ວັນທີ 7 ກັນຍາ ປີ 2004 ຫຼືມື້ນີ້ເມື່ອ 12 ປີທີ່ແລ້ວ ເປັນມື້ວາງຈຳໜ່າຍຂອງເກມ Silent Hill 4: The Room ເທິງເຄື່ອງ PS2 ແລະ Xbox ທີ່ປະເທດສະຫະລັດອາເມຣິກາ. ໂດຍພາກນີ້ເປັນພາກສຸດທ້າຍທີ່ພັດທະນາໂດຍ Team Silent ເຊິ່ງເຮັດເກມ Silent Hill ມາແລ້ວ 4 ພາກໃຫ້ກັບ Konami ກ່ອນທີ່ຈະຍ້າຍໃຫ້ທີມພັດທະນາຈາກຕາເວັນຕົກແບບ Climax Studios ແລະ Double Helix Games ນຳໄປພັດທະນາຕໍ່ ແລະ Silent Hill 4 ນີ້ຍັງໄດ້ທ່ານອາກິຣະ ຢາມາໂອກະ ນັກແຕ່ງເພງປະກອບປະຈຳຊີຣີນີ້ມາເປັນໂປຣດິວເຊີ້ໃຫ້ອີກນຳ.
ສຳລັບເລື່ອງຂອງເກມນີ້ຈະເລົ່າເຖິງ ເຮນຣີ້ ທາວເຊນ ຊາຍໜຸ່ມຜູ້ອາໄສຢູ່ໃນອະພາຣ໌ດເມນແຫ່ງໜຶ່ງ ໃນເມືອງເຊົາແອດຟິວ (South Ashfield) ທີ່ຢູ່ໆ ກໍຖືກກັກຂັງຢູ່ໃນຫ້ອງພັກຂອງໂຕເອງເປັນເວລາ 5 ມື້ແລ້ວ, ໂດຍທີ່ລາວບໍ່ສາມາດຕິດຕໍ່ກັບໂລກພາຍນອກໄດ້ເລີຍ ບໍ່ດົນຫຼັງຈາກນັ້ນລາວກໍພົບວ່າມີອຸໂມງເລິກລັບປະກົດຢູ່ພາຍໃນຫ້ອງນ້ຳທີ່ນຳໄປສູ່ສະຖານທີ່ຕ່າງໆ ແລະກໍໄດ້ຮູ້ວ່າຜູ້ຄົນທີ່ເຮນຣີ້ໄດ້ພົບໃນມິຕິອື່ນຕ່າງຖືກຂ້າຕາຍທັງໝົດ ແລະກາຍເປັນສົບໃນໂລກຄວາມເປັນຈິງນຳ ເຊິ່ງທຸກຄົນທີ່ຕາຍໄປລ້ວນມີຄວາມກ່ຽວຂ້ອງກັບອະດີດຂ້າຕະກອນໂລກຈິດນາມວ່າ ວໍເຕີ້ ຊັລລິແວນ ທີ່ເສຍຊີວິດໄປດົນແລ້ວ. ໃນຊ່ວງທ້າຍເກມ ເຮນຣີ້ໄດ້ລອງແກະຮອຍກ່ຽວກັບຊັລລິແວນ ຈົນໄດ້ຮັບຂໍ້ມູນຄືໄດອາຣີ້ທີ່ ໂຈເຊບ ຊະໄຣເບີ້ ຜູ້ເຂົ້າພັກຫ້ອງດຽວກັບເຮນຣີ້ທີ່ເປັນຄົນກ່ອນໜ້າໄດ້ຖິ້ມເອົາໄວ້ ໂດຍໂຈເຊບເອງກໍເຄີຍສືບເລື່ອງລາວຂອງຊັລລິແວນຄືກັນ ຈົນຮູ້ໄດ້ວ່າຊັລລິແວນເປັນເດັກກຳພ້າທີ່ເຊື່ອວ່າແມ່ແທ້ໆ ຂອງໂຕເອງເຄີຍພັກຢູ່ໃນຫ້ອງດຽວກັບທັງໂຈເຊບແລະເຮນຣີ້ມາກ່ອນ ເລີຍຈະຊຳລະລ້າງອະພາຣ໌ດເມນ ດ້ວຍການເຮັດພິທີທີ່ຕ້ອງຂ້າເຫຍື່ອຈຳນວນ 21 ຄົນ, ເຮນຣີ້ຈຶ່ງຕ້ອງຢຸດແຜນຮ້າຍຂອງຊັລລິແວນໃຫ້ໄດ້ ບໍ່ສະນັ້ນລາວກໍຈະກາຍເປັນສົບຄົນທີ 21 ເອງ.
