ຄຳສຳນວນກ່ຽວກັບພຶດຕິກຳ ຫຼື ກິລິຍາອາການ ກ່ຽວກັບການກິນຂອງຄົນເຮົາ ແປວ່າ ກິນຈົນອີ່ມ, ກິນຈົນພໍ. ສຳນວນນີ້ມີຄຳກິລິຍາ ກິນ ເປັນຄຳຫຼັກແລ້ວເວົ້າຊ້ຳ ກິນ…ກິນ… ຈຶ່ງກາຍເປັນໂຄງສ້າງສຳນວນລາວທີ່ມີສຽງເກາະກ່າຍ ຟັງແລ້ວຄ່ອງຫູດີ. ລັກສະນະເດັ່ນຂອງສຳນວນແມ່ນການສຳຜັດ, ເປັນຈັງຫວະ, ປຽບທຽບສະແດງຄວາມເປັນໄນເລິກເຊິ່ງ, ພາໃຫ້ເກີດຄວາມຮູ້ສຶກ ແລະ ບອກເຖິງຄວາມສຳພັນກັນໄດ້ດີ. ໃນຊີວິດປະຈຳວັນ, ຄົນ ລາວ ຫຼື ຊົນເຜົ່າຕະກຸນໄຕມັກໃຊ້ສຳນວນກ່ຽວກັບກິລິຍາອາການຫຼາຍ.
ຕົວຢ່າງ: – ພວກແຂກດີໃຈເພາະໄດ້ກິນອີ່ມກິນເຕັມຈາກການຕ້ອນຮັບ
– ໃຫ້ພາກັນກິນອີ່ມກິນເຕັມເດີ, ຢ່າເກງໃຈ!
– ເມື່ອກິນອີ່ມກິນເຕັມແລ້ວ ກໍພາກັນອອກເດີນທາງ!
– ກິນອີ່ມກິນເຕັມແລ້ວ ກໍພາກັນພັກຜ່ອນເອົາແຮງ.
ໃນທາງພາສາສາດ, ກິນອີ່ມກິນເຕັມ ຖືເປັນໜ່ວຍຄຳໜຶ່ງມີສີ່ພະຍາງສຽງເກາະກ່າຍກັນ. ຖ້າແຍກອອກເປັນແຕ່ລະໜ່ວຍຄຳເພື່ອອະທິບາຍ ກໍ່ເຮັດໄດ້ ເພາະຄວາມໝາຍຂອງທຸກຄຳຍັງກ່ຽວພັນກັນຢູ່.
ທີ່ມາ: ໜັງສືພິມວຽງຈັນໃໝ່