ຫຼາຍໆຄົນອາດຈະຂັດຫູຂັດຕາເມື່ອເຫັນຄົນສ່ວນຫຼາຍກາຍມາເປັນຄໍເກມໂປເກມອນແບບທີ່ບໍ່ເຄີຍເຫັນມາກ່ອນ ເວັບໄຊດ້ານຂໍ້ມູນການຕະຫຼາດ ແອບແອນນີ ລະບຸວ່າ ມີຄົນທີ່ດາວໂຫຼດເກມນີ້ເທິງເພສະໂຕນໄປແລ້ວຫຼາຍກ່ວາ 100 ລ້ານຄົນທົ່ວໂລກ ແລະ ສາມາດເຮັດເງິນໃຫ້ບໍລິສັດ ໄນແອນຕິກ ໄດ້ເຖິງມື້ລະ 10 ລ້ານຫຼຽນສະຫະລັດ ຫຼື ປະມານ 80 ພັນລ້ານກີບ

ພຽງແຕ່ເປີດໂຕມາໄດ້ປະມານ 1 ເດືອນປາຍ ຕັ້ງແຕ່ວັນທີ 6 ກໍລະກົດ 2016 ທີ່ຜ່ານມາ ໂປເກມອນ ໂກ ກາຍເປັນແອບພິເຄຣຊັນທີ່ມີຜູ້ໃຊ້ງານແທ້ໃນແຕ່ລະມື້ຫຼາຍກ່ວາເຟສບຸກເຖິງສອງເທົ່າ, ສະເພາະຜູ້ຫຼິ້ນໃນສະຫະລັດແລະ ອັງກິດ ມີຈຳນວນ 11 ລ້ານຄົນ ຈາກການສຳຫຼວດໂດຍບໍລິສັດ ຢູກ໋ອບ ໃນຊ່ວງ 5 ອາທິດທຳອິດເທົ່ານັ້ນ

ສຳຄັນກໍ່ຄື ໂປເກມອນ ໂກ ສາມາດດຶງດູດເງິນຈາກກະເປົ໋າຂອງຜູ້ທີ່ຫຼິ້ນໄດ້ປະມານ 268 ລ້ານຫຼຽນສະຫະລັດ ຫຼື ປະມານ 2.1638 ຕື້ລ້ານກີບ

ຈາກຜົນສຳຫຼວດຈາກກຸ່ມໂຕຢ່າງ 5 ໝື່ນຄົນ ໃນອັງກິດ ແລະ ເຢຍລະມັນ ພົບວ່າຜູ້ຫຼິ້ນທຸກ 1 ໃນ 5 ຄົນ ຈະຍອມຈ່າຍເງິນເພື່ອຊື້ອຸປະກອນຕ່າງໆ ໃນເກມເພື່ອສ້າງຄວາມໄດ້ປຽບໃນການໄລ່ນຳມອນເຕີ ໂດຍໃນອັງກິດມີຜູ້ຫຼິ້ນທີ່ຊື້ເຄື່ອງຂອງໃນເກມໃນຊວງ 1 ເດືອນທຳອິດຮອດ 1 ລ້ານຄົນ ແລະ ມີອັດຕາການໃຊ້ເງິນລະຫວ່າງ 80 ເພນນີ ຫຼື ປະມານ 8,510 ກີບ ຮອດ 14.99 ປອນ (ປະມານ 155,020 ກີບ) ໃນຂະນະທີ່ການຈ່າຍເງິນຊື້ອຸບປະກອນເສີມຂອງຄໍໂປເກມອນອາເມລິກາຢູ່ປະມານ 29% ແລະ ຄໍເກມເຢຍລະມັນ 20% ຈຳນວນນີ້ 9% ຫລື ຄິດເປັນຊາວເຢຍລະມັນ 1.42 ແສນຄົນ ຍອມຈ່າຍເງິນໄປຫູາຍກ່ວາ 100 ຢູໂລ ຫຼື ປະມານ 897,000 ກີບ

