ວັນທີ 5 ສິງຫາ ປີ 2003 ຫຼືມື້ນີ້ເມື່ອ 13 ປີທີ່ແລ້ວ ເປັນມື້ວາງຈຳໜ່າຍຂອງເກມ Silent Hill 3 ເທິງເຄື່ອງ PS2 ທີ່ທະວີບອາເມຣິກາເໜືອ. ໂດຍພາກນີ້ເປັນພາກຕໍ່ທີ່ກົງກັນກັບ Silent Hill ພາກທຳອິດທີ່ເຄີຍລົງເທິງເຄື່ອງ PS1 ເມື່ອປີ 1999 ແລະທາງ Konami ຫາກ່ອນມີການຣີມາສເຕີ້ລົງເຄື່ອງ PS3 ແລະ Xbox 360 ໄປເມື່ອປີ 2012 ທີ່ຜ່ານມາ, ເຊິ່ງຈາກກະແສຄວາມນິຍົມຂອງແຟນໆທີ່ມີຕໍ່ພາກນີ້ ເຮັດໃຫ້ວົງການຮູບເງົາໄດ້ຈັບເອົາພລ໋ອດເລື່ຶງຂອງ Silent Hill 3 ໄປເຮັດເປັນຮູບເງົາສາຍໃນປີ 2012 ໂດຍໃຊ້ຊື່ວ່າ Silent Hill: Revelation 3D.
ດ້ານເນື້ອເລື່ອງຂອງ Silent Hill 3 ຈະເປັນເຫດການຫຼັງຈາກພາກທຳອິດປະມານ 17 ປີ, ເມື່ອ ແຮຣ໌ຣີ້ ເມສັນ ໄດ້ກຳຈັດເທບພະເຈົ້າຜູ້ຄອງລັດທິທີ່ເບິ່ງແຍງເມືອງ Silent Hill ລົງໄດ້ສຳເລັດ ແລະໄດ້ຮັບມອບເດັກນ້ອຍເພດຍິງຄົນໜຶ່ງກັບໄປລ້ຽງ ໂດຍແຮຣ໌ຣີ້ໄດ້ຕັ້ງຊື່ເດັກຄົນດັ່ງກ່າວວ່າ ຮີດເທີ້ ເຊິ່ງສອງພໍ່ລູກໄດ້ໃຊ້ຊີວິດຢູ່ນຳກັນໃນເມືອງພອຣ໌ດແລນ ປະເທດສະຫະລັດອາເມຣິກາ ຈົນມາຮອດຊ່ວງຮີດເທີ້ເຂົ້າສູ່ໄວລຸ້ນ ແລະແລ້ວມື້ໜຶ່ງນາງກໍໄດ້ພົບກັບຄົນຈາກລັດທິເມືອງ Silent Hill ທີ່ຕ້ອງການນຳໂຕນາງໄປໃຫ້ກຳເນີດເທບພະເຈົ້າອົງໃໝ່ຂອງພວກເຂົາ ຈົນນຳໄປສູ່ເລື່ອງລາວທີ່ຮີດເທີ້ຕ້ອງໜີເອົາໂຕລອດຈາກກຸ່ມລັດທິຊົ່ວຮ້າຍແລະຫາທາງຢຸດແຜນຮ້າຍນີ້ໃຫ້ໄດ້.
