ທີມນັກດາລາສາດ ຍັງບໍ່ສາມາດອະທິບາຍໄດ້ວ່າດາວເຄາະດວງນີ້ກຳເນີດເກີດຂຶ້ນໄດ້ແບບໃດ? ການກຳເນີດຂອງດາວເຄາະດວງທີ 9 ຫລື Planet Nine ໃນລະບົບສຸລິຍະຈັກກະວານ ທີ່ໂລກເຮົາເປັນສ່ວນໜຶ່ງ ຍັງຄົງເປັນປິດສະໜາທີ່ບັນດານັກດາລາສາດທົ່ວໂລກ ຕ່າງກໍພະຍາຍາມຄົ້ນຄວ້າຫາຄຳຕອບກັນມາດົນແລ້ວ.
ທີມນັກດາລາສາດທີ່ສູນດາລາສາດຟີຊິກຮາວາດ-ສະມິດນ່ຽນ (Harvard-Smithsonian Center for Astrophysics) ຫລື CFA ໄດ້ສຶກສາກ່ຽວກັບດາວເຄາະດວງທີ 9 ນີ້ : ທ່ານ Gongjie Li ນັກດາລາສາດທີ່ສູນ CFA ເຊິ່ງເປັນຫົວໜ້າຜູ້ຮ່າງລາຍງານການວິໄຈຜົນງານໃໝ່ນີ້ ກ່າວວ່າ ມີຫລັກຖານທີ່ບອກວ່າ Planet Nine ມີຢູ່ແທ້.
ຜູ້ຊ່ຽວຊານບອກວ່າ ການກຳເນີດຂອງດາວເຄາະ Planet Nine ໃນລະບົບສຸລິຍະຈັກກະວານ ເປັນທັງຄວາມເຊື່ອແລະປິດສະໜາມາດົນນານແລ້ວ ບັນດາເຈົ້າຂອງທິດສະດີຂອງດາວເຄາະ Planet Nine ນີ້ຄືດາວເຄາະ Nibiru ທີ່ເຊື່ອວ່າ ທີ່ເດີນທາງມາໃກ້ໂລກທຸກໆໜຶ່ງໝື່ນປີ ແລະຖິ້ມຄວາມເສຍຫາຍໄວ້ ຕະຫລອດເສັ້ນທາງທີ່ມັນເດີນທາງຜ່ານ.
ນອກຈາກນີ້ ບັນດານັກດາລາສາດຍັງໄດ້ສັງເກດເຫດການແປກໆ ທີ່ກ່ຽວຂ້ອງກັບການເຄື່ອນທີ່ຂອງດາວເຄາະອື່ນໆ ຫລາຍໆດວງທີ່ຕັ້ງຢູ່ໄກກວ່າດາວ Neptune. ດາວເຄາະຂະໜາດນ້ອຍເຫລົ່ານີ້ ເອີ້ນວ່າ ດາວເຄາະແຄະ ເພະາວ່າມີຂະໜາດນ້ອຍກວ່າໂລກຫລາຍ ແຕ່ກ່ອນ ດາວ Pluto ເປັນໜຶ່ງໃນດາວເຄາະແຄະເຫລົ່ານີ້ ມຫນເຄີຍເປັນດາວເຄາະດວງທີ 9 ແຕ່ກໍຖືກປົດປະຈຳການອອກຈາກການເປັນດາວເຄາະ ນອກຈາກນີ້ ຍັງລວມທັງດາວເຄາະແຄະ Eris ດາວເຄາະແຄະ Makemake ແລະດາວເຄາະແຄະອື່ນໆ.
ແຕ່ການເຄື່ອນໄຫວຂອງດາວເຄາະແຄະສອງດວງຄື Sedna ແລະ 2012 VP ໄດ້ຮັບຄວາມສົນໃຈຈາກນັກວິທະຍາ ສາດທັງຫລາຍທີ່ California Institute of Technologies (Caltech) ເປັນພິເສດ. ໃນເດືອນມັງກອນທີ່ ຜ່ານມາ ທ່ານ Mike Brown ກັບ Konstantin Batygin ຜູ້ຊ່ຽວຊານແຫ່ງສະຖາບັນ Caltech ໄດ້ພິມຜົນງານການວິໄຈທີ່ຢືນຢັນຢ່າງຈິງຈັງວ່າ ມີດາວເຄາະດວງໃຫຍ່ຫລາຍດວງໜຶ່ງ ທີ່ໃຫຍ່ກວ່າໂລກຢ່າງຍິ່ງ ໃນລະບົບສຸລິຍະທີ່ໂລກເຮົາເປັນສ່ວນໜຶ່ງ ພວກເຂົາຕັ້ງຊື່ໃຫ້ມັນວ່າ ດາວເຄາະ Planet Nine ມີຂະໜາດໃຫຍ່ກວ່າໂລກເຮົາເຖິງ 10 ເທົ່າ ແລະປະມານວ່າໜ້າຈະມີອາຍຸ ໜຶ່ງໝື່ນເຖິງສອງໝື່ນປີ.
