ຕາມການສຳຫຼວດໃນການຈັດຕັ້ງປະຕິບັດ ກ່ຽວກັບການປ້ອງກັນ ແລະ ຕອບ ໂຕ້ພະຍາດໄຂ້ຍຸງລາຍ
ຢູ່ໃນທົ່ວແຂວງອຸດົມໄຊ ໃນໄລຍະ 6 ເດືອນຕົ້ນປີ ເຫັນວ່າຜູ້ທີ່ຕິດເຊື້ອໄຂ້ຍຸງລາຍມີທັງໝົດ 33 ກໍລະນີ
ຫຼາຍກວ່າໝູ່ແມ່ນເມືອງໄຊ ມີ 29 ກໍລະນີ, ສ່ວນວ່າ ເມືອງຮຸນ, ເມືອງຫຼາ, ນາໝໍ້ ແລະ ເມືອງແບງ
ແມ່ນມີເມືອງລະ 1 ກໍລະນີ.
ນັບຕັ້ງແຕ່ຕົ້ນປີທີ່ຜ່ານມາ ທາງຄະນະຮັບຜິດຊອບ ກໍຄືຄະນະກຳມະການ ແລະ ກອງເລຂາຄວບຄຸມ
ພະຍາດຕິດຕໍ່ຂັ້ນແຂວງ ແລະ ເມືອງ ພ້ອມທັງພາກສ່ວນທີ່ກ່ຽວຂ້ອງ ກໍໄດ້ມີການຈັດຕັ້ງປະຕິບັດ
ໃນການປ້ອງກັນ ແລະ ຕອບໂຕ້ພະຍາດດັ່ງກ່າວ ເປັນຕົ້ນແມ່ນການປັບປຸງຄະນະຮັບຜິດຊອບ ແລະ
ທິມງານຕອບໂຕ້ໄວຂັ້ນແຂວງ – ເມືອງ, ຈັດກອງປະຊຸມຂໍທິດຊີ້ນຳຈາກຂັ້ນເທິງ, ຈັດກອງປະຊຸມປຶກ
ສາຫາລືກັບຂັ້ນເມືອງ ແລະ ບ້ານເພື່ອຊອກຫາແນວທາງໃນການແກ້ໄຂ.
ນອກນັ້ນກໍໄດ້ລົງປຸກລະດົມເຜີຍແຜ່ໃນການປ້ອງກັນ ແລະ ຕອບໂຕ້ພະຍາດໄຂ້ຍຸງລາຍໃຫ້ກັບນັກ
ຮຽນ, ນັກສຶກສາ, ພະນັກງານນັກຮົບ ແລະ ພໍ່ແມ່ປະຊາຊົນ ຢູ່ໃນທົ່ວເທດສະບານແຂວງ ພ້ອມທັງ
ຈັດໃຫ້ມີຂະບວນການທຳລາຍແຫຼ່ງເພາະພັນຂອງຍຸງລາຍ ແລະ ພົ່ນຢາຂ້າຢູ່ຕາມແຕ່ລະບ້ານຕື່ມອີກ.
ສິ່ງສຳຄັນໃນການປ້ອງກັນ ແລະ ຄວບຄຸມພະຍາດດັ່ງກ່າວນີ້ ທຸກຄົນຕ້ອງເອົາໃຈໃສ່ໃນການຮັກ
ສາຄວາມສະອາດ ພາຍໃນຂອບເຂດຮັບຜິດຊອບຂອງຕົນ ຢ່າງເຂັ້ມງວດ ແລະ ເປັນປະຈຳ ໂດຍສະ
ເພາະແມ່ນບ່ອນທີ່ມີນ້ຳຂັງເຊັ່ນ: ຫຼັງຕູ້ເຢັນ, ໂຖດອກໄມ້, ກະໂປະ, ກະປ໋ອງ ແລະ ພາຊະນະໃສ່ນ້ຳອື່ນໆ,
ຖ້າຫາກອຸນຫະພູມພາຍໃນຮ່າງກາຍສູງຜິດປົກກະຕິ ແມ່ນໃຫ້ໄປຫາແພດໝໍໂດຍດ່ວນ.
ແຫຼ່ງຂ່າວ: ໜັງສືພິມປະຊາຊົນ