ອົງປະກອບໂດຍທົ່ວໄປຂອງຊີຣີ Silent Hill ພາກນີ້ຈະໃຫ້ຄວາມສຳຄັນກັບ 3 ສິ່ງນັ້ນກໍຄື: ລະບົບການຕໍ່ສູ້, ລະບົບການປະຈົນໄພ ແລະການໄຂປິດສະໜາຕ່າງໆ. ໂດຍພາກ 3 ນີ້ໂຕລະຄອນຮີດເທີ້ຈະສາມາດໃຊ້ອາວຸດໄລຍະໃກ້ໃນການບລັອກການໂຈມຕີຂອງສັດຕູຫຼືສະເຕັບອອກຂ້າງເພື່ອຫຼີກລຽງການໂຈມຕີໄດ້, ໃນຂະນະດຽວກັນ ໄຟສາຍກັບວິທະຍຸທີ່ເອົາໄວ້ໃຊ້ສ່ອງທາງໃນຄວາມມືດແລະບອກໄລຍະຫ່າງລະຫວ່າງໂຕຮີດເທີ້ກັບສັດຕູກໍຍັງຄົງຢູ່ຄືເກົ່າ. ນອກຈາກນີ້ຕອນເລີ່ມເກມ ໂຕເກມຈະມີໃຫ້ເຮົາເລືອກລະດັບຄວາມຍາກຂອງປິດສະໜາໃນເກມ, ໂດຍລະດັບຄວາມຍາກຂອງປິດສະໜາຈະແຍກຈາກກັນກັບຄວາມຍາກຂອງໂຕເກມ ເຊິ່ງຖ້າເລືອກລະດັບຄວາມຍາກຂອງປິດສະໜາໄວ້ທີ່ “Medium” ບັນດາປິດສະໜາຕ່າງໆ ກໍຈະໃຊ້ວິທີຄຶດແກ້ແບບບໍ່ຍາກຫຼາຍ ແຕ່ຖ້າຫາກເລືອກເປັນ “Hard” ປິດສະໜາທຸກຢ່າງໃນເກມນັ້ນແທບຈະຕ້ອງໄດ້ທົບທວນຄຶດກັນໃໝ່ເຖິງ 3-4 ຮອບຈຶ່ງຈະຜ່ານໄດ້.
Fact ເລັກນ້ອຍກ່ຽວກັບເກມ Silent Hill 3
- Silent Hill 3 ໄດ້ຮັບຄຳຍ້ອງຈາກຄົນຫຼິ້ນແລະນັກວິຈານຫຼາກຫຼາຍ ໃນເລື່ອງຂອງບັນຍາກາດໃນເກມທີ່ເຮັດມາໄດ້ມາດຕະຖານຂອງເກມແນວແອັກຊັ່ນປົນຫຼອນທົ່ວໄປ ລວມທັງກຣາບຟິກທີ່ດີກວ່າພາກ 2 ຫຼາຍ, ໃນຂະນະດຽວກັນກໍມີຄຳຕິຍ້ອງດ້ານລົບຂອງເກມນີ້ພໍສົມຄວນ ໂດຍບາງສຳນັກຣີວິວໃຫ້ເຫດຜົນວ່າ ເຖິງລະບົບການຕໍ່ສູ້ໃນພາກນີ້ຈະເຮັດມາໄດ້ຫຼາກຫຼາຍຂຶ້ນເຊັ່ນ: ການບລັອກ, ການສະເຕັບຫຼົບອອກຂ້າງ ແຕ່ນັ້ນບໍ່ໄດ້ສະແດງໃຫ້ເຫັນເຖິງນະວັດຕະກຳໃໝ່ໆຂອງລະບົບເກມເລີຍ ອາດເປັນເພາະວ່າເກມແອັກຊັ່ນອື່ນໆ ກໍເຮັດແບບນີ້ໄດ້ມາດົນແລ້ວ ແລະກໍມີແຟນໆບາງສ່ວນອ້າງວ່າບໍ່ຄວນໃຫ້ໂຕເອກເຮັດຫຍັງໄດ້ຫຼາກຫຼາຍຈົນເກີນໄປ ເນື່ອງຈາກຈະເຮັດໃຫ້ເກມຖືກຫຼຸດຄວາມຫຼອນລົງ ຈຶ່ງບໍ່ໜ້າຈະເປັນເຫດຜົນທີ່ຟັງຂຶ້ນ, ອີກທັງໃນຍຸກນັ້ນ ວົງການເກມກຳລັງເຂົ້າສູ່ຊ່ວງປ່ຽນຜ່ານ ທີ່ຫຼາຍໆເກມພະຍາຍາມເຮັດເກມທີ່ໃຫ້ໂຕເອກມີອິດສະຫຼະໃນການອອກແອັກຊັ່ນຕ່າງໆຫຼາຍຂຶ້ນ ເພື່ອໃຫ້ຮູ້ສຶກແລະສຳຜັດໄດ້ວ່າຄືກັບຄົນແທ້ໆນັ້ນເອງ.
