ສຳນັກຂ່າວເອເອບພີ ລາຍງານໃນວັນທີ 19 ຕຸລານີ້ວ່າ ທ່ານ ດູກັນ ໂອໄຣລີ ນັກບູຮານຄະດີ ຈາກມະຫາວິທະຍາໄລແຫ່ງຊາດອົດສະຕາລີ (ANU) ໄດ້ປະກາດແຜນ ຈະໃຊ້ໂດຣນເກັບຖ່າຍພາບທົ່ງໄຫຫີນແບບ 3 ມິຕິ ໃນພື້ນທີ່ທຸກໆ 10 ຊັງຕີແມັດ ເພື່ອສ້າງເປັນແຜນທີ່ທີ່ມີຄວາມລະອຽດສູງ ອຳນວຍໃຫ້ແກ່ນັກວິທະຍາສາດ ສາມາດສຳຫລວດພື້ນທີ່ທົ່ງໄຫຫີນ ໂດຍບໍ່ຈຳເປັນຕ້ອງລົງພື້ນທີ່ຕົວຈິງ ຊຶ່ງພົບຄວາມຫຍຸ້ງຍາກຈາກລະເບີດບໍ່ທັນແຕກໃນປາງສົງຄາມ ຊຶ່ງການໃຊ້ເຕັກໂນໂລຊີທັນສະໄໝດັ່ງກ່າວນີ້ ຈະກໍ່ໃຫ້ເກີດປະໂຫຍດຢ່າງຫລວງຫລາຍ ແລະ ຫລຸດຜ່ອນອັນຕະລາຍ ຈາກການລົງສຳຫລວດພື້ນທີ່ດັ່ງກ່າວ.
ນອກຈາກການໃຊ້ໂດຣນ ເພື່ອເກັບຖ່າຍພາບແບບ 3 ມິຕິແລ້ວ ທ່ານ ໂອໄຣລີ່ ຍັງໄດ້ກ່າວອີກວ່າ ນັກບູຮານຄະດີ ກຳລັງພິຈາລະນາ ໃຊ້ງານກ້ອງຖ່າຍພາບສີຫລາຍຄື້ນຄວາມຖີ່ ຊຶ່ງຈະສາມາດເກັບພາບແສງ ຈາກຄວາມຖີ່ທີ່ບໍ່ສາມາດເບິ່ງເຫັນໄດ້ເຊັ່ນ ລັງສີອິນຟຣາເຣດ ແລະ ຈະມີການໃຊ້ເຕັກໂນໂລຊີ ຍິງເລເຊີຈາກອາກາດລົງມາຊຶ່ງເອີ້ນວ່າ ລິດາ ເພື່ອສ້າງແຜນທີ່ທີ່ມີຄວາມລະອຽດສູງ ໃນລະດັບຊັງຕີແມັດ.
ຂໍ້ມູນທີ່ລວບລວມໄດ້ທັງໝົດນີ້ ທີມນັກວິໄຈ ຈະນຳໄປສ້າງແຜນພູມມີທັດທົ່ງໄຫຫີນແບບສະເໝືອນຈິງ ຊຶ່ງຈະອຳນວຍຄວາມສະດວກໃຫ້ແກ່ນັກບູຮານຄະດີ, ນອກຈາກນັ້ນ ຍັງສາມາດສ້າງໃຫ້ກາຍເປັນພິພິທະພັນອອນລາຍ ເປີດໃຫ້ນັກທ່ອງທ່ຽວເຂົ້າຊົມ ຜ່ານລະບົບອິນເຕີເນັດ ຫລື ຕະຫລອດຮອດປັບໃຊ້ກັບສະມາດໂຟນ ໃຫ້ທຸກຄົນສາມາດເຂົ້າຊົມແຜນທີ່ດັ່ງກ່າວ ໃນຮູບແບບ 3 ມິຕິ ອີກດ້ວຍ.
ຕິດຕາມເຮົາທາງFacebook ກົດຖືກໃຈເລີຍ!