ວັນທີ 26 ກໍລະກົດ ປີ 1991 ຫຼືມື້ນີ້ເມື່ອ 25 ປີທີ່ແລ້ວ ເປັນມື້ວາງຈຳໜ່າຍຂອງເກມ Sonic the Hedgehog ເທິງເຄື່ອງ Mega Drive ທີ່ປະເທດຍີ່ປຸ່ນ. ເຊິ່ງເກມນີ້ໄດ້ຖືກເລີ່ມພັດທະນາໃນປີ 1990 ໂດຍທາງ Sega ໄດ້ມອບໝາຍໃຫ້ທີມພັດທະນາຫຼັກຂອງບໍລິສັດເຮັດການສ້າງເກມທີ່ມີໂຕເອກເປັນມາສຄ໋ອດຂອງອົງກອນ ເພື່ອໄປສູ້ກັບມາຣິໂອຂອງຝັ່ງ Nintendo ແຕ່ວ່າໃນຕອນນັ້ນ Sega ເອງກໍຍັງບໍ່ມີມາສຄ໋ອດເປັນໂຕເປັນຕົນ ເລີຍໄດ້ເລືອກໂຕກະຕູນເໝັ້ນສີຟ້າທີ່ແຕ້ມໂດຍ 1 ໃນພະນັກງານບໍລິສັດມາເປັນມາສຄ໋ອດພ້ອມຕັ້ງຊື່ໃຫ້ວ່າ “ໂຊນິກ” ໂດຍໃຫ້ໂຕເກມມີຄວາມໄວຂອງເກມເພລທີ່ໄວກວ່າມາຣິໂອ ພ້ອມຍົກສະໄຕລ໌ການລຸຍດ່ານທີ່ເບິ່ງທັນສະໄໝກວ່າມາເປັນຈຸດຂາຍໃຫ້ກັບຊີຣີນີ້ ແລະໃຊ້ໂຊນິກເປັນສັນຍະລັກທີ່ສື່ເຖິງບໍລິສັດ Sega ມາຕັ້ງແຕ່ນັ້ນມາ.
ທາງດ້ານເນື້ອເລື່ອງຂອງ Sonic the Hedgehog ຈະເລົ່າເຖິງ ດຣ.ໄອໂວ ໂຣບ໋ອດນິກ (Ivo Robotnik) ທີ່ຕ້ອງການລັກສິລາເຄອອສເອເມຣາວ (Chaos Emerald) ເພື່ອດຶງພະລັງໄປໃຊ້ໃນທາງຊົ່ວຮ້າຍ ໂດຍລາວໄດ້ລັກພາໂຕພວກສິງສາລາສັດຈາກເກາະທາງໃຕ້ມາຂັງໄວ້ໃນໂຕຫຸ່ນຍົນ ຜູ້ຫຼິ້ນຈະຕ້ອງບັງຄັບເປັນເໝັ້ນນາມວ່າ ໂຊນິກ (Sonic) ທີ່ມີຄວາມໄວເປັນເລີດບໍ່ເປັນຮອງໃຜ ອອກໄປຢຸດ ດຣ. ໂຣບ໋ອດນິກ ແລະຊ່ອຍໝູ່ໆສັດປ່າ ພ້ອມທັງຊິງເອົາສິລາເຄອອສເອເມຣາວກັບມາໃຫ້ໄດ້.
