ລັດຖະບານໄດ້ອະນຸມັດງົບປະມານ 200 ລ້ານກວ່າກີບ ເພື່ອຊ່ວຍເຫຼືອເບື້ອງຕົ້ນໃຫ້ແກ່ປະຊາຊົນ ທີ່ໄດ້ຮັບຜົນກະທົບຈາກໄພນ້ຳຖ້ວມຢູ່ແຂວງຫຼວງພະບາງ ແລະ ຍັງຈະສືບຕໍ່ຊ່ວຍເຫຼືອເພີ່ມຕື່ມ ຂະນະທີ່ຜູ້ປະສົບໄພນ້ຳຖ້ວມ ຍັງຕ້ອງການຄວາມຊ່ວຍເຫຼືອເຂົ້າສານອາຫານແຫ້ງ ແລະ ນ້ຳດື່ມ.
ທ່ານ ປະສົງ ວົງຄຳຈັນ ຫົວໜ້າກົມສັງຄົມສົງເຄາະ ໄດ້ລາຍງານໃຫ້ຮູ້ໃນວັນທີ 24 ສິງຫານີ້ວ່າ: ໃນໄລຍະຜ່ານມາ ໄດ້ເກີດມີຝົນໜັກຕິດຕໍ່ກັນຫຼາຍວັນ ສົ່ງຜົນເຮັດໃຫ້ແມ່ນ້ຳສາຍຕ່າງໆຍຶ່ງຂຶ້ນຖ້ວມບ້ານ ເຮືອນ ແລະ ເນື້ອທີ່ການຜະລິດຂອງປະຊາຊົນເສຍຫາຍເປັນບໍລິເວນກວ້າງ ຢູ່ບັນດາແຂວງພາກເໜືອ ຕາມການສຳຫຼວດເບື້ອງຕົ້ນ ມີແຂວງໄຊຍະບູລີ ຫຼວງພະບາງ ອຸດົມໄຊ ບໍ່ແກ້ວ ຊຽງຂວາງ ຜົ້ງສາລີ ແລະ ໄຊສົມບູນ ໃນນັ້ນ ແຂວງຫຼວງພະບາງ ໄດ້ຮັບຜົນກະທົບໜັກກວ່າໝູ່ (ນ້ຳຖ້ວມ 12 ເມືອງໃນທົ່ວແຂວງ) ເຊິ່ງນ້ຳໄດ້ຖ້ວມຊຸຢ່າງກະທັນຫັນຢູ່ 100 ບ້ານ 3.159 ຄອບຄົວ ເຮືອນຖືກນ້ຳຖ້ວມ 257 ຫຼັງ ເປ່ເພ 60 ກວ່າຫຼັງ ຖືກນ້ຳຊຸໄຫຼໄປ 22 ຫຼັງ ເສັ້ນທາງຫຼວງແຫ່ງຊາດ ເລກທີ 13 ເໜືອຖືກເປ່ເພ 11 ຈຸດ ເສັ້ນທາງຫຼວງທ້ອງຖິ່ນ 57 ເສັ້ນ ຖືກຕັດຂາດ ຂົວ 16 ແຫ່ງ ໃນນັ້ນ ຂົວເບຕົງ 5 ແຫ່ງ ແລະ ຂົວອູ່ 8 ແຫ່ງ ຖືກພັດໄຫຼ ສ່ວນໂຮງຮຽນ 4 ຫຼັງ ແລະ ສຸກສາລາ 2 ຫຼັງ ຊົນລະປະທານ 27 ແຫ່ງ ຄອງເໝືອງ 41 ຈຸດ ຍາວ 733 ແມັດ ຖືກທຳລາຍ ນອກນັ້ນ ຍັງມີເນື້ອທີ່ທຳການຜະລິດເສຍຫາຍ ໂດຍສະເພາະແມ່ນເນື້ອທີ່ນາ 187,44 ເຮັກຕາ ໄຮ່ 9 ເຮັກຕາ ສວນໄມ້ໃຫ້ໝາກ 88 ເຮັກຕາ ພ້ອມນັ້ນ ຍັງມີຜູ້ເສຍຊີວິດຈາກໄພນ້ຳຖ້ວມດັ່ງກ່າວ 2 ຄົນ.
ຕໍ່ບັນຫາດັ່ງກ່າວ ລັດຖະບານກໍ່ຄືກະຊວງແຮງງານ ແລະ ສະຫວັດດີການ-ສັງຄົມ ໄດ້ສະໜອງງົບປະມານ 200 ລ້ານກີບ ຊ່ວຍເຫຼືອເບື້ອງຕົ້ນແກ່ປະຊາຊົນ ທີ່ໄດ້ຮັບຜົນກະທົບຢູ່ແຂວງຫຼວງພະບາງ ເຖິງຢ່າງໃດກໍ່ຕາມ ກະຊວງແຮງງານ ແລະ ສະຫວັດດີການ-ສັງຄົມ ຍັງຈະສືບຕໍ່ໃຫ້ການຊ່ວຍເຫຼືອແກ່ປະຊາຊົນຢູ່ບັນດາແຂວງຕ່າງໆ ທີ່ໄດ້ຮັບຜົນກະທົບຈາກໄພນ້ຳຖ້ວມ ເພື່ອເຮັດໃຫ້ຊີວິດການເປັນຢູ່ຂອງປະຊາຊົນ ທີ່ໄດ້ຮັບຜົນກະທົບດັ່ງກ່າວກັບຄືນສູ່ສະພາບປົກກະຕິ
ຂ່າວຈາກ: ໜັງສືພິມວຽງຈັນໃໝ່
ຕິດຕາມເຮາທາງFacebook ກົດຖືກໃຈເລີຍ!