ສຳນັກຂ່າວສານປະເທດລາວ (ຂປລ) ຫັນມາໃຊ້ສື່ສັງຄົມອອນລາຍເຂົ້າ ໃນການລາຍງານຂ່າວໃຫ້ຫລາຍຂຶ້ນ ເພື່ອສົ່ງຂໍ້ມູນຂ່າວສານຕ່າງໆ ອອກສູ່ສັງຄົມຢ່າງວ່ອງໄວ, ທັນເຫດການ, ທັງສາມາດເຂົ້າເຖິງຜູ້ອ່ານ ຜູ້ຊົມທັງພາຍໃນ ແລະ ຕ່າງປະເທດ ໄດ້ຢ່າງສະດວກສະບາຍ.
ທ່ານ ສູນທອນ ຄັນທະວົງ ຜູ້ອຳນວຍການຂ່າວສານປະເທດລາວ ໃຫ້ສຳພາດເນື່ອງໃນໂອກາດ ວັນສ້າງຕັ້ງສື່ມວນຊົນ, ວັນທີ 13 ສິງຫາ ຄົບຮອບ 66 ປີ ນີ້ວ່າ: ປັດຈຸບັນ ຍອດການພິມຈຳໜ່າຍໜັງສືພິມ ກໍຄືວາລະສານຕ່າງໆ ທັງຢູ່ພາຍໃນປະເທດເຮົາ ແລະ ຕ່າງປະເທດ ໄດ້ຫລຸດລົງຢ່າງຕໍ່ເນື່ອງ. ສະເພາະສຳນັກ ຂ່າວສານປະເທດລາວ ຍອດການພິມຈຳໜ່າຍໜັງສືພິມ ໄດ້ຫລຸດລົງຈາກ 5.000 ສະບັບຕໍ່ວັນ ໃນປີ 2000 ປັດຈຸບັນ ຍັງເຫລືອພຽງ 1.000 ກ່ວາສະບັບຕໍ່ວັນ. ປັດຈຸບັນ, ສຳນັກຂ່າວສານປະເທດລາວ ນອກຈາກການພິມຈຳໜ່າຍ ໜັງສືພິມແລ້ວ ຍັງໄດ້ເນັ້ນໃສ່ການນຳໃຊ້ ສື່ສັງຄົມອອນລາຍ ເຂົ້າໃນການລາຍງານຂ່າວ ໃຫ້ຫລາຍຂຶ້ນ ເປັນຕົ້ນໄດ້ປັບປຸງເວບໄຊ ຂອງສຳນັກຂ່າວສານ ໃຫ້ມີຄວາມຫລາກຫລາຍ ສູ່ຄຸນນະພາບໃໝ່, ຜະລິດຄິບວີດີໂອຂ່າວລົງ wave site ແລະ ການສ້າງເພຈຂອງ ສຳນັກຂ່າວສານ ທາງເຟສບຸກ ເຮັດໃຫ້ການລາຍງານຂ່າວຕ່າງໆ ມີຄວາມສະດວກວ່ອງໄວຫລາຍຂຶ້ນ. ໂດຍສະເລ່ຍໃນແຕ່ລະວັນ ມີຜູ້ເຂົ້າຊົມ website ຂອງສຳນັກຂ່າວສານປະເທດລາວ ປະມານ 7.000–8.000 ຄົນຕໍ່ວັນ.
ທ່ານ ສູນທອນ ຄັນທະວົງ ໄດ້ໃຫ້ຮູ້ຕື່ມວ່າ: ປັດຈຸບັນ ສຳນັກຂ່າວສານປະເທດລາວ ໄດ້ຮັບການປັບປຸງໃຫ້ດີຂຶ້ນຢ່າງຕໍ່ເນື່ອງໃນທຸກດ້ານ ກາຍເປັນສຳນັກຂ່າວສານ ທີ່ມີຄວາມໄວ້ເນື້ອເຊື່ອໃຈ ຈາກພັກ-ລັດ ແລະ ສັງຄົມ ເຊິ່ງສະແດງອອກ ໃນການເຄື່ອນໄຫວທັງພາຍໃນ ແລະ ຕ່າງປະເທດຂອງບັນດາການນຳພັກ-ລັດ, ການຈັດກອງປະຊຸມ ຫລື ເຫດການສຳຄັນຕ່າງໆ ພາຍໃນປະເທດສຳນັກຂ່າວສານ ຖືເປັນສຳນັກຂ່າວຫລັກ ທີ່ໄດ້ປະກອບສ່ວນຮັບໃຊ້ເຫດການສຳຄັນດັ່ງກ່າວ.
ປັດຈຸບັນ, ສຳນັກຂ່າວສານປະເທດລາວ ໄດ້ຮ່ວມມືແລກປ່ຽນຂໍ້ມູນຂ່າວສານ ກັບສຳນັກຂ່າວຕ່າງປະເທດ 6 ແຫ່ງ ຄື: ສຳນັກຂ່າວສານ VNA ຂອງຫວຽດນາມ, ສຳນັກຂ່າວສານຊິນຮວາຂອງຈີນ, ສຳນັກຂ່າວສານກຽວໂດ ຂອງຍີ່ປຸ່ນ, ສຳນັກຂ່າວສານແປງຊາລາຕິນາຂອງກູບາ, ສຳນັກຂ່າວ CRI ຂອງຈີນ ແລະ ເປັນຄູ່ຮ່ວມສັນຍາ ກັບສຳນັກໜັງສືພິມໄຊນາເດລີຂອງຈີນ ເຮັດໃຫ້ການເຜີຍແຜ່ຂໍ້ມູນຂ່າວ ສານມີຄວາມຫລາກຫລາຍ ແລະ ກວ້າງໄກກວ່າເມື່ອກ່ອນ.
ແຫລ່ງຂ່າວ:
ຕິດຕາມເຮາທາງFacebook ກົດຖືກໃຈເລີຍ!