ດ້ານລະບົບຂອງເກມນີ້ຈະເປັນເກມແນວແອັກຊັ່ນລຸຍດ້ານຂ້າງແບບ 2D ໂດຍໂຊນິກຈະເປັນໂຕລະຄອນທີ່ແລ່ນໄດ້ວ່ອງໄວ ຜູ້ຫຼິ້ນສາມາດໃຊ້ປະໂຫຍດຂອງສາກໃນການເຮັດຄວາມໄວໃຫ້ກັບໂຊນິກເພື່ອໄປຫາຈຸດຕ່າງໆ ດ້ວຍການໃຊ້ຄວາມໄວຂອງໂຊນິກເປັນແຮງສົ່ງ ພ້ອມກັນນີ້ ຜູ້ຫຼິ້ນຈະຕ້ອງຄອຍຫຼົບອຸປະສັກຕ່າງໆ ບໍ່ວ່າຈະເປັນ ໜາມ, ເຫວ ຫຼືພື້ນທີ່ຖະຫຼົ່ມໃນບາງຈຸດ, ເຊິ່ງກໍຈະມີສັດຕູປະກົດໂຕຕາມສາກນຳ ວິທີກຳຈັດພວກມັນກໍຄືໂດດກິ້ງໂຕໄປຢຽບຈາກດ້ານເທິງ (ຄ້າຍກັບມາຣິໂອ) ໃນລະຫວ່າງຫຼິ້ນ ຜູ້ຫຼິ້ນຈະຕ້ອງເກັບແຫວນທີ່ວາງຢູ່ໃນສາກເປັນຮ້ອຍໆວົງ ໂດຍແຫວນເຫຼົ່ານີ້ປຽບສະເໝືອນຂອງແທນພະລັງຊີວິດ ທີ່ຖ້າເຮົາຫຼົງຢຽບໜາມຫຼືຖືກສັດຕູໂຈມຕີ ແຫວນຈະເດ້ງອອກຈາກໂຕເຮົາທັງໝົດ ແຕ່ຖ້າເຮົາຖືກໂຈມຕີຊ້ຳ ຫຼືໄປຢຽບໜາມໃນຂະນະທີ່ໂຕເຮົາບໍ່ມີແຫວນຢູ່ເລີຍ ເຮົາກໍຈະຕາຍທັນທີ.
Fact ເລັກນ້ອຍກ່ຽວກັບເກມ Sonic the Hedgehog
- Sonic the Hedgehog ພາກທຳອິດນີ້ສາມາດເຮັດຍອດຂາຍໄປໄດ້ເຖິງ 4 ລ້ານຊຸດ ແລະເມື່ອນັບລວມຍອດຂາຍຂອງເກມ Sonic ທຸກພາກແລະທຸກແພລັດຟອຣ໌ມເທິງເຄື່ອງຄອນໂຊລໃນປີ 2003 ປະກົດວ່າຊີຣີ Sonic ໄດ້ເຮັດຍອດຂາຍລວມໄປໄດ້ເຖິງ 27 ລ້ານຊຸດເລີຍ.
- ໃນຂັ້ນຕອນທຳອິດຂອງການອອກແບບໂຕເກມທາງ Sega ໄດ້ຄຶດໄວ້ແຕ່ດົນໆແລ້ວວ່າ ຈະໃຫ້ໂຕລະຄອນໂຊນິກເປັນກະຕ່າຍ ແຕ່ໄດ້ປ່ຽນມາເປັນໂຕເໝັ້ນໃນພາຍຫຼັງນັ້ນກໍເພາະເຫດຜົນເລື່ອງພາບລັກທີ່ເບິ່ງແຂງແກ່ງ ແລະມີພິດສົງກວ່ານັ້ນເອງ. ເຊິ່ງຫຼັງຈາກນັ້ນກໍໄດ້ມີການຈັດການແຂ່ງຂັນປະກວດແຕ້ມຮູບໂຊນິກແລະໂຣບ໋ອດນິກກັນພາຍໃນອົງກອນ ໂດຍການເຟັ້ນຫາຮູບພາບໂຊນິກຈາກພະນັກງານທີ່ແຕ້ມໄດ້ງາມຖືກໃຈຫຼາຍທີ່ສຸດມາເປັນມາສຄ໋ອດຂອງ Sega ສ່ວນໂຣບ໋ອດນິກກໍຖືກນຳມາໃຊ້ເປັນໂຕຮ້າຍຂອງຊີຣີແທນ. ໂດຍພະນັກງານ Sega ຜູ້ທີ່ຊະນະການປະກວດແຕ້ມຮູບໂຕລະຄອນໂຊນິກກໍຄືທ່ານນາໂອໂຕະ ໂອຊິມະ ເຊິ່ງປັດຈຸບັນລາວໄດ້ລາອອກຈາກບໍລິສັດມາຢູ່ສະຕູດິໂອອິດສະຫຼະທີ່ມີຊື່ວ່າ Artoon ແລະມີສ່ວນຮ່ວມໃນການພັດທະນາ Pinobee ທີ່ລົງໃຫ້ກັບເຄື່ອງ PS1 ແລະ Game Boy Advance ກັບເກມ Blinx: The Time Sweeper ທີ່ລົງໃຫ້ກັບເຄື່ອງ Xbox.
