ປີໜ້າລັດຖະບານຕ້ອງ ການທຶນພັນກວ່າຕື້ກີບປະກອບເຂົ້າໃນວຽກງານພັດທະນາຊົນນະບົດ ແລະແກ້ໄຂຄວາມທຸກຍາກຂອງປະຊາຊົນເພື່ອເຮັດໃຫ້ຄອບຄົວທຸກຍາກຫຼຸດລົງຈາກ 6,56% ໃນປີ 2016 ມາເປັນ 6,09% ໃນປີ 2017 ໂດຍໃນ ນັ້ນແມ່ນຈະໃຊ້ສິນເຊື່ອຈາກທະນາຄານ ແລະກອງທຶນຕ່າງໆ ກວມເອົາຕົວເລກຫຼາຍກວ່າໝູ່.
ອີງຕາມການລາຍງານຂອງ ລັດຖະບານຕໍ່ກອງປະຊຸມສະພາໃຫ້ຮູ້: ໃນປີ 2017 ລັດຖະບານ ຈະເອົາໃສ່ສືບຕໍ່ພັດທະນາຊົນນະ ບົດ ແລະແກ້ໄຂຄວາມທຸກຍາກ ຂອງປະຊາຊົນໃຫ້ເຂົ້າສູ່ລວງເລິກກວ່າເກົ່າໂດຍສຸມໃສ່ສືບຕໍ່ປັບປຸງ ແລະກໍ່ສ້າງພື້ນຖານໂຄງລ່າງທີ່ ຈຳເປັນພື້ນຖານປັບປຸງນະໂຍບາຍ ແລະສ້າງເງື່ອນໄຂທີ່ອຳນວຍໃຫ້ ແກ່ປະຊາຊົນຜູ້ທຸກຍາກໄດ້ເຂົ້າ ເຖິງແຫຼງທຶນຕ່າງໆຫຼາຍຂຶ້ນເພື່ອຜະລິດເປັນສິນຄ້າ ແລະສ້າງລາຍຮັບໃຫ້ແກ້ຄອບຄົວ ແລະສືບຕໍ່ປະຕິບັດວຽກງານ 3 ສ້າງໃຫ້ໝາກຜົນສູງຂຶ້ນກວ່າເກົ່າໂດຍສະເພາະສຸມໃສ່ພັດທະນາ ແລະສ້າງ 91 ຈຸດສຸມທີ່ນອນໃນ 70 ເມືອງຂອງ 18 ແຂວງ ໃນນັ້ນປະກອບມີ 20 ຈຸດສຸມຂອງສູນກາງ ແລະ 71 ຈຸດ ສຸມຂອງທ້ອງຖິ່ນສືບຕໍ່ແກ້ໄຂບັນຫາການເຄື່ອນຍ້າຍແບບຊະຊາຍຂອງພົນລະເມືອງທົ່ວປະເທດ.
ສຸມໃສ່ຈັດພູມລຳເນົາ ແລະບ່ອນທຳມາຫາກິນຖາວອນໃຫ້ປະຊາຊົນໃນ 145 ຈຸດສຸມທີ່ນອນໃນ 87 ເມືອງຂອງ 17 ແຂວງໃຫ້ສຳເລັດໂດຍພື້ນຖານສຸມສ້າງບ້ານໃຫຍ່ໃຫ້ກາຍເປັນເມືອງນ້ອຍໃນຊົນນະບົດໃຫ້ໄດ້ 213 ບ້ານໃນ 107 ເມືອງຂອງ 16 ແຂວງຕັ້ງ ໜ້າປັບປຸງລະບົບການເມືອງຢູ່ຂັ້ນຮາກຖານໃຫ້ມີຄວາມເຂັ້ມແຂງຕາມທິດ 3 ສ້າງ ແລະຮັບປະກັນເຮັດໃຫ້ ຮາກຖານມີຄວາມສະຫງົບ-ປອດໄພ ແລະມີຄວາມເປັນລະບຽບຮຽບຮ້ອຍຢ່າງໜັກແໜ້ນ.