ທາງດ້ານ Gameplay ຂອງ Silent Hill 4: The Room ເຮົາຈະໄດ້ຮັບບົດເປັນ ເຮນຣີ້ ທາວເຊນ ທີ່ຕ້ອງການຈະຫາທາງໜີອອກໄປຈາກອະພາຣ໌ດເມນທີ່ໂຕເອງອາໄສຢູ່ ໂດຍຮູບແບບຂອງເກມນີ້ຈະແບ່ງອອກເປັນ 2 ສ່ວນ ໄດ້ແກ່ລະຫວ່າງທີ່ຢູ່ໃນຫ້ອງພັກ ເຊິ່ງຈະເປັນມຸມກ້ອງແບບມຸມມອງບຸກຄົນທີ 1 ສ່ວນເວລາມຸດອຸໂມງໄປອີກໂລກອື່ນໆ ຈະເປັນມຸມມອງບຸກຄົນທີ 3 ຄືພາກກ່ອນ ແຕ່ວ່າຜູ້ຫຼິ້ນຈະສາມາດເຊບເກມໄດ້ກໍຕໍ່ເມື່ອຢູ່ໃນຫ້ອງພັກເທົ່ານັ້ນ ແລະຊ່ວງເຄິ່ງທຳອິດຂອງເກມ ຜູ້ຫຼິ້ນສາມາດໃຊ້ຫ້ອງພັກຂອງເຮນຣີ້ເປັນບ່ອນຟື້ນຟູພະລັງຈົນເຕັມໄດ້ອີກນຳ. ທັງນີ້, ໃນສ່ວນຂອງລະບົບການປະຈົນໄພແລະການຕໍ່ສູ້ ຜູ້ຫຼິ້ນຈະສາມາດຖືໄອເທັມຕິດໂຕໄດ້ຈຳກັດຈຳນວນອັນ ໂດຍສາມາດຝາກໄອເທັມໄວ້ໃນກ່ອງທີ່ຢູ່ໃນຫ້ອງຂອງເຮນຣີ້ ແລະການໂຈມຕີດ້ວຍອາວຸດໄລຍະປະຊິດຂອງເກມນີ້ຈະມີທັງແບບໂຈມຕີທຳມະດາ ແລະແບບສາກຈົນເຕັມເກດແລ້ວຕີ, ເຊິ່ງແບບສາກແລ້ວຕີນັ້ນຈະແຮງກວ່າ ແຕ່ກໍຈະໃຊ້ເວລາໃນການຕີດົນກວ່າເຊັ່ນກັນ ແຕ່ວ່າອາວຸດໄລຍະປະຊິດພວກນີ້ຈະມີເພໄດ້ຫາກວ່ານຳໄປຕີສັດຕູຫຼາຍລະດັບໜຶ່ງ (ລະບົບຄ້າຍກັບ Silent Hill ພາກ Origins)
Fact ເລັກນ້ອຍກ່ຽວກັບເກມ Silent Hill 4: The Room
- ສາເຫດທີ່ພາກນີ້ບໍ່ໄດ້ຢູ່ສະຖານທີ່ໃນເມືອງ Silent Hill ນັ້ນກໍເປັນເພາະວ່າໃນຕອນທຳອິດທາງ Konami ຕັ້ງໃຈຈະໃຫ້ເກມນີ້ເປັນເກມໄຕເຕິ້ນໃໝ່ທີ່ໃຊ້ຊື່ອື່ນຢູ່ແລ້ວ ແຕ່ພໍເຮັດໄປເຮັດເຮັດມາຈົນຈົບຂະບວນການພັດທະນາ ທາງ Konami ກໍຕັດສິນໃຈປັບເນື້ອເລື່ອງເລັກນ້ອຍແລ້ວຍ້າຍໃຫ້ໄປຢູ່ໃນ Timeline ດຽວກັນກັບ Silent Hill ແທນໄປເລີຍແລະນີ້ຈຶ່ງເປັນເຫດຜົນຫຼັກວ່າເປັນຫຍັງຈຶ່ງບໍ່ມີສະຖານທີ່ໃນເມືອງ Silent Hill ນັ້ນເອງ.
