- ຫິວນໍ້າ ແລະໄປຖ່າຍເບົາຕະຫຼອດ: ເກີດຈາກນໍ້າຕານໃນເລືອດສູງຜິດປົກກະຕິ ຈົນຮ່າງກາຍຕ້ອງເລັ່ງຂັບອອກມາທາງນໍ້າປັດສະວະ ເຮັດໃຫ້ເຂົ້າຫ້ອງນໍ້າຕະຫຼອດ ພໍເຂົ້າຕະຫຼອດກໍເຮັດໃຫ້ຮ່າງກາຍຂາດນໍ້າ ຫຼືຫິວນໍ້າ
- ນໍ້າໜັກຫຼຸດລົງ ໂດຍບໍ່ມີເຈດຕະນາຈະຫຼຸດນໍ້າໜັກ: ລະດັບນໍ້າຕານໃນເລືອດສູງ ເຮັດໃຫ້ນໍ້າໜັກຫຼຸດລົງແບບ 5-10 ໂລ ໃນເວລາ 2-3 ເດືອນ, ເນື່ອງຈາກຮ່າງກາຍເອົານໍ້າຕານໄປໃຊ້ບໍ່ໄດ້ ກໍຈະດຶງໂປຣຕີນຈາກກ້າມເນື້ອ ໄປປ່ຽນເປັນພະລັງງານແທນ ແລ້ວຍັງມີອາການຂ້າງຄຽງອີກຄື ໝາກກໄຂ່ຫຼັງຈະເຮັດວຽກໜັກໃນການເຜົາຜານແຄລໍລີ່. ດັ່ງນັ້ນ ເຮົາຈຶ່ງມັກພົບວ່າ ພະຍາດເບົາຫວານ ກັບພະຍາດໝາກໄຂ່ຫຼັງມັກມາພ້ອມກັນ
- ຢາກກິນຕະຫຼອດ: ເພາະພະຍາດນີ້ເປັນຄວາມຜິດປົກກະຕິກ່ຽວກັບລະດັບນໍ້າຕານໃນເລືອດ ຈຶ່ງມີອາການວ່າ ເມື່ອໃດຮ່າງກາຍຂາດນໍ້າຕານ ຮ່າງກາຍຈະຮຽກຮ້ອງໃຫ້ເຮົາຢາກກິນຕະຫຼອດ ໃຫ້ມີອາຫານເຂົ້າໄປທົດແທນ
- ມີບັນຫາຜິວໜັງ: ທັງໆທີ່ບໍ່ເຄີຍເປັນມາກ່ອນ ອາການຂ້າງຄຽງຂອງການເປັນເບົາຫວານຄືຜິວແຫ້ງແຕກ ຫຼືຄັນ ບາງທີກໍມີຮອຍດຳຢູ່ຄໍ ຫຼືຂີ້ແຮ້ ຈຶ່ງຕ້ອງໝັ່ນສັງເກດສຸຂະພາບຕົວເອງໃຫ້ດີ ຫາກສົງໄສຕ້ອງໄປກວດ ກ່ອນຈະສາຍເກີນໄປ
- ເມື່ອເປັນບາດແລ້ວ ດີຊ້າຈົນຮູ້ສຶກຜິດປົກກະຕິ: ເພາະລະດັບນໍ້າຕານໃນເລືອດ ຈະຂັດຂວາງການເຮັດວຽກຂອງຫຼອດເລືອດ ດັ່ງນັ້ນເວລາບາດຈຶ່ງດີຊ້າ ເພາະເລືອດໄປຫຼໍ່ລ້ຽງບ່ອນບາດໜ້ອຍ ແລະຍັງຕ້ອງລະວັງການຕິດເຊື້ອ
- ຕິດເຊື້ອລາງ່າຍ: ຄົນເປັນເບົາຫວານຈະມີພູມຄຸ້ມກັນຕໍ່າ ຕິດເຊື້ອໄດ້ງ່າຍ ໂດຍສະເພາະເຊື້ອລາແຄນດິດາ ເຊິ່ງເຕີບໂຕໄດ້ດີໃນທີ່ມີນໍ້າຕານ
- ຮູ້ສຶກເມື່ອຍງ່າຍ: ລະດັບນໍ້າຕານໃນເລືອດສູງ ສົ່ງຜົນກະທົບຕໍ່ການເຮັດວຽກຂອງອະໄວຍະວະຕ່າງໆ ໃນຮ່າງກາຍຕະຫຼອດ
- ມີອາການຕາພາງ ເບິ່ງບໍ່ເຫັນແຈ້ງ: ລະດັບນໍ້າຕານສູງເກີນໄປ ຈະເຮັດໃຫ້ດວງຕາຜິດປົກກະຕິ ດ້ານການເບິ່ງເຫັນ ຄືວ່າມີຫຍັງລອຍໄປມາໃນດວງຕາ
- ມີອາການຊາຕາມປາຍມືປາຍຕີນ: ລະດັບນໍ້າຕານໃນເລືອດສູງເກີນໄປ ຈະທໍາລາຍລະບົບການເຮັດວຽກຂອງປະສາດ ເຮັດໃຫ້ເກີດອາການຊາຕາມປາຍມື ປາຍຕີນໄດ້
- ນໍ້າຕານໃນເລືອດສູງ: ເລື່ອງນີ້ພົບໄດ້ກໍລະນີມີການກວດສຸຂະພາບປະຈຳປີ ເຊິ່ງແພດກວດພົບ ຄົນເຈັບມີນໍ້າຕານໃນເລືອດສູງເກີນປົກກະຕິແລ້ວ ຕ້ອງມີການກວດຄືນ ເພາະອາດເປັນເບົາຫວານໄດ້.
ພະຍາດເບົາຫວານ ເກີດຂຶ້ນໄດ້ຈາກກຳມະພັນ, ການກິນອາຫານ, ການບໍ່ອອກກຳລັງກາຍ ມີຜົນຂ້າງຄຽງຕໍ່ຊີວິດໄດ້, ລວມຮອດສ້າງຄວາມບໍ່ເປັນສຸກກັບຊີວິດທີ່ຕ້ອງຢູ່ກັບຢາຄວບຄຸມລະດັບນໍ້າຕານຕະຫຼອດຊີວິດ, ທັງລະມັດລະວັງພະຍາດແຊກຊ້ອນ, ການສູນເສຍອະໄວຍະວະຈາກບາດແຜທີ່ຕິດເຊື້ອຮັກສາບໍ່ດີ, ການສູນເສຍການເບິ່ງເຫັນ ຫາກເບົາຫວານຂຶ້ນຕາ. ດັ່ງນັ້ນ ຈຶ່ງຄວນກວດສຸຂະພາບປະຈຳປີ ເພື່ອກວດເບິ່ງນໍ້າຕານໃນເລືອດ ແລະເບິ່ງແຍງຕົນເອງດ້ວຍການອອກກຳລັງກາຍ, ຄວບຄຸມອາຫານ ແລະສັງເກດເບິ່ງຫາກມີອາການຜິດປົກກະຕິທີ່ເບິ່ງແລ້ວອາດສ່ຽງຕໍ່ການເກີດເບົາຫວານ.
ທີ່ມາ: ສຸຂະພາບ
ສຳຫຼັບທ່ານທີ່ຮັກສຸຂະພາບ ຕິດຕາມເລື່ອງດີດີ ກົດໄລຄ໌ເລີຍ!
ifram FB ວິທະຍາສຶກສາ