ຕັ້ງແຕ່ນັ້ນເປັນຕົ້ນມາ ບັນດານັກວິທະຍາສາດໄດ້ພະຍາຍາມສຶກສາຄົ້ນຄວ້າດາວເຄາະທີ່ໃຫຍ່ກວ່າໂລກດວງນີ້ ແຕ່ມາເຖິງຕອນນີ້ ພວກເຂົາຍັງບໍ່ທັນມີຄຳຕອບຢ່າງແທ້ໆເທື່ອ. ໃນຜົນງານການສຶກສາອັນໃໝ່ນີ້ ທີມນັກດາລາສາດ ສະຫລຸບວ່າສາເຫດທີ່ເຮັດໃຫ້ດາວເຄາະຂະໜາດໃຫຍ່ໄປຕັ້ງຢູ່ປາຍຂອບລະບົບສຸລິຍະ ເພາະມີດາວເລີກດວງໜຶ່ງ ທີ່ເດີນທາງເຂົ້າໃກ້ດວງອາທິດຂອງເຮົາ ໃກ້ພໍທີ່ຈະດຶງເອົາ Planet Nine ເຂົ້າໄປໄວ້ໃນວົງໂຄຈອນຂອງມັນ ແລະຈາກການຄຳນວນທາງຄະນິດສາດ ເລື່ອງນີ້ມີຄວາມເປັນໄປໄດ້ພຽງ 10 ເປີເຊັນເທົ່ານັ້ນ.
ຜົນການສຶກສາຂອງທ່ານ Li ນີ້ ລົງພິມໃນວາລະສານ Astrophysical Journal ແຕ່ເລື່ອງຍັງບໍ່ຈົບພຽງເທົ່ານີ້ ທີມນັກດາລາສາດອີກທີມໜຶ່ງ ເຊິ່ງເປັນເພື່ອນຮ່ວມງານຂອງທ່ານ Li ໄດ້ຕີພິມລາຍງານເສີມເລື່ອງນີ້ອີກສອງເລື່ອງ ໃນວາລະສານນີ້ເຊັ່ນດຽວກັນ.
ລາຍງານຜົນງານການວິໄຈດັ່ງກ່າວຂອງພວກເຂົາ ສະເໜີຄວາມເປັນໄປໄດ້ສອງສະພາບການ ອັນທຳອິດ ພວກເຂົາບອກວ່າ Planet Nine ກໍ່ໂຕຂຶ້ນໃນພື້ນທີ່ດຽວກັນກັບດາວເຄາະຂະໜາດໃຫຍ່ດວງອື່ນໆ ບໍ່ວ່າຈະເປັນ ດາວ Jupiter ຫລື ດາວ Saturn ແຕ່ຖືກແຮງຖ່ວງດຶງ (ໂນ້ມຖ່ວງ) ຈາກແຫລ່ງອື່ນ ດຶງມັນອອກໄປຈາກຈຸດທີ່ຕັ້ງເດີມ. ສ່ວນຄວາມເປັນໄປໄດ້ຢ່າງທີສອງ ຄື Planet Nine ກໍ່ໂຕຂຶ້ນໃນຈຸທີ່ກວ້າງໄກໃນລະບົບສຸລິຍະມາຕັ້ງແຕ່ຕົ້ນ ແລະແນ່ນອນວ່າຂໍ້ສົງໄສເຫລົ່ານີ້ ຈະເປັນແຮງບັນດານໃຈໃຫ້ບັນດານັກດາລາສາດ ພະຍາຍາມທີ່ຈະໄຂປິດສະໜາຕ່າງໆ ກ່ຽວກັບ Planet Nine ນີ້ຕໍ່ໄປຢ່າງບໍ່ຢຸດຢັ້ງ.
ຂໍຂອບໃຈ ຂໍ້ມູນຈາກ:
