ເມື່ອພວກເຮົາອ່ານໜັງສື “ພຸດທະປະຫວັດນັ້ນ” ພະພຸດທະເຈົ້າຕອນສະໄໝທີ່ພະອົງຍັງເປັນເຈົ້າຊາຍສິດທັດຖະຢູ່ ໄດ້ຊົງຮໍ່າຮຽນສາດຕະສິນ 18 ຢ່າງ ເພາະເຫດຜົນທີ່ວ່າ ພະເຈົ້າສຸດໂທທະນະຜູ້ເປັນບິດານັ້ນ ສົ່ງເສີມລູກລູກຊາຍຂອງຕົນ ເພື່ອໃຫ້ເປັນຈັກກະ ພັດໃນອະນາຄົດ ຫລືຜູ້ນຳທີ່ຍິ່ງໃຫຍ່ນັ້ນເອງ.
ບໍ່ເໝືອນໃນປັດຈຸບັນນີ້ ທີ່ແຍກສາຂາວິຊາຕ່າງໆອອກໄປຢ່າງຫລວງຫລາຍພາຍມາກ ບາງຄົນຮຽນແຕ່ສາຂາວິຊາດຽວ ໂດຍບໍ່ຮັບຮູ້ສາຂາວິຊາອື່ນໆຊ້ຳ ເຮັດໃຫ້ມີປົມດ້ອຍໃນເລື່ອງຄວາມຮູ້ຄວາມສາມາດ (ໃນບາງຄັ້ງ) ດັ່ງນັ້ນ, ຖ້າຢາກເກັ່ງກ້າ ປັນຍາສຽບແຫລມ ຫລືເລີດລ້ຳນັ້ນ ກໍຄວນຊອກຮູ້ຮ່ໍາຮຽນສາຂາວິຊາອື່ນໆນຳດ້ວຍ ປຽບສະເໝືອນພະພຸດ ທະເຈົ້າ ຜູ້ເປັນສາສະດາທີ່ຍິ່ງໃຫຍ່ໃນໂລກນີ້.
ວິຊາ 18 ຢ່າງນັ້ນ ມີ :
1. ຍຸດທະສາດ : ວິຊາພິໄຊສົງຄາມ “ຟັນດາບ, ຍິງທະນູ, ສິລະປະຍຸດຕ່າງໆ…”
2. ລັດຖະສາດ : ວິຊາການປົກຄອງ ຫລືການບໍລິຫານປະເທດ.
3. ນິຕິສາດ : ວິຊາກົດໝາຍ, ແບບແຜນຮີດຄອງປະເພນີ.
4. ວານິຊາສາດ : ວິຊາການຄ້າຂາຍ.
5. ອັກສອນສາດ : ວິຊາທາງໜັງສື.
6. ນິລຸດຕິສາດ : ວິຊາພາສາຕ່າງປະເທດ.
7. ຄະນິດສາດ : ວິຊາຄຳນວນຄິດໄລ່.
8. ໂຊຕິສາດ : ວິຊາດາລາສາດ.
9. ພູມິສາດ : ວິຊາກ໋ວບກັບພູມິປະເທດ.
10. ໂຫລາສາດ : ວິຊາຄຳນວນຟ້າຝົນ.
11. ສັດຕະສາດ : ວິຊາກ່ຽວກັບສັດ.
12. ໂຍຄະສາດ : ວິຊາກ່ຽວກັບຊ່າງກົນຕ່າງໆ (ຫລໍ່ຫລອມ).
13. ເຫຕຸສາດ : ວິຊາຊອກຫາເຫດແລະຜົນ (ຕັກກະສາດ).
14. ເວຊະສາດ : ວິຊາການແພດ ແລະການຢາ.
15. ສາສະໜາສາດ : ວິຊາກ່ຽວກັບສາສະໜາ.
16. ມາຍາສາດ : ວິຊາໃນການໃຊ້ກົນອຸບາຍ (ຈິດຕະສາດ).
17. ຄັນທັບພະສາດ : ວິຊານາຕະສິນ (ດົນຕີ, ການຂັບລຳ, ຮ້ອງເພງ…).
18. ສັນທະສາດ : ວິຊາແຕ່ງກາບກອນໂຄງສັນ…
ຂໍ້ມູນອ້າງອີງ :
ສະຖາບັນວິທະຍາສາດສັງຄົມແຫ່ງຊາດ
ບັນດາສາສະໜາທີ່ຄົງຕົວຢູ່ ສ.ປ.ປ ລາວ
ໜ້າ 27