- ຊ່ວງທຳອິດຂອງເກມໂຕລະຄອນຮີດເທີ້ຈະຢູ່ຫ້າງຊ໋ອບປິ້ງມໍ ຫາກສຳຫຼວດບັນດາຮ້ານຄ້າໃນສູນການຄ້ານັ້ນດີໆ ຈະພົບວ່າມີສອງຮ້ານທີ່ຊື່ວ່າ: Boutigue Marguerite ແລະ Helen’s Bakery. ເຊິ່ງຊື່ Marguerite ແລະ Helen ຕ່າງກໍເປັນຊື່ທີ່ທີມພັດທະນານຳມາຈາກບົດລະຄອນໂສກຄະນາດຕະກຳເລື່ອງ “Faust” ປະພັນໂດຍ ໂຢຮັນ ໂວລກັງ ສິລະປິນຊາວເຢຍລະມັນ ໂດຍບົດປະພັນເລື່ອງນີ້ຈະເປັນເລື່ອງລາວຂອງຊາຍທີ່ຂາຍວິນຍານໃຫ້ກັບຜີສາດນາມວ່າ: ເມຟິສໂຕຟີລີສ (Mephistopheles) ເພື່ອແລກກັບອົງຄວາມຮູ້ອັນລ້ຳຄ່າ ໃນປັດຈຸບັນ ບົດປະພັນເລື່ອງນີ້ໄດ້ຮັບການດັດແປງເປັນວັນນະກຳໃນຂະແໜງອື່ນໆ ເປັນຈຳນວນຫຼາຍ.
- 1 ໃນຮູບເງົາທີ່ເປັນແຮງບັນດານໃຈໃຫ້ກັບເກມ Silent Hill 3 ກໍຄືເລື່ອງ Jacob’s Ladder ທີ່ສາຍເມື່ອປີ 1990 ໂດຍ 1 ໃນຊື່ສະຖານີລົດໄຟໃຕ້ດິນທີ່ປະກົດໃນເກມນີ້ຈະມີຊື່ວ່າ Bergen Street Station ເຊິ່ງກໍເປັນຊື່ດຽວກັບທີ່ໂຕລະຄອນເຈຄ໋ອບໃນຮູບເງົາປະກົດໂຕໃນສະຖານີດັ່ງກ່າວໃນຕອນເລີ່ມເລື່ອງນຳ.
- ຄລໍເດຍ ວູບ ສາວໂຕຮ້າຍຂອງພາກນີ້ເປັນໂຕລະຄອນທີ່ທີມພັດທະນາບອກວ່າອອກແບບຕາມຄອນເຊັບໄດ້ຍາກທີ່ສຸດ ເຊິ່ງໃນຊ່ວງທຳອິດຂອງການສະເກັດໂຕຄລໍເດຍ ທີມອອກແບບຢາກໃຫ້ນາງແຕ່ງໂຕຄືຜູ້ຍິງທີ່ຄືໂຕແທນຂອງເທບບາງອົງ ຈົນໄປໆ ມາໆ ກໍປ່ຽນພາບລັກໃຫ້ນາງເບິ່ງເປັນຄົນອັນຕະລາຍແລະບໍ່ໜ້າເຂົ້າໃກ້ຫຼາຍຂຶ້ນ ໃນທີ່ສຸດທີມພັດທະນາເລີຍຕັດສິນໃຈຍຶດເອົາ ຈູລຽນ ມົວ (Julianne Moore) ດາລາສາວຮໍລີວູດມາເປັນຕົ້ນແບບ ແລ້ວປັບໃຫ້ນາງມີຄິ້ວທີ່ບາງລົງ ໂດຍແຕ່ກ່ອນໂຕລະຄອນຄລໍເດຍຖືກຕັ້ງຊື່ວ່າ “ຄຣິສຕີ້” ແຕ່ທີມອອກແບບໃຫ້ຄວາມເຫັນວ່າຊື່ນີ້ຟັງເບິ່ງແລ້ວໜ້າຮັກເກີນໄປ ສຸດທ້າຍກໍປ່ຽນຊື່ເປັນຄລໍເດຍ ທີ່ໄດ້ແຮງບັນດານໃຈມາຈາກຊື່ ຄລໍເດຍ ຄາຣ໌ດິເນວ (Claudia Cardinale) ນັກສະແດງຍິງທີ່ເຄີຍໂດ່ງດັງໃນຮູບເງົາເລື່ອງ The Pink Panther.
ສຳລັບທ່ານໃດທີ່ຮັກໃນການອ່ານຂ່າວໄອທີ ແລະ ເກມ ສາມາດຕິດຕາມໄດ້ທີ່ນີ້ ກົດຖືກໃຈເລີຍ!
ທີ່ມາ:online station