ຕາມການລາຍງານຂອງໜ່ວຍເຝົ້າລະວັງພະຍາດລະບາດ, ກະຊວງສາທາລະນະສຸກຕໍ່ນັກຂ່າວພວກເຮົາໃນວັນທີ 14 ຕຸລານີ້ວ່າ: ປັດຈຸບັນສະພາບການລະບາດຂອງພະຍາດໄຂ້ເລືອດອອກ ຫຼື ໄຂ້ຍຸງລາຍ ຢູ່ຫລາຍແຂວງຍັງມີແນວໂນ້ມເພີ່ມຂຶ້ນເລື້ອຍໆ, ຊຶ່ງນັບແຕ່ເດືອນມັງກອນມາຮອດດຽວນີ້ທົ່ວປະເທດມີຍອດຜູ້ຕິດເຊື້ອແລ້ວຫຼາຍກວ່າ 4.200 ຄົນ, ເພີ່ມຂຶ້ນຈາກ 2 ອາທິດຜ່ານມາ 400  ກວ່າຄົນ, ໃນນັ້ນມີຜູ້ເສຍຊີວິດແລ້ວ 10 ຄົນຄື: ແຂວງຈໍາປາສັກມີຜູ້ຕິດເຊື້ອ 1.211 ກໍລະນີ, ແລະ ເສຍຊີວິດ 7 ຄົນ, ບໍລິຄຳໄຊ 543 ກໍລະນີ ແລະ ເສຍຊີວິດ 1 ຄົນ; ຄໍາມ່ວນ 569 ກໍລະນີ; ນະຄອນຫຼວງວຽງຈັນ 639 ກໍລະນີ, ເສຍຊີວິດ 1 ຄົນ;   ສະຫັວນນະເຂດ 481 ກໍລະນີ; ສາລະວັນ 185 ກໍລະນີ, ເສຍຊີວິດ 1 ຄົນ; ອັດຕະປື 135 ກໍລະນີ; ເຊກອງ 114 ກໍລະນີ; ແຂວງວຽງຈັນ 115 ກໍລະນີ; ຫຼວງພະບາງ 114 ກໍລະນີ;  ອຸດົມໄຊ 94 ກໍລະນີ; ຫຼວງນໍ້າທາ 23 ກໍລະນີ; ໄຊຍະບູລີ 13 ກໍລະນີ; ແຂວງບໍ່ແກ້ວ 7 ກໍລະນີ; ແຂວງໄຊສົມບຸນ 6 ກໍລະນີ; ສຳລັບແຂວງອື່ນໆກໍມີຜູ້ຕິດເຊື້ອຈຳນວນໜຶ່ງ ແລະ ຕໍ່ສະພາບດັ່ງກ່າວ, ເຖິງວ່າຜ່ານມາ, ກະຊວງສາທາລະນະສຸກໄດ້ສຸມໃສ່ເລັ່ງສະກັດກັ້ນພະຍາດດັ່ງກ່າວຢ່າງຈິງຈັງ ດ້ວຍການສົມທົບກັບທ້ອງຖິ່ນລົງໃຫ້ຄວາມຮູ້ໃນການປ້ອງກັນຕົນເອງ ແລະ ການທຳລາຍແຫລ່ງເພາະພັນຂອງຍຸງລາຍຢູ່ຕາມບ້ານ ແລະ ເຂດທີ່ມີຄວາມສ່ຽງຕ່າງໆ, ແຕ່ກໍເຫັນວ່າການລະບາດຂອງພະຍາດດັ່ງກ່າວຍັງບໍ່ມີແນວໂນມຫລຸດລົງ, ກົງກັນຂາມຊ້ຳພັດມີລັກສະນະຂະຫຍາຍອອກສູ່ວົງກ້ວາງຂຶ້ນເລື້ອຍໆ.

ຍ້ອນປະຊາຊົນຈຳນວນໜິ່ງຍັງບໍ່ທັນເອົາໃຈໃສ່ປ້ອງກັນ ແລະ ສະກັດກັ້ນພະຍາດດັ່ງກ່າວຕາມທີ່ພາກສ່ວນ ກ່ຽວຂ້ອງມອບໝາຍ,ເຖິງຢ່າງໃດກໍຕາມປັດຈຸບັນພາກສ່ວນກ່ຽວຂ້ອງກໍບໍ່ໄດ້ ລົດລະໃນການເພີ່ມທະວີເອົາໃຈໃສ່ສະກັດກັ້ນພະຍາດດັ່ງກ່າວແຕ່ຍັງເພີ່ມທະວີໃນການສະກັດກັ້ນ ແລະ ປ້ອງກັນພະຍາດດັ່ງກ່າວຢ່າງເຂັ້ມງວດກວ່າເກົ່າ, ພ້ອມທັງຮຽກຮ້ອງໃຫ້ປະຊາຊົນເປັນເຈົ້າການປະຕິບັດຄຳຂັວນ 5 ປ ທີ່ກະຊວງສາທາລະນະສຸກວາງອອກຢ່າງເຂັ້ມງວດຄື: 1 ປິດຝາພາຊະນະທີ່ເກັບນ້ຳໃນເຮືອນ ແລະ ນອກເຮືອນເພື່ອບໍ່ໃຫ້ຍຸງມາໄຂ່ໃສ່. 2 ປ່ຽນນ້ຳໃນພາຊະນະເຊັ່ນ: ເຕົ້າດອກໄມ້, ນ້ຳຮອງຕີນຕູ້, ຖ້ານຮອງຈອກນ້ຳ. 3 ປ່ອຍປາຫາງນົກຍູງເພື່ອກິນໜອນນ້ຳ. 4 ປັບປຸງການອະນາໄມສິ່ງແວດລ້ອມອ້ອມເຮືອນບໍ່ໃຫ້ມີກະໂປະ, ກະປ໋ອງ, ຢາງຕີນລົດເກົ່າທີ່ມີນ້ຳຂັງ ແລະ 5 ປະຕິບັດໃຫ້ເປັນນິໃສປະຈຳທຸກໆອາທິດ ແລະ ຖ້າຫາກເປັນໄຂ້ໃຫ້ໄປພົບແພດໝໍດ່ວນເພື່ອສາມາດຈຳກັດພະ ຍາດນີ້ໃຫ້ນັບມື້ຫຼຸດໜ້ອຍຖອຍລົງ.

ຂ່າວ: ລາວພັດທະນາ