ວັນທີ 28 ກໍລະກົດ ປີ 2006 ຫຼືມື້ນີ້ເມື່ອ 10 ປີທີ່ແລ້ວ ເປັນມື້ວາງຈຳໜ່າຍຂອງເກມ Dirge of Cerberus: Final Fantasy VII ເທິງເຄື່ອງ PS2 ທີ່ກຸ່ມປະເທດສະຫະລາດອານາຈັກ. ໂດຍເກມນີ້ແມ່ນເປັນພາກເສີມທີ່ເປັນເຫດການໃນຊ່ວງ 3 ປີຫຼັງຈາກ Final Fantasy VII ພາກຫຼັກ ແລະຍັງເປັນການທົດລອງເຮັດເກມແນວແອັກຊັ່ນຊູດຕິ້ງກັບຊີຣີ Final Fantasy ເປັນຄັ້ງທຳອິດ ເຊິ່ງທີມງານຕ້ອງການຈະນຳສະເໜີສິ່ງໃໝ່ໆ ນອກເໜືອຈາກແນວ RPG ທີ່ເຄີຍເຮັດມາຕະຫຼອດ ເພືີອດຶງດູດແຟນໆ ໜ້າໃໝ່ໃຫ້ມາສົນໃຈຊີຣີ Final Fantasy ເພີ່ມນຳ. 

ສຳລັບເນື້ອເລື່ອງຂອງ Dirge of Cerberus ຈະເລົ່າເຖິງວິນເຊນ ວາເລນທາຍ ທີ່ໄດ້ຮັບບົດເປັນໂຕລະຄອນຫຼັກຂອງພາກນີ້ ທີ່ຕ້ອງປະເຊີນໜ້າກັບວາຍຮ້າຍທີ່ເປັນສະມາຊິກຂອງອົງກອນທີ່ເອີ້ນໂຕເອງວ່າ Deepground ທີ່ມີແຜນໃນການໃຊ້ອະສູນທີ່ມີຊື່ວ່າ Omega ເພື່ອທຳລາຍທຸກໆສິ່ງທີ່ມີຊີວິດເທິງໂລກນີ້ ດ້ວຍເຫດນີ້ຈຶ່ງເຮັດໃຫ້ລາວຕ້ອງຮ່ວມມືກັບໝູ່ຈາກ Final Fantasy VII ພາກຫຼັກອີກບາງສ່ວນເພື່ອລົ້ມລ້າງແຜນການຂອງສັດຕູໃຫ້ໄດ້. 

ລະບົບເກມຫຼັກໆຂອງ Dirge of Cerberus ແມ່ນຈະເປັນແນວແອັກຊັ່ນຊູດຕິ້ງມຸມມອງບຸກຄົນທີ 3 ເຊິ່ງມຸມກ້ອງແມ່ນຈະແລ່ນຕາມຫຼັງວິນເຊນຕະຫຼອດເວລາ ໂດຍວິນເຊນຈະສາມາດໃສ່ອຸປະກອນ 3 ຊະນິດໄວ້ກັບໂຕໄດ້ພ້ອມກັນ ນັ້ນກໍຄື: ອາວຸດປືນ, ຊຸດເກາະ ແລະເຄື່ອງປະດັບ. ເຊິ່ງໃນສ່ວນຂອງອາວຸດກໍຈະແບ່ງເປັນປືນພົກ, ປືນໄຣເຟີນ ແລະປືນກົນ. ໃນລະຫວ່າງເກມກໍຈະມີປືນໃໝ່ໆ ໃຫ້ເກັບ ໃນຂະນະດຽວກັນ ປືນບາງອັນທີ່ມີນ້ຳໜັກຫຼາຍໆກໍຈະສົ່ງຜົນຕໍ່ຄວາມໄວໃນການເຄື່ອນໄຫວຂອງວິນເຊນນຳ. ນອກຈາກນີ້, ລະບົບລິມິດເບຣກກໍຈະມີໃຫ້ໃຊ້ຢູ່ 2 ຊະນິດຄື: ແບບແປງຮ່າງເປັນ Galian Beast ທີ່ຈະເພີ່ມຄວາມໄວແລະຄວາມແຂງແກ່ງເປັນເວລາ 30 ວິນາທີ ແລະ ແບບແປງຮ່າງເປັນ Chaos ທີ່ມີພະລັງໂຈມຕີສູງທີ່ສຸດ ແຕ່ຮ່າງນີ້ຈະແປງໄດ້ສະເພາະດ່ານສຸດທ້າຍເທົ່ານັ້ນ.