ການວິໃຈຂອງເຮົາສະແດງຜົນພຽງແຕ່ 5 ອາທິດທຳອິດໃນ 3 ປະເທດເທົ່ານັ້ນ ກໍ່ມີເງິນເຖິງ 1 ໃນ 4 ຂອງຫຼັກພັນລ້ານຫຼຽນສະຫະລັດ ປະຈຸບັນເກມຂະຫຍາຍໄປເຖິງ 72 ປະເທດທົ່ວໂລກ ແລະ ບໍ່ໜ້າແປກທີ່ເກມໂປເກມອນ ໂກ ຈະເປັນເກມພັນລ້ານແທ້ໆ ສະຕີເຟນ ຮາຣ໌ມສະຕັນ ຫົວໜ້າຜູ້ເຮັດລາຍງານຂອງ ຢູກ໋ອບ ກ່າວກັບໄຟແນນເຊຍ ໄທມສ໌

ສຳລັບໂຕເລກດັ່ງກ່າວຍັງເປັນລາຍໄດ້ພຽງດ້ານດຽວຂອງບໍລິສັດເທົ່ານັ້ນ ຍັງບໍ່ໄດ້ນັບລວມມູນຄ່າຮຸ້ນທີ່ເພີ່ມຂຶ້ນຢ່າງໄວວາ ແລະ ເຮັດໃຫ້ບໍລິສັດ ນິນເທນໂດ 1 ໃນຜູ້ມີສ່ວນຮ່ວມຫຼັກຂອງເກມນີ້ມີມູນຄ່າການຕະຫຼາດແຊງໜ້າກຸ່ມບໍລິສັດໃຫຍ່ຂອງຍີ່ປຸ່ນແບບ ໂຊນີ້ ຄອບ ປະມານ 3 ແສນລ້ານເຢນ ຫຼື ປະມານ 2.7293 ຕື້ກີບ ໄປຢູ່ທີ່ 4.5 ລ້ານເຢນ ຫຼື ປະມານ 340,400,000ກີບ ໃນວັນທີ 18 ກໍລະກົດທີ່ຜ່ານມາ

ໃນອານາຄົດບໍລິສັດທີ່ກ່ຽວຂ້ອງຍັງມີແຜນທີ່ຈະເປີດໂຕຟີເຈີໃໝ່ໆ ເພື່ອດຶງດູດຄວາມຕໍ່ເນື່ອງຂອງຄໍເກມ ເຊັ່ນ ການແລກປ່ຽນ-ຊື້ຂາຍ ໂປເກມອນ ໂດຍສະເພາະເມື່ອເບິ່ງຈາກຈຸດເລີ່ມຕົ້ນຂອງໂປເກມອນ ທີ່ມາຈາກກາດເກມຂອງເດັກນ້ອຍໄປສູ່ເກມບອຍ ກາຕູນ ຈົນເຖິງທຸລະກິດຫຼາຍຂະແໜງອື່ນໆ

ເຖິງຢາງໃດກໍ່ຕາມ ປະຈຸບັນເລີ່ມມີກະແສການຫ້າມ ຫຼື ຂໍຄວາມຮ່ວມມືຈາກຄົນມັກເກມບໍ່ໃຫ້ຫຼິ້ນໃນພື້ນທີ່ອ່ອນໄຫວຂອງຫຼາຍປະເທດ ເຊັ່ນ ຄຸກກວດສເລງ ໃນກຳປູເຈຍ ລວມເຖິງການຍື່ນເລື່ອງໄປສູ່ຜູ້ພັດທະນາເກມໃຫ້ຖອນລາຍຊື່ສະຖານທີ່ມີຄວາມຊ່ຽງອອກຈາກການຈັບໂປເກມອນ ເພາະມີລາຍງານອຸບັດຕິເຫດ ແລະ ບັນຫາຕ່າງໆຈຳນວນຫຼາຍ ແລະ ຄໍເກມໃນສິບປະເທດເຂດເອເຊຍເຊັ່ນ ໄທ, ລາວ, ມຽນມາ, ກຳປູເຈຍ, ປາປົວນິວກິນີ, ຟິຈີ ແລະປາວໂລ ຍອມຈ່າຍເງິນໃຫ້ກັບເກມນີ້ຄືກັບປະເທດທາງຕາເວັນຕົກ ສ່ວນຕະຫຼາດໃຫຍ່ແບບຈີນ ແລະ ອິນເດຍ ຍັງບໍ່ຊັດເຈນວ່າຈະເປີດຕ້ອນຮັບເກມພັນລ້ານນີ້ ຫຼື ບໍ່

ຂໍຂອບໃຈຂໍ້ມູນຈາກ: Posttoday.com