ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໃຫ້ຮູ້ວ່າ: ສຳລັບໄພພິບັດທໍາມະຊາດ ທີ່ເກີດຂຶ້ນສ່ວນຫລາຍໃນປະເທດເຮົາແມ່ນໄພນ້ຳຖ້ວມ, ຊຶ່ງໄດ້ສົ່ງຜົນເສຍຫາຍຕໍ່ຊີວິດ, ຊັບສີນ, ພື້ນຖານໂຄ່ງລ່າງ, ພື້ນຖານການຜະລິດກະສິກໍາເປັນຈໍານວນຫລາຍ ໃນແຕ່ລະປີ, ໂດຍສະເພາະຢູ່ໃນເຂດຊົນນະບົດຫ່າງໄກສອກຫລີກ ແມ່ນຍັງມີຄວາມຕ້ານທານຕໍ່າຕໍ່ການຮັບມືກັບໄພພິບັດ ແລະ ກາປ່ຽນແປງດິນຟ້າອາກາດ, ຊຶ່ງມັນສະແດງໃຫ້ເຫັນໃນປີ 2015 ຜ່ານມາ ປະເທດເຮົາໄດ້ຮັບຜົນກະທົບ ຈາກໄພພິບັດທໍາມະຊາດທີ່ໜັກໜ່ວງສົມຄວນຄື: ມີໄພນໍ້າຖ້ວມເກີດຂຶ້ນ 8 ຄັ້ງຢູ່ 7 ແຂວງພາກເໜືອ ແລະ ພາກກາງ ແລະ ລະຫ່ວາງເດືອນມິຖຸນາຫາກັນຍາກໍມີສັດຕູພືດ (ຕັກແຕນຝຸງ) ລະບາດຢ່າງໜັກໜ່ວງ ຢູ່ແຂວງຫລວງພະບາງ ແລະ ຫົວພັນ, ພ້ອມກັບເກີດນໍ້າຖ້ວມກະທັນຫັນຢູ່ເມືອງນານ, ແຂວງຫລວງພະບາງ ເມື່ອຕົ້ນເດືອນກັນຍາຜ່ານມານີ້, ອັນໄດ້ສົ່ງຜົນກະທົບຕໍ່ຊີວິດ ແລະ ຊັບສິນຂອງປະຊາຊົນບັນດາເຜົ່າ, ຕໍ່ຄວາມໝັ້ນຄົງທາງສັງຄົມ ແລະ ສ້າງຄວາມເສຍຫາຍແກ່ພື້ນຖານເສດຖະກິດ-ສັງຄົມຂອງຊາດ ເປັນຈໍານວນບໍ່ໜ້ອຍ. ເຊັ່ນດຽວກັບປີນີ້ກໍເກີດມີໄພນ້ຳຖ້ວມ ແລະ ສັດຕູພືດທຳລາຍຢູ່ຫຼາຍທ້ອງຖິ່ນ, ຕາມການສັງລວມເບື້ອງຕົ້ນ, ມາຮອດປັດຈຸບັນ ມີເນື້ອທີ່ການຜະລິດຂອງປະຊາຊົນຖືກທຳລາຍ ແລະ ເສຍຫາຍຫຼາຍພໍສົມຄວນ.
