ຍ້ອນເສດຖະກິດມີທ່າແຮງຂະຫຍາຍຕົວຢ່າງຕໍ່ເນື່ອງ ຊຶ່ງອັນເຮັດໃຫ້ຢູ່ແຂວງຫຼວງນ້ຳທານັບມື້ການລົງທຶນສ້າງຕັ້ງໂຮງງານອຸດສາຫະກຳ ແລະຫັດຖະກຳເພີ່ມຂຶ້ນປະຈຸບັນມີທົ່ວແຂວງລວມທັງໝົດ 222 ແຫ່ງ ຖ້າທຽບໃສ່ສົກປີກ່ອນເພີ່ມຂຶ້ນ 3,25%, ໂດຍລວມມີມູນຄ່າການຜະລິດ 2 ຮ້ອຍຕື້ກວ່າກີບໃນສົກປີແລ້ວ.
ອີງຕາມຂໍ້ມູນຈາກພະແນກ ອຸດສາຫະກຳ ແລະການຄ້າແຂວງຫຼວງນ້ຳທາເມື່ອບໍ່ດົນຜ່ານມານີ້ວ່າ: ວຽກງານອຸດສາຫະກຳ ແລະ ຫັດຖະກຳໃນສົກປີຜ່ານມາແມ່ນ ໄດ້ມີຄວາມເອົາໃຈຕໍ່ການລົງກວດກາ ແລະໃຫ້ຄຳແນະນໍາບັນດາໂຮງງານຢາສູບ, ແກັດເຈ້ຍ, ໂຮງງານເຟີນີເຈີທີ່ບໍ່ມີໃບທະບຽນຈຳນວນ 2 ຄັ້ງ ແລະບັນຫາສິ່ງແວດລ້ອມໂຮງງານຈຳນວນ 3 ຄັ້ງ ພ້ອມຍັງໄດ້ສົມທົບກັບຂະແໜງນຳ ເຂົ້າ-ສົ່ງອອກລົງກວດກາຜະລິດຕະພັນໄມ້ເຄິ່ງສຳເລັດຮູບຂອງໂຮງ ງານປຸງແຕ່ງໄມ້ຊຽງກົກຈໍານວນ 1 ຄັ້ງ.
ນອກຈາກນີ້ແລ້ວກໍ່ມີການສົມ ທົບກັບຂະແໜງທີ່ກ່ຽວຂ້ອງລົງກວດກາໂຮງງານຜະລິດວັດສະດຸຫຸ້ມຫໍ່ຈິ້ງເພີງຫ່ວງທີ່ບ້ານນາເຕີຍກວດກາສະຖານທີິ່ສ້າງຕັ້ງໂຮງງານປະສົມຊີມັງທີ່ບ້ານນາລື ແລະລົງກວດກາໂຮງງານສານຕາໜ່າງ ທີ່ບ້ານໂພນໄຊສະຫວ່າງເພື່ອອອກໃບອະນຸຍາດດໍາເນີນກິດຈະການຈໍານວນ 3 ຄັ້ງເຂົ້າຮ່ວມຝືກອົບຮົມວຽກງານອຸດສາຫະກຳ ແລະຫັດຖະກຳຢູ່ຕ່າງແຂວງຈຳນວນ 3 ຄັ້ງ.
ກວດກາຜະລິດຕະພັນອອກຈາກໂຮງງານໄດ້ທັງໝົດ 232 ຄັ້ງ ໃນນີ້ກວດກາຜະລິດຕະພັນອອກຈາກໂຮງງານຢາສູບໄດ້ 157 ຄັ້ງ, ຜະລິດຕະພັນໄມ້ເຄື່ອງເຟີນີເຈີ 13 ຄັ້ງ, ຝ້າຍໄໝ 8 ຄັ້ງ, ແປ້ງມັນຕົ້ນ 2 ຄັ້ງ, ຢາງພາລາເຄິ່ງສໍາເລັດຮູບ 46 ຄັ້ງ, ຢັ້ງຢືນການນໍາເຂົ້າເຄື່ອງຈັກຈຳນວນ 4 ຄັ້ງ ແລະກວດກາຜະລິດຕະພັນທອງກ້ອນອອກໂຮງງານ 1 ຄັ້ງ ຊຸກຍູ້ ແລະສົ່ງເສີມການດຳເນີນກິດຈະການໂຮງງານປຸງແຕ່ງ ແລະຫັດຖະກຳໄດ້ 7 ຫົວໜ່ວຍ.
