ບຸນຊ່ວງເຮືອໃນມື້ບຸນອອກພັນສາຂອງທຸກໆ ປີນັ້ນ ເປັນກິລາປະເພນີຂອງລາວທີ່ຖືກສືບທອດມາແຕ່ບູຮານນະການ ໂອກາດຂອງບຸນດັ່ງກ່າວນີ້ເປັນການສ້າງສັນບັນຍາກາດໃຫ້ປະຊາຊົນໄດ້ມາພັກຜ່ອນຢ່ອນໃຈ ພາຍຫຼັງທີ່ມົກມຸ້ນຢູ່ກັບການຜະລິດກະສິກຳໃນລະດູຝົນຕະຫຼອດຫຼາຍເດືອນທີ່ຜ່ານມາ. ນອກຈາກນັ້ນ, ບຸນຊ່ວງເຮືອຍັງເປັນໂອກາດໃຫ້ປະຊາຊົນໄດ້ເຕົ້າໂຮມກັນ ພົບໜ້າພໍ້ຕາກັນໃນງານບຸນ ແລະໃນອະດີດຍັງເປັນການສ້າງໃຫ້ມີສາຍສຳພັນລະຫວ່າງຜູ້ປົກຄອງກັບລາສະດອນ ໂດຍການເອົາເຮືອມາຊ່ວງແຂ່ງກັນລະຫວ່າງຜູ້ປົກຄອງກັບລາສະດອນ ນັ້ນແມ່ນເພື່ອຄວາມເຂົ້າອົກເຂົ້າໃຈ ແລະມີຄວາມສະໝານສາມັກຄີີກັນ ລະຫວ່າງລາສະດອນກັບກະສັດ, ປະຊາຊົນກັບລັດ ຫຼືປະຊາຊົນກັບປະຊາຊົນດ້ວຍກັນ.
ດັ່ງນັ້ນ, ບຸນຊ່ວງເຮືອຈຶ່ງເປັນທີ່ນິຍົມໄປທ່ອງທ່ຽວຂອງປະຊາຊົນ ເພື່ອຄວາມສຸກ ຄວາມລື່ນເລິງບັນເທີງໃຈຂອງຕົນເອງ ແລະຄອບຄົວ ແຕ່ເມື່ອຍຸກສະໄໝປ່ຽນໄປ ຈາກທີ່ເຄີຍໄປທ່ຽວແລ້ວໄດ້ຄວາມສຸກ ພັດກັບກາຍເປັນໄປທ່ຽວແລ້ວໄດ້ຄວາມທຸກໃຈກັບບ້ານ ເຊັ່ນ ໄປທ່ຽວແລ້ວພົບກັບຄ່າຝາກລົດທີ່ໂຄດແພງ, ຄ່າອາຫານການກິນທີ່ໂຫດເກີນຄວນ ລາຄາເຝີຖ້ວຍດຽວ 50,000 ກີບ ຫຼືຖ້າໂຊກຮ້າຍກວ່ານັ້ນ ຍັງຖືກໂຈນເອົາມີດແຫກກະເປົາເງິນ… ບັນຫາຕ່າງໆ ເຫຼົ່ານີ້ບໍ່ແມ່ນເວົ້າຊື່ໆເດີ ແຕ່ມັນເຄີຍເກີດມີຂຶ້ນແລ້ວໃນປີທີ່ຜ່ານມາ.
ຕາມການສອບຖາມຜູ້ປະກອບການ ຫຼືແມ່ຄ້າຊາວຂາຍທີ່ຈັບຈອງພື້ນທີ່ ໃນບໍລິເວນແຄມຂອງ (ທ່າວັດຈັນ) ເພື່ອຂາຍອາຫານໃນໄລຍະບຸນຊ່ວງເຮືອ. ເປັນຫຍັງຄ່າເຝີຄືແພງເຖິງຖ້ວຍລະ 50,000 ກີບ? ຄຳຕອບກໍຄື: ເພາະວ່າຄ່າເຊົ່າສະຖານທີ່ແພງຫຼາຍ ກໍເລີຍຈຳເປັນຕ້ອງໄດ້ຂາຍແພງ ເພື່ອເອົາທຶນຄືນໃຫ້ໄວທີ່ສຸດ ແລະຕ້ອງໃຫ້ໄດ້ກຳໄລນຳອີກ ຈຶ່ງສາມາດຂາຍໄດ້ ເພາະນອກເໜືອຈາກຄ່າເຊົ່າສະຖານທີ່ແພງແລ້ວ ຍັງມີຄ່າວັດຖຸດິບທີ່ຊື້ມາແຕ່ງ ແລະຄ່າຈ້າງພະນັກງານຕື່ມອີກ.
ອີງຕາມຂໍ້ມູນທີ່ໄດ້ມາ ສະແດງໃຫ້ເຫັນວ່າຄ່າເຊົ່າສະຖານທີ່ຈາກພາກສ່ວນຄະນະກຳມະການຈັດງານຕະຫຼາດນັດບຸນຊ່ວງເຮືອ ແມ່ນມີລາຄາລະດັບ 4 ລ້ານກວ່າກີບຂຶ້ນໄປ ໃນຂະນະທີ່ມື້ຂາຍແທ້ໆ ແມ່ນຢູ່ທີ່ 3-4 ມື້ເທົ່ານັ້ນ.
ບັນຫາຄ່າປີ້ຝາກລົດ ແລະຄ່າອາຫານແພງ ໃນງານຕະຫຼາດນັດບຸນຊ່ວງເຮືອແຄມຂອງທ່າວັດຈັນນີ້ ຖືກຕຳໜິຕິຕຽນແລະສົ່ງຂ່າວຈາກພໍ່ແມ່ປະຊາຊົນ ແລະສື່ມວນຊົນມາທຸກປີ ພາກສ່ວນທີ່ກ່ຽວຂ້ອງກໍຄົງໄດ້ບົດຮຽນມາແລ້ວ ແລະຄືຊິມີການຫາວິທີທາງແກ້ໄຂບັນຫາດັ່ງກ່າວຢູ່ແລ້ວ ແຕ່ກໍມີຄຳຖາມວ່າ ເປັນຫຍັງຄືຍັງມີບັນຫາຢູ່?
ໃນປາງບຸນຊ່ວງເຮືອທ່າວັດຈັນປີນີ້ ລະຫວ່າງການຫາເງິນ ກັບ ປະເພນີວັດທະນະທຳ ເຮົາຈະເລືອກອັນໃດ?
