ໃນວັນທີ 8 ຕຸລາ 2016, ຄະນະກຳມະການແຫ່ງຊາດ ເພື່ອຄົນພິການ ແລະ ຜູ້ສູງອາຍຸ ຮ່ວມກັບກະຊວງແຮງງານ ແລະ ສະຫວັດດີການສັງຄົມ, ກະຊວງສາທາລະນະສຸກ ແລະ ອົງການປົກຄອງ ນະຄອນຫລວງວຽງຈັນ ໄດ້ຈັດຕັ້ງພິທີຊຸມນຸມຍ່າງເພື່ອສຸຂະພາບ ເພື່ອສະເຫລີມສະຫລອງ ວັນຄົນພິການແຫ່ງຊາດ ແລະ ວັນຜູ້ສູງອາຍຸສາກົນ ທີ່ສວນປະຕູໄຊ ທີ່ໄດ້ກຳນົດໄວ້ໃນດຳລັດ ຂອງນາຍົກລັດຖະມົນຕີ ສະບັບເລກທີ 137/ນຍ ເຊິ່ງກຳນົດເອົາ ວັນທີ 27 ກັນຍາ ຂອງທຸກໆປີ ເປັນວັນຄົນພິການແຫ່ງຊາດ ແລະ ວັນທີ 1 ຕຸລາ ເປັນວັນຜູ້ສູງອາຍຸສາກົນ, ໃຫ້ກຽດເຂົ້າຮ່ວມໂດຍ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຍບັນດາເອກອັກຄະລັດຖະທູດ, ອົງການຈັດຕັ້ງສາກົນ, ຜູ້ພິການ, ຜູ້ສູງອາຍຸ ແລະ ປະຊາຊົນເຂົ້າຮ່ວມຢ່າງຫລວງຫລາຍ.
ໃນໂອກາດດັ່ງກ່າວ ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ໃຫ້ຮູ້ວ່າ: ສອງວັນດັ່ງກ່າວ ເປັນວັນທີ່ມີຄວາມໝາຍຄວາມສຳຄັນ ສຳລັບຄົນພິການ ແລະ ຜູ້ສູງອາຍຸ ຂອງ ສປປ ລາວ. ໃນໂລກຂອງເຮົາໃນປັດຈຸບັນ ຍັງມີຄົນພິການຫລາຍກວ່າ 1 ຕື້ຄົນ ຫລື ປະມານ 15% ຂອງປະຊາກອນໂລກ ທີ່ດຳລົງຊີວິດຢູ່ກັບຄວາມເປັນພິການ, ພວກເຂົາເຈົ້າຍັງປະເຊີນກັບສິ່ງກີດຂວາງຕ່າງໆ ຍ້ອນໂຄງສ້າງຂອງສັງຄົມ, ເສດຖະກິດ, ທັດສະນະຄະຕິ, ຂາດການມີສ່ວນຮ່ວມ ແລະ ຄວາມສະເໝີພາບຢູ່ໃນຄອບຄົວ ແລະ ສັງຄົມ ເຫັນໄດ້ຈາກບັນຫາການເຂົ້າເຖິງການສຶກສາ, ການປິ່ນປົວ ແລະ ຟື້ນຟູສຸຂະພາບ, ການຝຶກວິຊາຊີບ, ມີວຽກເຮັດງານທຳ, ການສະໜັບສະໜູນດ້ານນິຕິກຳ ແລະ ເຊືອມໂຍງຄົນພິການ ເຂົ້າໃນຂະບວນການພັດທະນາ ຍັງບໍ່ທັນສູງ. ໂດຍເຫັນໄດ້ຄວາມສຳຄັນຕໍ່ວຽກງານຜູ້ພິການ ແລະ ຜູ້ສູງອາຍຸ ລັດຖະບານ ສປປ ລາວ ຈຶ່ງໄດ້ໃຫ້ສັດຕະຍາບັນ ເຂົ້າເປັນພາຄີສົນທິສັນຍາວ່າດ້ວຍ ສິດທິຂອງຄົນພິການໃນປີ 2009 ແລະ ໄດ້ເຂົ້າຮ່ວມຢ່າງຕັ້ງໜ້າ ຕາມຄວາມສາມາດຂອງຕົນ ຈັດຕັ້ງປະຕິບັດແຜນທົດສະຫວັດ ແຫ່ງ ການພັດທະນາຄົນພິການ ຂອງພາກພື້ນອາຊີ-ປາຊີຟິກ, ແຜນຍຸດທະສາດອິນຊອນ ວ່າດ້ວຍການເຮັດໃຫ້ສິດທິຂອງຄົນພິການກາຍເປັນຈິງ (ໄລຍະແຕ່ປີ 2013-2022) ແລະ ແຜນຍຸດທະສາດ ສະຫວັດດີການ ແລະ ການພັດທະນາອາຊຽນ (ໄລຍະແຕ່ປີ 2011-2015) ແລະ ຖະແຫລງການການເມືອງ ແລະ ແຜນດຳເນີນງານສາກົນ ກ່ຽວກັບຜູ້ສູງອາຍຸ ໃນປີ 2002 ແລະ ລັດຖະບານ ໄດ້ມີຄວາມພະຍາຍາມຊ່ວຍເຫລືອ ແລະ ພັດທະນາຄົນພິການ ຕາມຄວາມສາມາດທາງດ້ານເສດຖະກິດ-ສັງຄົມ ແລະ ການຮ່ວມມືສາກົນ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!