ປະຈຸບັນທົ່ວແຂວງຫຼວງນ້ຳທາ ແມ່ນມີໂຮງງານອຸດສາຫະກຳ ແລະຫັດຖະກຳລວມທັງໝົດ 222 ແຫ່ງ ທຽບໃສ່ສົກປີ 2014-2015 ເພີ່ມຂຶ້ນ 3,25% ໃນພິທີໂຮງງານອຸດສາຫະກຳປຸງແຕ່ງ 181 ແຫ່ງ ຂະໜາດໃຫຍ່ 21 ແຫ່ງ, ກາງ 24 ແຫ່ງ, ນ້ອຍ 103 ແຫ່ງ ແລະແບບຄອບຄົວ 33 ແຫ່ງ ສຳລັບໂຮງງານຫັດຖະກຳມີ 41 ແຫ່ງ ຂະໜາດກາງ 7 ແຫ່ງ ແລະນ້ອຍ 34 ແຫ່ງ ຂະນະທີ່ໂຮງງານປຸງແຕ່ງໄມ້ ແລະເຟີນີເຈີ ມີ 32 ແຫ່ງ ໃນນີ້ໂຮງງານປຸງແຕ່ງໄມ້ຂັ້ນ l ມີ 3 ແຫ່ງ, ໂຮງງານປຸງແຕ່ງໄມ້ຂັ້ນ ແລະຂັ້ນ (ເຟີນິເຈີ ) 29 ແຫ່ງ.
ຂໍ້ມູນຍັງໃຫ້ຮູ້ຕື່ມອີກວ່າ: ໃນຈຳນວນໂຮງງານດັ່ງກ່າວສົກປີຜ່ານມາໄດ້ມີມູນຄ່າການຜະລິດ ລວມທັງໝົດ 219,24 ຕື້ກວ່າກີບ ໃນນີ້ມີມູນຄ່າຂອງການຜະລິດອຸດສາຫະກຳປຸງແຕ່ງທັງໝົດ 208,90 ຕື້ກວ່າກີບ ຫຼຸດລົງ 15,28% ສາເຫດຍ້ອນມີບາງໂຮງງານຜະລິດ ບໍ່ເປັນປົກກະຕິເຊັ່ນ: ໂຮງງານປຸງແຕ່ງໝາກຕາວ, ໂຮງງານປຸງແຕ່ງຢາງພາລາ ແລະໂຮງງານຫຼອມທອງເປັນຕົ້ນໃນນີ້ສະບຽງອາຫານ 52,76 ຕື້ກວ່າກີບ, ຜະລິດອຸປະກອນຮັບໃຊ້ເຄື່ອງກໍ່ສ້າງ 6,69 ຕື້ກວ່າກີບ, ຜະລິດຕະພັນຢາສູບ 15,28 ຕື້ກວ່າກີບ, ຜະລິດຕະພັນໄມ້ແປຮູບ ແລະສຳເລັດຮູບ 363,75 ຕື້ກວ່າກີບ, ປຸງແຕ່ງຢາງພາລາ 131,04 ຕື້ ກວ່າກິບ ແລະຜະລິດຕະພັນທອງກ້ອນ 2,75 ຕື້ກວ່າກີບ.
ສຳລັບມູນຄ່າ ການຜະລິດຫັດຖະກຳລວມທັງໝົດ 10,33 ຕື້ກວ່າກີບ ຫຼຸດລົງເຊັ່ນດຽວກັນປະມານ 1,90% ໃນນີ້ມູນຄ່າ ຂອງຫັດຖະກຳຝ້າຍ-ໄໝ 1,02 ຕື້ກວ່າກີບ, ເຟີນິເຈີໄມ້ 5,64 ຕື້ກວ່າກີບ, ຫັດຖະກຳຫວາຍ 358,05 ລ້ານກວ່າກີບ, ຫັດຖະກຳຖັກແສ່ວ 867,09 ລ້ານກວ່າກີບ, ຫັດຖະກຳພ້າ-ມີດ 11 ລ້ານກີບ, ໃບຊາ 103,50 ຕື້ກີບ ແລະຜະລິດຕະພັນດິນຈີ່ 2,32 ຕື້ກວ່າກີບ.
ຂ່າວ: ເສດຖະກິດ-ສັງຄົມ