Fact ເລັກນ້ອຍກ່ຽວກັບເກມ Dirge of Cerberus: Final Fantasy VII

• ເກມນີ້ສາມາດເຮັດຍອດຂາຍທົ່ວໂລກໄປໄດ້ 1.243 ລ້ານຊຸດ ໂດຍເປັນອີກ 1 ເກມທີ່ໄດ້ກາປະທັບ Gold Category ຈາກທາງ Sony ໃນຖານະທີ່ເປັນເກມທີ່ເຮັດຍອດຂາຍໄດ້ດີຫຼາຍເທິງເຄື່ອງ PS2 ໃນປີ 2006

• ກະແສຜູ້ຫຼິ້ນໃນຕ່າງປະເທດຈຳນວນຫຼາຍແນມວ່າໂຕເກມມີເນື້ອເລື່ອງທີ່ຂ້ອນຂ້າງເປັນຕາເບື່ອເກີນໄປ ອີກທັງຄວາມສະຫຼາດຂອງ AI ສັດຕູກໍບໍ່ຄ່ອຍໜ້າປະທັບໃຈ ໂດຍສິ່ງທີ່ໜັກທີ່ສຸດກໍຄືລະບົບການບັງຄັບຄວບຄຸມໂຕລະຄອນທີ່ເຮັດອອກມາໄດ້ຫຍຸ້ງຍາກແລະບໍ່ເປັນມິດກັບຜູ້ຫຼິ້ນເລີຍ ເມື່ອທຽບກັບເກມແອັກຊັ່ນຊູດຕິ້ງອື່ນໆ ທີ່ອອກມາກ່ອນໜ້ານີ້ແບບ Resident Evil 4 ເຊິ່ງນັກວິເຄາະສາຍເກມຄອນໂຊລຈຳນວນຫຼາຍໄດ້ໃຫ້ຄວາມເຫັນວ່າ ຫາກເກມນີ້ບໍ່ອາໄສອຳນາດຂອງ Final Fantasy VII ມາເປັນອົງປະກອບໃນເກມ ຍອດຂາຍກໍອາດຈະບໍ່ອອກມາດີແບບນີ້ກະເປັນໄດ້. 

• ເພງຮ້ອງໃນເກມນີ້ມີ 2 ເພງຄື: Longing ແລະ Redemption ທີ່ໄດ້ຮັບກຽດຈາກທ່ານຄາມຸອິ ກາຄຸໂຕະ (ຫຼືທີ່ຮູ້ຈັກກັນໃນຊື່ວົງການບັນເທີງວ່າ Gackt) ມາເປັນຜູ້ແຕ່ງແລະຮ້ອງ ໂດຍສະເພາະເພງ Redemption ທີ່ທາງທີມງານໄດ້ວາງແຜນໄວ້ຕັ້ງແຕ່ທຳອິດແລ້ວວ່າຈະໃຫ້ເພງເປັນສະຕາຍ ບັລລາດ ແຕ່ທ່ານ Gackt ໄດ້ຕັດສິນໃຈປ່ຽນເປັນເພງຣ໋ອກແທນ ແລະທີມງານກໍເຫັນດີກັບໄອເດຍນີ້ທີ່ຈະປ່ຽນໃຫ້ເປັນແນວທີ່ເປັນຕາຕື່ນເຕັ້ນແລະມ່ວນກວ່າເກົ່າ. 

• ນອກຈາກໂຕເກມເວີຊັ່ນນີ້ແລ້ວ ທາງ Square Enix ກໍຍັງໄດ້ມີການພັດທະນາພາກຕໍ່ທີ່ມີຊື່ວ່າ Dirge of Cerberus Lost Episode: Final Fantasy VII ໂດຍໄດ້ລົງໃຫ້ກັບແພລັດຟອຣ໌ມໂທລະສັບມືຖືເທົ່ານັ້ນ ເຊິ່ງກໍແນ່ນອນວ່າໂຕເກມມີໃຫ້ຫຼິ້ນສະເພາະໃນປະເທດຍີ່ປຸ່ນ ແຕ່ວ່າເມື່ອໂຕເກມວາງຈຳໜ່າຍ ຄະແນນພັດອອກມາບໍ່ດີ ສາເຫດຫຼັກໆກໍຄືກຣາບຟິກທີ່ພັດທະນາອອກມາບໍ່ເຂົ້າກັນກັບຈໍສະແດງຜົນມືຖືປານໃດ.  

ທີ່ມາ:online station