທັນສະໄໝເຂົ້າຊ່ວຍ, ການປັບປຸງກົນໄກການຄຸ້ມຄອງ ແລະ ການຈັດເກັບຈະຊ່ວຍເຮັດໃຫ້ການເກັບລາຍຮັບງົບປະມານເພີ່ມຂຶ້ນໃນຈັງຫວະທີ່ຕໍ່ເນື່ອງ ແລະ ຄາດຄະເນໃຫ້ລາຍຮັບພາຍໃນສາມາດກຸ້ມລາຍຈ່າຍປົກກະຕິໄດ້ໂດຍພື້ນຖານໃນປີ 2020 ເນື່ອງຈາກວ່າໃນຂອບແຜນງົບປະມານ 4 ປີ, ການຂາດດູນຈະຄ່ອຍໆປັບໂຕດີຂຶ້ນໃຫ້ຫລຸດລົງມາຢູ່ໃນລະດັບປະມານ 2,51% ຂອງ GDP ໃນປີ 2020 ເຊິ່ງສະເລ່ຍແລ້ວໃນ 4 ປີຈະມີອັດຕາການຂາດດູນໃນລະດັບ 4,39% ຂອງ GDP ເຊິ່ງເຫັນວ່າຢູ່ໃນຂອບທີ່ສະພາແຫ່ງຊາດຮັບຮອງ.
ໃນປີ 2017 ກະຊວງການເງິນໄດ້ສະເໜີລັດຖະບານພິຈາລະນາແຫລ່ງທຶນເພື່ອມາດຸ່ນດ່ຽງ ໂດຍຈະໄດ້ຈາກເງິນກູ້ເປັນໂຄງການທີ່ກູ້ຢືມແລ້ວ, ສ່ວນທີ່ເຫລືອແມ່ນຈະໄດ້ອອກເປັນພັນທະບັດຄັງເງິນເປັນຕົ້ນຕໍ. ຖ້າບໍ່ພໍແມ່ນຈະໄດ້ອອກພັນທະບັດຕ່າງປະເທດອີກຈຳນວນໜຶ່ງ, ແຕ່ການກູ້ຢືມດັ່ງ ກ່າວແມ່ນຈະບໍ່ເພີ່ມສັດສ່ວນໜີ້ສິນຕໍ່ GDP.
ຕໍ່ກັບບັນຫາໜີ້ສິນ ໃນຂອບແຜນ 4 ປີໄດ້ຄົ້ນຄວ້າກຳນົດໂຄງສ້າງແຜນງົບປະມານໃຫ້ຄ່ອຍໆມີຄວາມສົມດູນ ແລະ ມີສະຖຽນລະພາບຂຶ້ນເທື່ອລະກ້າວ ໂດຍເຮັດໃຫ້ອັດຕາການຂາດດູນງົບປະມານຫລຸດລົງເປັນລຳດັບ ດ້ວຍການເພີ່ມປະສິດທິຜົນໃນການຈັດເກັບລາຍຮັບ ບວກກັບທ່າແຮງຈາກບັນດາໂຄງການກໍ່ສ້າງພະລັງງານໄຟຟ້ານ້ຳຕົກຫລາຍແຫ່ງຈະຊ່ວຍຊຸກຍູ້ໃຫ້ລາຍຮັບເພີ່ມຂຶ້ນ, ໄປພ້ອມໆກັບການຈຳກັດລາຍຈ່າຍງົບປະມານທີ່ບໍ່ຈຳເປັນ ແລະ ການປະຕິບັດນະໂຍບາຍປະຢັດຢ່າງເຂັ້ມງວດ, ທັງໝົດນັ້ນຈະເຮັດໃຫ້ໜີ້ສິນພາກລັດຄ່ອຍໆຫລຸດລົງເທື່ອລະກ້າວ ເຊິ່ງຕາມການຄາດຄະເນຂອງວິຊາການແມ່ນລະດັບໜີ້ສິນຈະຫລຸດລົງ 2-3% ຂອງ GDP ແລະ ເພື່ອຄຸ້ມຄອງໜີ້ສິນສາທາລະນະໃນປັດຈຸບັນ ກະຊວງການເງິນໄດ້ຄົ້ນຄວ້າຮ່າງລັດຖະບັນຍັດຂອງປະທານປະເທດວ່າດ້ວຍການຄຸ້ມຄອງໜີ້ສິນພາກລັດ ເມື່ອນິຕິກຳດັ່ງກ່າວຖືກຮັບຮອງກໍຈະກາຍເປັນເຄື່ອງມືໃນການຄຸ້ມຄອງໜີ້ສິນພາກລັດຢ່າງມີປະສິດທິພາບ.
ຂ່າວ: ລາວພັດທະນາ