ທັງນີ້ຈະສູ້ຊົນເຮັດໃຫ້ຄອບຄົວທຸກຍາກຫຼຸດລົງໄດ້ອີກຢ່າງໜ້ອຍ 5.580 ຄອບຄົວ ຫຼື ປະມານ 0,48% ຄືໃຫ້ຫຼຸດລົງຕ່ຳກວ່າ 70.924 ຄອບຄົວກວມ 6,09% ໃນປີ 2017 ບ້ານທຸກຍາກຫຼຸດລົງອີກ 178 ບ້ານເທົ່າກັບ 2,10% ຈາກ 1.689 ບ້ານໃຫ້ຍັງ ຫຼື ບໍ່ເກີນ 1.511 ບ້ານເທົ່າກັບ 17,85% ຂອງຈຳນວນບ້ານທັງໝົດສ້າງບ້ານພັດທະນາໃຫ້ໄດ້ຕື່ມອີກ 78 ບ້ານເທົ່າ 0,92% ຄືໃຫ້ເພີ່ມຂຶ້ນ ຈາກ 3.836 ບ້ານໃນປະຈຸບັນໃຫ້ເປັນ 3.914 ບ້ານເທົ່າ 46,54% ຂອງຈຳນວນບ້ານທັງໝົດທົ່ວປະເທດສືບຕໍ່ສ້າງບ້ານໃຫຍ່ໃຫ້ກາຍເປັນເມືອງນ້ອຍໃນປີ 2017 ໃຫ້ ໄດ້ປະມານ 36 ແຫ່ງ ຫຼື ສະເລ່ຍໃຫ້ໄດ້ແຂວງລະ 2 ຈຸດ.
ແນວໃດກໍ່ດີ ເພື່ອບັນລຸເປົ້າໝາຍດັ່ງກ່າວລັດຖະບານຕ້ອງ ການແຫຼ່ງທຶນເຂົ້າໃນການຈັດຕັ້ງປະຕິບັດປະມານ 1.375,77 ຕື້ກີບກວມເອົາ 6,29% ຂອງງົບ ປະມານການລົງທຶນລວມຂອງລັັດ 2.800 ຕື້ກີບ ໃນນັ້ນຈາກງົບປະມານພາຍໃນມີ 164,16 ຕື້ກີບ ຊຶ່ງຈະສຸມໃສ່ 20 ຈຸດສຸມຂອງລັດຖະບານ 28,8 ຕື້ກີບ, ທຶນສຸມໃສ 71 ຈຸດສຸມຂອງທ້ອງຖິ່ນ 75 ຕື້ກີບ, ທຶນສຸມໃສ່ 145 ຈຸດສຸມຈັດ ສັນພູມລຳເນົາບ່ອນທຳມາຫາກິນຂອງປະຊາຊົນ 49,36 ຕື້ ກີບ, ທຶນສົມທົບກອງທຶນຫຼຸດຜ່ອນຄວາມທຸກຍາກ (ທລຍ) 11 ຕື້ກີບ; ທຶນຊ່ວຍເຫຼືອ ແລະກູ້ຢືມ 78,41 ຕື້ກີບ ແລະສິນເຊື່ອຈາກທະນາຄານນະໂຍບາຍທະນາຄານກະຊິກຳ ແລະກອງທຶນຕ່າງໆ 1.126 ຕື້ກີບ.
ຂະນະທີ່ໃນປີ 2016 ນີ້ ລັດຖະບານໄດ້ປະກາດລົບລ້າງເມືອງທຸກຍາກໄດ້ແລ້ວ 14 ເມືອງຍັງເຫຼືອ 23 ເມືອງ, ບ້ານທຸກຍາກຍັງເຫຼືອ 1,689 ບ້ານ ເທົ່າກັບ 19,95% ຄອບຄົວທຸກຍາກຫຼຸດລົງ 7.538 ຄອບຄົວຈາກ 83.856 ຄອບຄົວໃນປີ 2015 ມາເປັນ 76.318 ຄອບຄົວເທົ່າກັບ 6,56% ຂອງຄອບຄົວທັງໝົດ (ແຜນສະພາແຫ່ງຊາດຮັບຮອງ 6,11%).
ຂຽນໂດຍ: ບຸນນິກ
ຫນັງສືພິມເສດຖະກິດສັງຄົມ
ຕິດຕາມຂ່າວເສດຖະກິດລາວ ກົດໄລຄ໌ເລີຍ!