ເຂດເສດຖະກິດພິເສດ (ຂພສ) ສະຫວັນ-ເຊໂນ ທີ່ລັດຖະບານໄດ້ອະນຸມັດການລົງທຶນແຕ່ປີ 2003 ຕົວຈິງພັດທະນາໃນປີ 2008 ດ້ວຍຂອດບໍລິຫານປະຕູດຽວສ້າງຄວາມສະດວກສະບາຍແກ່ນັກທຸລະກິດທີ່ຕ້ອງການເຂົ້າມາຕັ້ງຖານການຜະລິດໄລຍະຍາວ ປັດຈຸບັນມີປະມານ 69 ບໍລິສັດ ຈາກທົ່ວໂລກເຂົ້າມາລົງທຶນ ສະເພາະບໍລິສັດທີ່ສາມາດດຳເນີນການຜະລິດໄດ້ແລ້ວຫຼາຍກວ່າເຄີ່ງໜື່ງ ບໍລິສັດເປັນຂອງຄົນລາວມີປະມານ 10 ກວ່າບໍລິສັດ ແລະ ມີອີກ 3 ບໍລິສັດທີ່ບັນລຸຂໍ້ຕົກລົງໃນການຂະຫຍາຍຖານຜະລິດ.
ຄຽງຄູ່ກັບການລົງທຶນເຂດດັ່ງກ່າວມີການຂະຫຍາຍຕົວຢ່າງໄວວາເຮັດໃຫ້ ຂພສ ຕ້ອງເລັງຫາແຮງງານເພື່ອມາກໍ່ສ້າງໃຫ້ໄດ້ແຮງງານຄຸນນະພາບເພື່ອສະໜອງໃຫ້ກັບພາກທຸລະກິດຕ່າງໆພາຍໃນ ຂພສ ເຊິ່ງຄາດອີກ 5 ປີຕໍ່ໜ້າຄວາມຕ້ອງການຂອງແຮງງານຈະມີປະມານ 30 ພັນຄົນ.
ທ່ານ ທອງໄສ ໄຊຍະວົງຄຳດີ ຮອງຫົວໜ້າຄະນະບໍລິຫານ ຂພສ ສະຫວັນ-ເຊໂນ ກ່າວວ່າ: ລັດຖະບານໄດ້ໃຫ້ຄວາມສຳຄັນໃນເລື່ອງຂອງການພັດທະນາ ໂດຍສະເພາະ ຂພສ ດັ່ງກ່າວໃນແຂວງສະຫວັນນະເຂດກໍ່ຄືເຂດອື່ນໃນທົ່ວປະເທດເພື່ອດຶງດູດການລົງທຶນຈາກທັງພາຍໃນ ແລະ ຕ່າງປະເທດ ສ້າງໃຫ້ ສປປ ລາວ ກາຍເປັນຖານການຜະລິດສົ່ງອອກ ປະຊາຊົນມີວຽກເຮັດງານທຳສາມາດຫຼຸດພົ້ນອອກຈາກຄວາມທຸກຍາກໄດ້ສຳເລັດເທື່ອລະກ້າວ ນັບແຕ່ມີການພັດທະນາແມ່ນໄດ້ມີການວາງນິຕິກຳ ນະໂຍບາຍອຳນວຍຄວາມສະດວກແກ່ການລົງທຶນ ເຊິ່ງໄດ້ສ້າງຄວາມສົນໃຈໃຫ້ກັບນັກລົງທຶນທັງພາຍໃນ ແລະ ຕ່າງປະເທດ ໂດຍສະເພາະແມ່ນບໍລິສັດຜູ້ຜະລິດສິ້ນສ່ວນຂອງລົດຍົນ ສິ້ນສ່ວນເຮືອບິນ ແລະ ອີກຫຼາຍບໍລິສັດ ເຊິ່ງໄດ້ນຳໃຊ້ແຮງງານພາຍໃນເກືອບທັງໝົດ ແລະ ວິຊາການຕ່າງຊາດຈຳ ນວນໜຶ່ງ ຄາດວ່າໃນປີ 2020 ມີຄວາມຕ້ອງການແຮງງານຕື່ມອີກບໍ່ຕ່ຳກວ່າ 30 ພັນຄົນຈາກຈຳນວນຂອງແຕ່ລະບໍລິສັດຕ້ອງການສະໜອງເຂົ້າໃນແຕ່ລະໜ່ວຍງານ. ຂະນະທີ່ປັດບຸນໃນເຂດດັ່ງກ່າວມີແຮງງານທີ່ເປັນຄົນລາວຢູ່ເຂດດັ່ງກ່າວປະມານ 4500 ຄົນ ຕ່າງປະເທດມີປະມານ 250 ຄົນໃນນີ້ສ່ວນໃຫຍ່ແມ່ນຄູຝຶກ.
ຂພສ ສະຫວັນ-ເຊໂນ ມີເນື້ອທີ່ທັງໝົດ 1.000 ກວ່າເຮັກຕາແບ່ງອອກເປັນໂຊນ ຄື: ໂຊນ A ແມ່ນດຳເນີນທຸລະກິດບໍລິການທີ່ຕິດພັນກັບການຄ້າ ທະນາຄານ ທີ່ພັກ ໂຮງແຮມ ໂຊນ B ດຳເນີນກິດຈະການໂລຈິດຕິກ ເສັ້ນທາງເຊື່ອມໂຍງ ສ້າງສູນຜະລິດກະຈາຍສິນຄ້າ ໂຊນ C ເປັນເຂດນິຄົມອຸດສາຫະກຳເບົາ ແລະ ການຜະລິດ ໂຊນ D ທີ່ພັກອາໄສຂອງພະນັກງານ ໂຮງຮຽນສ້າງສີມືແຮງງານ ແລະ ສູນຫັດຖະກຳ ໂຊນນີ້ຕ້ອງການແຮງງານຫຼາຍກວ່າ 4 ພັນກວ່າຄົນ.
ຂອບໃຈຂ່າວຈາກ: ເສດຖະກິດ-ການຄ້າ