- Dreams Come True ວົງຣ໋ອກຈາກຍີ່ປຸ່ນທີ່ມີຊື່ສຽງຊ່ວງທ້າຍຍຸກ 80 ໄດ້ເປັນຜູ້ແຕ່ງເພງປະກອບໃຫ້ກັບເກມນີ້ (ລວມເຖິງ Sonic the Hedgehog 2 ແລະ Sonic CD ນຳ) ໂດຍໃນລະຫວ່າງທີ່ວົງນີ້ໄດ້ອອກທົວຄອນເສິຣ໌ດໃນຍີ່ປຸ່ນຊ່ວງລະດູຮ້ອນປີ 1991 ທາງວົງກໍໄດ້ຊ່ອຍໂປຣໂໝດເກມ Sonic the Hedgehog ໃຫ້ອີກແຮງ ດ້ວຍການເພັ້ນໂຕກາຕູນໂຊນິກລົງເທິງລົດບັນທຸກທີ່ຂົນອຸປະກອນແລະເຄື່ອງດົນຕີຂອງວົງເພື່ອດຶງດູດຄວາມສົນໃຈຂອງຄົນທີ່ຂັບຂີ່ໄປມາ ນອກຈາກນີ້ເພງ Sweet Sweet Dream ຂອງວົງຍັງໄດ້ຖືກໃຊ້ເປັນເພງສາກຈົບຂອງ Sonic the Hedgehog 2 ອີກເຊັ່ນກັນ.
- ໃນຊ່ວງເວລາທີ່ Sonic the Hedgehog ຖືກຳເນີດຂຶ້ນເທິງເຄື່ອງຄອນໂຊລເມື່ອປີ 1991 ທາງ Sega ນັ້ນຕ້ອງການເກມລະດັບມາສຄ໋ອດຂອງບໍລິສັດເພື່ອປະຊັນກັບທາງ Nintendo ທີ່ມີມາຣິໂອເປັນສັນຍະລັກຂອງອົງກອນມາແຕ່ດົນໆ ດ້ວຍເຫດນີ້ ໂຊນິກເລີຍຖືກສ້າງຂຶ້ນເພື່ອສູ້ກັບມາຣິໂອໂດຍກົງ ທັງເລື່ອງພາບລັກຂອງໂຕເກມ, ພາບລັກຂອງໂຕລະຄອນ ໄປຈົນເຖິງພາບລັກຂອງອົງກອນ ທີ່ໃຊ້ໂຊນິກເປັນສິ່ງທີ່ສື່ໃຫ້ເຫັນຄວາມວ່ອງໄວ ແລະທັນສະໄໝ, ແລະເຖິງວ່າທຸກມື້ນີ້ Sega ຈະຖອນໂຕໄປຈາກທຸລະກິດຜະລິດເຄື່ອງເກມຄອນໂຊລແລ້ວ (ປັດຈຸບັນເນັ້ນເຮັດແຕ່ຊ໋ອບແວຣ໌ເກມ) ແຕ່ໂຊນິກກໍຍັງຄົງເປັນ 1 ໃນສັນຍະລັກຂອງວົງການເກມເລື້ອຍໆມາ ເຊັ່ນດຽວກັບມາຣິໂອ ຫຼືລາຣ້າ ຄຣອບ.
ທີ່ມາ:online station