“ຮັກນີ້ນິລັນດອນ” ນະວະນິຍາຍ ຊະນະໃຈກໍາມະການໄດ້ລາງວັນວັນນະກໍາສ້າງສັນ (ລາງວັນສິນໄຊ) 2016 ເປັນໜຶ່ງໃນ 200 ກວ່າຜົນງານທີ່ສົ່ງເຂົ້າປະກວດຈາກທົ່ວປະເທດ.
ປີ 2016 ນີ້ມີບັນດານັກປະພັນນັກກະວີທີ່ສົ່ງບົດເລື່ອງສັ້ນ, ຍາວ ແລະກາບກອນວະວີເຂົ້າແຂ່ງຂັນທັງໝົດ 205 ບົດ, ໃນນັ້ນ ມີເລື່ອງສັ້ນ 84 ບົົດ, ກະວີ 112 ບົດ ແລະນະວະນິຍາຍ 9 ບົດ ພິທີປະກາດຜົນລາງວັນໄດ້ ມີຂຶ້ນເມື່ອວັນທີ 4 ພະຈິກຜ່ານມາທີ່ຫໍວັດທະນະທຳແຫ່ງຊາດ ນະຄອນຫຼວງວຽງຈັນ ໂດຍການເປັນເຈົ້າພາບຮ່ວມກັນ ຂອງຄະນະວາລະສານວັນນະສິນຮ່ວມ ກັບສາມາຄົມນັກປະພັນລາວ ຊຶ່ງໄດ້ຮັບການໃຫ້ກຽດເຂົ້າຮ່ວມຂອງ ທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫຼງຂ່າວວັດທະນະທຳ ແລະທ່ອງ ທ່ຽວ, ທ່ານ ທອງໃບ ໂພທິສານ ນັກກະວີ ລາງວັນຊີໄຣ ສີລະປິນດີເດັ່ນສາຂາວັນນະກຳ ແລະທັງເປັນຮອງຫົວໜ້າຫ້ອງ ການກະຊວງຖະແຫຼງຂ່າວວັດທະນະ ທຳ ແລະທ່ອງທ່ຽວປະທານສາມາຄົມ ນັກປະພັນລາວ ແລະພ້ອມດ້ວຍພາກສ່ວນທີ່ກ່ຽວຂ້ອງ.

ຂໍ້ມູນໃຫ້ຮູ້ວ່າ: ການຕັດສິນລາງວັນເລື່ອງສັ້ນ, ບົດກະວີ ແລະນະວະນິຍາຍ ແມ່ນໄດ້ຕັດສິນເປັນສອງຮອບ ໂດຍໄດ້ຄັດເລືອກແຕ່ລະປະເພດຄືຈາກເລື່ອງສັ້ນທັງໝົດທີ່ສົ່ງມາ 84 ບົດ ເຂົ້າຮອບ 38 ບົດ, ບົດກະວີຈາກ 112 ບົດ ເຂົ້າຮອບ 59 ບົດ ແລະບົດນະວະນິຍາຍຈາກ 9 ບົດເຂົ້າຮອບ 6 ບົດ, ຜ່ານການລວມຄະແນນຕົວຈິງຜົນການຕັດສິນອອກມາຄື: ປະເພດເລືອງຍາວ (ນະວະນິຍາຍ) ທີ່ໄດ້ຮັບລາງວັນຊະນະເລີດມີ 267 ຄະແນນ, ໄດ້ແກ່: ຮັກນີ້ນິລັນດອນ ໂດຍທິບ ພະເກສອນ ດວງຈັກ, ເລື່ອງສັ້ນຊະນະ ເລີດໄດ້ແກ່: ແພງຢ່າງ ໂດຍແສງຈັນ ສຸກຂະເສມ, ບົດກະວີ ຊະນະເລີດມີຊື່ວ່າ “ຈຳປາລາວປະດັບຊາດ” ໂດຍຊາຍຄໍາ ຈາປາອຸທຸມ, ທັງ 3 ລາງວັນຊະນະເລີດນີ້ ແມ່ນໄດ້ຮັບເງິນສົດ 4 ລ້ານກີບ ພ້ອມໂລ້ລາງວັນ ແລະໃບຢັ້ງຢືນ ເພື່ອເປັນກຽດຕິຄຸນ.

ທ່ານ ສຸບັນ ຫຼວງລາດ ນັກກະວີລາງ ວັນແມ່ນ້ຳຂອງຫົວໜ້າສູນວັດທະນະທຳ ເດັກກະຊວງຖະແຫຼງຂ່າວວັດທະນະທຳ ແລະທ່ອງທ່ຽວກ່າວວ່າ: ຈຸດປະສົງຂອງການຈັດງານໃນຄັ້ງນີ້ກໍເພື່ອສົ່ງເສີມການປະດິດຄິດແຕ່ງຂອງນັກປະພັນນັກກະວີ ໃຫ້ນຳໃຊ້ຄວາມຮູ້ຄວາມສາມາດ ແລະພອນສະຫວັນຂອງຕົົນເຂົ້າໃນການປະກອບສ່ວນສ້າງສັນບົດປະພັນວັນນະຄະດີ ແລະປະກອບສ່ວນໃຫ້ວົົງການວັນນະກຳລາວນັບມື້ອຸດົມສົມບູນ, ທັງເຮັດໜ້າທີ່ເປັນເວທີສົ່ງເສີມການປະພັນວັນນະຄະດີເປັນການປຸກລະດົມການປະດິດຄິດ ແຕ່ງດ້ານວັນນະກຳໃຫ້ເປັນຂະບວນຟົດຟື້ນ ແລະຂະຫຍາຍຕົວຢ່າງກວ້າງຂວາງ ຕໍ່ເນື່ອງຮັບປະກັນການເພີ່ມຂຶ້ນທາງດ້ານຄຸນນະພາບ ແລະມີປະລິມານໃຫ້ນັບມື້ນັບຫຼາຍຂຶ້ນ.

ຂ່າວ: ເສດຖະກິດ-ສັງຄົມ