- Silent Hill 4: The Room ເປັນພາກທຳອິດຂອງຊີຣີ Silent Hill ທີ່ຖືກຈັດເຣດຈາກທົ່ວໂລກໃຫ້ເໝາະກັບຜູ້ຫຼິ້ນອາຍຸ 17 ປີຂຶ້ນໄປ ເນື່ອງຈາກມີພາບແລະເນື້ອຫາທີ່ຮຸ່ນແຮງກວ່າພາກອື່ນໆ.
- ວໍເຕີ້ ຊັລລິແວນ ໂຕຮ້າຍຫຼັກຂອງພາກນີ້ ເຄີຍຖືກກ່າວເຖິງໃນໄຟລ໌ທີ່ເປັນໜັງສືພິມເຊິ່ງມີໃຫ້ອ່ານໃນພາກ 2 ໂດຍລະບຸວ່າເຈົ້າໂຕເປັນຂ້າຕະກອນໂລກຈິດທີ່ເຄີຍໃຊ້ຂວານສັບສົບເດັກນ້ອຍໄປແລ້ວເຖິງ 2 ສົບ.
- ໃນຊ່ວງທີ່ເກມນີ້ ວາງຈຳໜ່າຍກະແສຂອງເກມນີ້ໄດ້ແຕກອອກເປັນ 2 ຝັ່ງຢ່າງຊັດເຈນ ບໍ່ວ່າຈະເປັນທັງນັກຣີວິວ ແລະຜູ້ຫຼິ້ນທົ່ວໄປ. ໂດຍ Marc Saltzman ນັກຣີວິວຈາກສຳນັກຂ່າວ CNN ໄດ້ກ່າວວ່າ Silent Hill 4 ເປັນຕົ້ນແບບຂອງການກ້າເຮັດໃນສິ່ງໃໝ່ ໃຫ້ກັບຊີຣີເນື່ອງຈາກຮູບເງົາສະຢອງຂວັນຂອງຮໍລີ້ວູດຍັງຂາດຄຸນສົມບັດໃນຂໍ້ນີ້ ທີ່ພະຍາຍາມຈະອະນຸລັກສະຕາຍການນຳສະເໜີຄວາມຫຼອນດ້ວຍຮູບແບບເກົ່າໆ ຈົນເຮັດໃຫ້ເມື່ອເຮັດພາກຕໍ່ອອກມາກໍຈະຍິ່ງເຮັດໃຫ້ຄວາມນິຍົມຕົກຕ່ຳລົງ ເພາະຄົນເລີ່ມຮູ້ມຸກຜີໂພ່ແບບເກົ່າໆ, ໃນຂະນະດຽວກັນ ທາງ IGN ໄດ້ເວົ້າເຖິງປະເດັນຂອງລະບົບເກມ ທີ່ພາກນີ້ມີສາກສູ້ກັບບອສໜ້ອຍເກີນໄປ ແລະປິດສະໜາໃນເກມເບິ່ງແລ້ວບໍ່ຄ່ອຍທ້າທາຍຄືກັບ 3 ພາກກ່ອນໜ້າ.
ທີ່ມາ: online station