ແນວໃດກໍຕາມ, ເຖິງວ່າທ່າອ່ຽງຂອງໄພພິບັດ ຈະມີຄວາມຮຸນແຮງ ແລະ ຖີ່ຂຶ້ນກໍຕາມ, ປະຊາຊົນບັນດາເຜົ່າ ແລະ ອົງການປົກຄອງທ້ອງຖິ່ນ ກໍຄືພາກສ່ວນກ່ຽວຂ້ອງ ກໍຍັງສາມາດຮັບມືຕໍ່ສະພາບທີ່ເກີດຂຶ້ນ ໃນລະດັບດີສົມຄວນເປັນຕົ້ນ:ຫລາຍທ້ອງຖິ່ນມີການວາງແຜນຈັດສັນພື້ນທີ່ ແລະ ຕັ້ງຖິ່ນຖານໃນບ່ອນທີ່ປອດໄພກວ່າເກົ່າ, ການປຸກສ້າງທີ່ຢູ່ອາໄສ ມີຄວາມແຂງແຮງທົນທານ, ມີແຜນການປົກປັກຮັກສາສິ່ງແວດລ້ອມ ແລະ ທໍາມະຊາດ, ໂດຍສະເພາະແມ່ນ ການເພີ່ມເນື້ອທີ່ປົກຫຸ້ມຂອງປ່າໄມ້ ແລະ ປົກປັກຮັກສາແຫລ່ງນໍ້າ ແລະ ລະບົບນິເວດຕ່າງໆ. ນອກຈາກນີ້, ຍັງມີການນໍາເອົາຄວາມຮູ້ພື້ນຖານ ໃນການຫລຸດຜ່ອນຄວາມສ່ຽງຕໍ່ໄພພິບັດ ເຂົ້າໃນຫລັກສູດຂັ້ນສາມັນສຶກສາ ແລະ ລິເລີ່ມ ເຊຶ່ອມສານເຂົ້າໃນຫລັກສູດລະດັບການສຶກສາຊັ້ນສູງ ແລະ ມະຫາວິທະຍາໄລ, ການຝຶກຊ້ອມປ້ອງກັນໄພພິບັດ ໃນບັນດາສໍານັກງານ ແລະ ສະຖາບັນການສຶກສາຕ່າງໆ.
ກະຊວງດັ່ງກ່າວ ໃຫ້ຮູ້ວ່າ: ໃນຫລາຍປີຜ່ານມາ, ພາຍໃຕ້ແຜນປະຕິບັດງານ ການຫລຸດຜ່ອນຄວາມສ່ຽງໄພພິບັດ, ໂດຍສະເພາະປີ 2005-2015 ເຫັນວ່າປະເທດລາວເຮົາສາມາດບັນລຸໄດ້ ບັນດາຕົວຊີ້ວັດທີ່ສໍາຄັນຫຼາຍຢ່າງຄື: ຖືວຽກງານການຫລຸດຜ່ອນຄວາມສ່ຽງໄພພິບັດ ເປັນວຽກບຸລິມະສິດລະດັບຊາດ, ມີລະບົບແຈ້ງເຕືອນໄພລ່ວງໜ້າທີ່ຊັດເຈນ ແລະ ທັນການຫລາຍຂຶ້ນ, ຫລາຍຂະແໜງການ ແລະ ຫລາຍທ້ອງຖິ່ນໃນເຂດສ່ຽງໄພ ໄດ້ມີແຜນຫລຸດຜ່ອນ ແລະ ຕອບໂຕ້ໄພພິບັດຂອງຕົນ ແລະ ສິ່ງສໍາຄັນລັດຖະບານໄດ້ເຊື່ອມສານວຽກງານດັ່ງກ່າວ ເຂົ້າໃນແຜນພັດທະນາເສດຖະກິດ-ສັງຄົມ ໃນແຕ່ລະໄລຍະ. ແນວໃດກໍຕາມ, ການປ້ອງກັນ ແລະ ຄວບຄຸມໄພພິບັດ ແມ່ນເປັນພາລະໜ້າທີ່ອັນສຳຄັນ ແລະ ມີຄວາມທ້າທາຍສູງ. ສຳລັບປະເທດເຮົາຖືວ່າຍັງມີສິ່ງທ້າທາຍ ແລະ ຂໍ້ຈຳກັດຫລາຍດ້ານເຊັ່ນ: ງົບປະມານ, ເຄື່ອງມືທີ່ທັນສະໄໝ, ບຸກຄະລະກອນ ແລະ ອື່ນໆ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!