ຜູ້ຕາງໜ້າອົງການຈັດຕັ້ງມະຫາຊົນຂັ້ນສູນກາງ ສະເໜີໃຫ້ສະພາແຫ່ງຊາດ ເພີ່ມທະວີກວດກາບັນດາໂຄງການລົງທຶນ ຂອງລັດຖະບານ, ຜ່ານມາແມ່ນໄດ້ຮັບຮອງ ຫລາຍໂຄງການ ເຊິ່ງເຮັດໃຫ້ງົບປະມານຂອງລັດ ບໍ່ສາມາດຊໍາລະໄດ້ ພາໃຫ້ເກີດມີໜີ້ສິນຄຸມເຄືອ ເຮັດໃຫ້ເສດຖະກິດຂອງຊາດ ຢູ່ໃນສະພາບບອບບາງ.
ໃນໂອກາດ, ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດທີ VIII ໃນວັນທີ 3 ພະຈິກນີ້. ທ່ານນາງ ຄໍາຈັນ ພົມແສງສະຫວັນ ຮອງປະທານ ສູນກາງແນວລາວສ້າງຊາດ ໄດ້ສະເໜີປະກອບຄໍາເຫັນ ຕໍ່ບົດລາຍງານ ກ່ຽວກັບການເຄື່ອນໄຫວວຽກງານຂອງສະພາແຫ່ງຊາດ ປະຈໍາ 6 ເດືອນທ້າຍປີ 2016 ຂອງສະພາແຫ່ງຊາດ ໃນຫລາຍບັນຫາເປັນຕົ້ນ ການຮັບເໝົາກໍ່ສ້າງໂຄງການຕ່າງໆ ທີ່ສະພາແຫ່ງຊາດໄດ້ຮັບຮອງເອົາ ເຫັນວ່າມີບາງບໍລິສັດ ແລະ ຫລາຍໂຄງການ, ພາຍຫລັງປະມູນໄປແລ້ວພັດເຮັດຊັກຊ້າ ແກ່ຍາວເວລາໄປຫລາຍປີ, ບໍ່ປະຕິບັດຕາມສັນຍາ ແລະ ມີບາງໂຄງການເຮັດສໍາເລັດ ແຕ່ບໍ່ມີປະສິດທິພາບ.
ພ້ອມດຽວກັນນີ້, ທ່ານຮອງປະທານ ສູນກາງແນວລາວສ້າງຊາດ ໄດ້ສະເໜີ ສະພາປະຊາຊົນນະຄອນຫລວງວຽງຈັນ ກໍຄື ອົງການປົກຄອງ ລົງຕິດຕາມກວດກາແກ້ໄຂ ຕໍ່ກັບບຸກຄົນທີ່ມີສິດອໍານາດ ສວຍໃຊ້ໜ້າທີ່ບໍ່ຖືກຕ້ອງຄື ປ້ານຄັນຄູຕ້ານຮ່ອມຫ້ວຍ ໃນເຂດບໍລິເວນ ຫລື ແຄມອ່າງນໍ້າຊວງ ເຊິ່ງເປັນບ່ອນທໍາມາຫາກິນ ຂອງປະຊາຊົນຫລາຍເຂດ, ຫລາຍເມືອງ ບໍ່ສາມາດເຂົ້າໄປຫາຢູ່ຫາກິນບໍ່ໄດ້ ຍ້ອນພວກເພິ່ນອ້າງເຂດດັ່ງກ່າວເປັນກໍາມະສິດ ແລະ ບັນຫາສິ່ງແວດລ້ອມ ຈາກຟາມລ້ຽງໝູເອກະຊົນ ທີ່ສົ່ງພົນກະທົບກິ່ນເໝັນຕໍ່ປະຊາຊົນ 9 ບ້ານ ຢູ່ເມືອງຫາດຊາຍຟອງ ບັນຫານີ້ແກ່ຍາວມາຫລາຍປີແລ້ວ ແຕ່ບໍ່ທັນສາມາດແກ້ໄຂໄດ້.
ນອກນັ້ນ, ທ່ານ ຍັງໄດ້ສະເໜີກ່ຽວກັບການຊົດເຊີຍ ຄ່າເສຍຫາຍຂອງປະຊາຊົນ ແລະ ບັນຫາສິ່ງແວດລ້ອມຕໍ່ໂຄງການ ກໍ່ສ້າງທາງລົດໄຟ ລາວ-ຈີນ ຢູ່ບັນດາແຂວງທີ່ຖືກຜົນກະທົບໃຫ້ລະອຽດ ຈະແກ້ໄຂແນວໃດ ເພື່ອຮັບປະກັນໃຫ້ໂຄງການດັ່ງກ່າວ ສາມາດດໍາເນີນໄປໄດ້ດີ, ພ້ອມສະເໜີຕໍ່ສະພາປະຊາຊົນແຂວງເຊກອງ ຕິດຕາມກວດກາໂຄງການກໍ່ສ້າງພື້ນຖານໂຄງລ່າງ ເປັນຕົ້ນແມ່ນ: ການກໍ່ສ້າງເສັ້ນທາງເລກ 16B ຈາກເຊກອງຜ່ານມາ ເມືອງດາກຈຶງ-ຊາຍແດນຫວຽດນາມ ປັດຈຸບັນ ໂຄງການດັ່ງກ່າວບໍ່ໄປບໍ່ມາ ຂໍໃຫ້ພາກສ່ວນຮັບຜິດຊອບ ແກ້ໄຂໃຫ້ສໍາເລັດ; ການກໍ່ສ້າງເສັ້ນທາງລະຫວ່າງ ເມືອງຊໍາໃຕ້-ເມືອງກ້ວນ ເຊິ່ງໄດ້ເລີ່ມປະຕິບັດມາແຕ່ປີ 2012 ເຖິງປັດຈຸບັນ ບໍ່ມີຄວາມຄືບໜ້າ, ເຮັດໃຫ້ການສັນຈອນໄປມາ ພົບຄວາມຫຍຸ້ງຍາກຫລາຍ, ຈຶ່ງສະເໜີສະມາຊິກສະພາປະຊາຊົນແຂວງຫົວພັນ ສົມທົບພາກສ່ວນກ່ຽວຂ້ອງ ພິຈາລະນາແກ້ໄຂ ແລະ ຕໍ່ກັບສະພາປະຊາຊົນ ແຂວງຊຽງຂວາງ ສະເໜີເພີ່ມທະວີການ ຕິດຕາມ-ກວດກາ ແລະ ຊຸກຍູ້ພາກສ່ວນກ່ຽວຂ້ອງ ແກ້ໄຂພະນັກງານລັດຈໍານວນໜຶ່ງ ສົມຮູ້ຮ່ວມຄິດກັນ ໃນການຈັບຈອງທີ່ດິນແບບຊະຊາຍ ເຊິ່ງບັນຫານີ້ ຈະສ້າງຄວາມຫຍຸ້ງຍາກຕໍ່ການພັດທະນາພື້ນຖານໂຄງລ່າງ ໃນອະນາຄົດ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!