ເວັບໄຊ Sanook.com ຂອງໄທ ລາຍງານໃນວັນທີ 26 ສິງຫານີ້ວ່າ ສື່ມວນຊົນທ້ອງຖິ່ນຂອງຈີນ ໄດ້ສະແດງຄວາມບໍ່ພໍໃຈ ກໍລະນີທີ່ສື່ອອນລາຍຂອງໄທ ນຳສະເໜີຮູບພາບ ນັກທ່ອງທ່ຽວຈັບຫອຍມືເສືອ ແລະ ຫອຍເໝັ້ນ ຊຶ່ງເປັນສິ່ງທີ່ຜິດກົດໝາຍໄທ ຂຶ້ນມາຖ່າຍຮູບ ໂດຍອ້າງວ່າເປັນຝີມືຂອງນັກທ່ອງທ່ຽວຈີນ ແຕ່ໃນຄວາມເປັນຈິງແລ້ວ ທ່ານ ວີຣະ ຂຸນໄຊຍະຣັກ ຫົວໜ້າອຸທິຍານແຫ່ງຊາດ ໝູ່ເກາະຊ້າງ ສະຖານທີ່ທ່ອງທ່ຽວບ່ອນເກີດເຫດ ໄດ້ອອກມາລະບຸວ່າ ພຶດຕິກຳດັ່ງກ່າວນີ້ ບໍ່ແມ່ນນັກທ່ອງທ່ຽວຊາວຈີນແຕ່ຢ່າງໃດ ແຕ່ຫາກເປັນພະນັກງານບໍລິສັດນຳທ່ຽວຊາວໄທເອງ ທີ່ພານັກທ່ອງທ່ຽວໄປດຳນ້ຳ ແລະ ຈັບຫອຍຂຶ້ນມາຖ່າຍຮູບລົງເຟສບຸກ, ເບື້ອງຕົ້ນ ທາງການໄທ ໄດ້ປັບໄໝຊາຍໄທຄົນດັ່ງກ່າວແລ້ວ ຈຳນວນ 500 ບາດ ເນື່ອງຈາກຜິດກົດໝາຍອຸທິຍານແຫ່ງຊາດ ຂໍ້ຫາກະທຳອັນຕະລາຍຕໍ່ສັດ.
ເມື່ອຂ່າວດັ່ງກ່າວນີ້ໄດ້ດັງໄປເຖິງປະເທດຈີນ ປະກົດວ່າສັງຄົມຈີນບາງສ່ວນ ສະແດງຄວາມບໍ່ພໍໃຈ ກ່ຽວກັບການກ່າວຫາດັ່ງກ່າວນີ້ ໂດຍລະບຸວ່າ ເປັນອີກໜຶ່ງກໍລະນີ ເພື່ອສ້າງພາບພົດສື່ສຽງທີ່ບໍ່ດີ ໃຫ້ແກ່ນັກທ່ອງທ່ຽວຈີນ ທີ່ເດີນທາງມາທ່ອງທ່ຽວປະເທດໄທ ໂດຍທີ່ຊາວຈີນ ບໍ່ໄດ້ສ້າງຄວາມເດືອດຮ້ອນໃຫ້ແຕ່ຢ່າງໃດ.
ຕິດຕາມເຮົາທາງFacebook ກົດຖືກໃຈເລີຍ!