ລາຍ​ງານ​ປະຈຳ​ປີ​ຂອງ​ບໍລິສັດ ​ເມີ​ເຊີ ບໍລິສັດ​ທີ່​ປຶກສາ​ຕ່າງ​ຊາດ​ຊື່​ດັງ​ທີ່​ສຳ​ຫຼວດຄ່າ​ຄອງ​ຊີບ​ເຊັ່ນ: ອາຫານ, ຄ່າ​ທີ່​ພັກ ​ແລະ ສິ່ງ​ບັນ​ເທິງ​ໃນ 209 ​ເມືອງ​ທົ່ວ​ໂລ​ກພົບ​ວ່າ ຈີນຮົງ​ກົງ​ເປັນ​ເມືອງ​ທີ່​ມີຄ່າ​ຄອງ​ຊີບ​ແພງ​ທີ່​ສຸດ​ໃນ​ໂລກ​ສຳລັ​ບຕ່າງປະ​ເທດ​ທີ່ຢູ່​ອາ​ໄສ.

ຈາກ​ການ​ສຳ​ຫຼວດຂອງ​ເມີ​​ເຊີ​ໃນທ້າຍ​ອາທິດ​ທີ່​ຜ່ານ​ມາ​ພົບ​ວ່າ ອາ​ພາດ​ເມັນ 2 ຫ້ອງ​ນອນ​ບໍ່​ລວ​ມ​ເຟີ​ນີ​ເຈີ ທີ່ຕັ້ງ​ດີ​ໃນ​ຈີນຮົງ​ກົງ​ນັ້ນ​ມີຄ່າ​ເຊົ່າ​ຢູ່​ທີ່ 6.800 ​ໂດ​ລາ​ສະຫະລັດ​ຕໍ່​ເດືອນ ​ປຽບທຽບ​ກັບ​ຫ້ອງ​ລັກສະນະ​ດຽວ​ກັນ​ຢູ່​ນະຄອນຫຼວງ​ລອນ​ດອນ​ທີ່​ມີ​ລາຄາ 4.600 ​ໂດ​ລາຕໍ່​ເດືອນ ຂະນະ​ທີ່​ນະຄອນຫຼວງ​ໂຕ​ກຽວ​ຂອງ​ຍີ່ປຸ່ນ​ມີ​ລາຄາ 4.000 ​ໂດ​ລາ​ຕໍ່​ເດືອນ ຂະນະ​ທີ່​ລາຄາ​ກາ​ເຟ 1 ​ຈອກ​ຢູ່ຈີນ​ຮົງ​ກົງ​ສາມາດ​ຊື້​ໄດ້​ໃນ​ລາຄາ 8 ​ໂດ​ລາ ທຽບ​ກັບ​ລອນ​ດອນ​ມີ 4,4 ​ໂດ​ລາ ​ແລະ ​ໂຕ​ກຽວ 4 ​ໂດ​ລາ.

ຜົນສຳ​ຫຼວດລະບຸ​ວ່າ ນອກຈາກຈີນ​ຮົງ​ກົງ​ແລ້ວ ​ເມືອງ​ທີ່ຢູ່​ໃນ 10 ອັນ​ດັບ​ທຳ​ອິດ​ຮອງ​ຈາກຈີນ​ຮົງ​ກົງ​ມີ​ຄື: ອັນ​ດັບ 2 ນະຄອນຫຼວງ ລູອັນ​ດາຂອງ​ປະ​ເທດ​ອັງ​ໂກລາ, ອັນ​ດັບ 3 ຊູຣິກ ຂອງ​ສະ​ວິດ, ອັນ​ດັບ 4 ສິງກະ​ໂປ ​ແລະ ອັນ​ດັບ 5 ນະຄອນຫຼວງ​ໂຕ​ກຽວ,  ຊຽງ​ໄຮ,​ ເຈ​ນີວາ,​ ເອັນ​ຈາ​ເມ​ນາ​ຂອງປະ​ເທດ​ຊາດ ​ແລະ ປັກ​ກິ່ງ​.