ຂປລ. ຫວ່າງບໍ່ດົນມານີ້ ເຈົ້າໜ້າທີ່ລະດັບສູງຂອງ ບໍລິສັດ ທາງລົດໄຟຈີນ ໄດ້ເປີດເຜີຍຕໍ່ສື່ມວນຊົນລາວ ແລະ ສາກົນວ່າ ໂຄງການທາງລົດໄຟ ລາວ-ຈີນ ທີ່ມີມູນຄ່າຫລາຍຕື້ໂດລາສະຫະລັດ ຈະສຳເລັດ ແລະ ເປີດໃຊ້ບໍລິການພາຍໃນປີ 2021.
ທ່ານ ຈາວ ໂກຕັງ ຮອງຫົວໜ້າວິສະວະກຳຂອງ ບໍລິສັດ ທາງລົດໄຟຈີນ ໄດ້ສະແດງຄວາມເຊື່ອໝັ້ນວ່າ ຕາມແຜນໂຄງການທາງລົດໄຟ ລາວ-ຈີນ ນັ້ນ ຈະສູ້ຊົນໃຫ້ສຳເລັດໃນປີ 2021 ແລະ ໃນການເດີນທາງຢ້ຽມຢາມ ສປປ ລາວ ໃນຕົ້ນເດືອນກັນຍາຜ່ານມາ ເຫັນວ່າ ເປັນໄປບໍ່ໄດ້ທີ່ໂຄງການຈະບໍ່ສຳເລັດຕາມແຜນການ.
ຢ່າງໃດກໍຕາມ ໃນການຢ້ຽມຢາມແຂວງຫລວງພະບາງ ໃນຕົ້ນເດືອນກັນຍາ ທ່ານ ຈາງ ເຫັນວ່າ ການທີ່ຈະຮັບປະກັນຊີວິດການເປັນຢູ່ຂອງພະນັກງານ ແລະ ກໍາມະກອນ ທີ່ຈະເຮັດວຽກໃນໂຄງການເສັ້ນທາງລົດໄຟ ລາວ-ຈີນ ບໍ່ວ່າຈະເປັນການສະໜອງທາດຊີ້ນ ແລະ ພືດຜັກ ກໍຍັງເປັນສິ່ງທ້າທາຍຢູ່ ແນວໃດກໍດີອຳນາດການປົກຄອງທີ່ກ່ຽວຂ້ອງ ໄດ້ໃຫ້ຄຳໝັ້ນສັນຍາວ່າ ຈະສະໜອງບຸກຄະລາກອນ ແລະ ປັດໄຈຕ່າງໆ ໃຫ້ແກ່ວຽກງານທີ່ກ່ຽວຂ້ອງຂອງໂຄງການທາງລົດໄຟ ລາວ-ຈີນ.
ການປະມູນກໍ່ສ້າງໂຄງການທາງລົດໄຟລາວ-ຈີນ ໄດ້ສໍາເລັດ ໃນຕົ້ນເດືອນກັນຍາ 2016 ຜ່ານມາ ແລະ ໃນປັດຈຸບັນ ບັນດາ ບໍລິສັດຮັບເໝົາ ກຳລັງກ້າວສູ່ໄລຍະກໍ່ສ້າງ ໂດຍຈະມີການກໍ່ສ້າງ 33 ສະຖານີ ອັນລວມມີ 11 ສະຖານີ ທີ່ເປັນສະຖານີໂດຍສານ–ຂົນສົ່ງສິນຄ້າ ແລະ ໜຶ່ງສະຖານີ ແມ່ນສຳລັບຂົນສົ່ງສິນຄ້າ ເຊິ່ງຈະສ້າງຢູ່ນະຄອນຫລວງວຽງຈັນ ພ້ອມນີ້ກໍຈະມີຈຸດສັບລາງ ແລະ ຈຸດເຊື່ອມຕໍ່ 284 ຈຸດ.
ພາຍຫລັງສຳເລັດການກໍ່ສ້າງ ຈະເປີດໃຫ້ບໍລິການ 18 ຂະບວນ ໃນນັ້ນ 4 ຂະບວນສຳລັບການໂດຍສານ ແລະ 14 ຂະບວນສຳລັບ ການຂົນສົ່ງສິນຄ້າ ເຊິ່ງຂະບວນໂດຍສານຈະໃຊ້ຄວາມໄວ 160 ກິໂລແມັດ/ຊົ່ວໂມງ, ສ່ວນຂອບເຂດທົ່ງພຽງສໍາລັບການໂດຍສານ ແມ່ນໃຊ້ຄວາມໄວເຖິງ 200 ກິໂລແມັດ/ຊົ່ວໂມງ, ຕະຫລອດໄລຍະເສັ້ນທາງຈະມີອຸມົງ 72 ແຫ່ງ ທີ່ມີຄວາມຍາວລວມ 183 ກມ ແລະ ບ່ອນທີ່ຍາວທີ່ສຸດ 9.5 ກມ ເອີ້ນວ່າອຸມົງມິດຕະພາບລາວ-ຈີນ ເຊິ່ງພວມດໍາເນີນກໍ່ສ້າງຢູ່ໃນປັດຈຸບັນ ຢູ່ລະຫວ່າງຊາຍແດນ ລາວ-ຈີນ ທີ່ແຂວງຫລວງນ້ຳທາ. ຖ້າໂຄງການທາງລົດໄຟ ລາວ-ຈີນ ສໍາເລັດ ຈະປະກອບສ່ວນສຳຄັນ ໃນການຫັນວິໄສທັດຂອງລັດຖະບານລາວ, ການຫັນປະເທດທີີ່ບໍມີທາງອອກສູ່ທະເລ ກາຍເປັນປະເທດທາງຜ່ານໃຫ້ກາຍເປັນຮູບປະທໍາ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!