ສຳນັກຂ່າວຕ່າງປະເທດຫລາຍສຳນັກ ທັງຈາກອົດສະຕາລີ ແລະ ອັງກິດ ລາຍງານໃນວັນທີ 7 ກັນຍານີ້ວ່າ ນາງ ຮັນນາ ກາວິອອສ ອາຍຸ 23 ປີ ສັນຊາດອາເມຣິກາ ໄດ້ຮັບບາດເຈັບກະດູກສັນຫລັງ ແລະ ຫົວແຕກ ຈາກການຕົກເຫວສູງ ຫລັງຈາກພະຍາຍາມຫລົບໜີ ຈາກການຂົ່ມຂືນຂອງຊາວໜຸ່ມໄທຄົນໜຶ່ງ ໃນຂະນະທີ່ນາງເດີນທາງໄປທ່ອງທ່ຽວພຽງລຳພັງ ຢູ່ຈັງຫວັດກະບີ່ ປະເທດໄທ ເຮັດໃຫ້ກາຍເປັນຂ່າວທີ່ກຳລັງໂດ່ງດັງໄປທົ່ວໂລກ ສ້າງພາບພາດທີ່ບໍ່ດີ ໃຫ້ແກ່ວົງການທ່ອງທ່ຽວໄທ ໃນປັດຈຸບັນ.
ເຫດການດັ່ງກ່າວນີ້ ເກີດຂຶ້ນພາຍຫລັງທີ່ ນາງ ກາວິອອສ ໄດ້ຖືກຊາຍໜຸ່ມໄທຄົນໜຶ່ງ ອາສາສະໝັກນຳທ່ຽວ ແລະ ພາໄປສົ່ງຢູ່ໂຮງແຮມ ໂດຍທີ່ຮູ້ເທົ່າບໍ່ເຖິງການ, ກ່ອນທີ່ຈະມາຮູ້ສຶກຕົວວ່າ ກຳລັງຕົກຢູ່ໃນອັນຕະລາຍ ເນື່ອງຈາກຊາຍຄົນດັ່ງກ່າວຊື່ ທ້າວ ອະໄພ ເຣືອງວອນ ອາຍຸ 28 ປີ ຊຶ່ງເປັນປະຊາຊົນໃນທ້ອງຖິ່ນ ໄດ້ພະຍາຍາມລວນລາມ ແລະ ຂົ່ມຂືນ, ເມື່ອເວລາໄດ້ຈັງຫວະ ຜູ້ເຄາະຮ້າຍຈຶ່ງຟ້າວແລ່ນໜີ ຈົນຕົກລົງເຫວ ແລະ ໄດ້ຮັບບາດເຈັບດັ່ງກ່າວ.
ແນວໃດກໍຕາມ ປັດຈຸບັນເຈົ້າໜ້າທີ່ຕຳຫລວດໄທ ໄດ້ຈັບກຸມຕົວ ທ້າວ ອະໄພ ຜູ້ກໍ່ເຫດເປັນທີ່ຮຽບຮ້ອຍແລ້ວ ແລະ ຜູ້ກ່ຽວຈະຖືກດຳເນີນຄະດີ ຊຶ່ງອາດມີໂທດຕັດອິດສະຫລະພາບ ສູງສຸດເຖິງ 10 ປີ ຕາມກົດໝາຍຂອງໄທ.
ຕິດຕາມເຮົາທາງFacebook ກົດຖືກໃຈເລີຍ!