ຂປລ. ການ​ຜະລິດ​ສິນຄ້າຂອງ​ປະຊາຊົນ​ລາວ ຮຽກຮ້ອງ​ໃຫ້​ພາກ​ລັດ ​ເປັນ​ຫົວ​ຈັກ​ຫລັກ​ແຫ​ລ່ງ ຊອກ​ຫາ​ຕະຫລາດ​ຈໍາໜ່າຍ​ສິນຄ້າ​ທີ່​ໝັ້ນຄົງ, ພ້ອມ​ທັງ​ຄວນສ້​າງນະ​ໂຍບາຍ​ຄໍ້າປະກັນ​ ລາຄາ​ສິນຄ້າຂອງ​ຜູ້​ຜະລິດ​ພາຍ​ໃນ​ຢ່າງ​ຈະ​ແຈ້ງ ຖ້າ​ເກີດ​ສະພາບ​ເສດຖະກິດ​ເໜັງ​ຕີ ​ແລະ ພົບ​ບັນຫາ​​ໄພ​ທໍາ​ມະ​ຊາດ. ຂະນະ​ທີ່ຊາວສວນ​ຢາງພາລາ, ສາລີ, ໝາກ​ເດືອ​ ໃນ​ພາກ​ເໜືອ ​ແລະ ພາກ​ໃຕ້ຂອງ​ລາວ​ ຍັງ​ພົບ​ບັນຫາ​ ລາຄາຜົນ​ຜະລິດ​ຂອງ​​ເຂົາ​ເຈົ້າ​ຕົກ​ຕໍ່າ ​ແລະ ບໍ່​ມີ​ຕະຫລາດ​ຮອງ​ຮັບ​.

ຕາມ​ການ​ລາຍ​ງານຂໍ້​ມູນ​ຕົວ​ຈິງ​ ຈາກ​ຊາວ​ສວນ​ຢາງພາລາຢູ່​ພາກ​ໃຕ້ ​ແລະ ພາກ​ເໜືອຂອງ​ລາວ​ ລະບຸ​ວ່າ: 10 ປີຜ່ານ​ມາ​, ​ເຂົາ​ເຈົ້າ​ໄດ້​ທໍາລາຍເນື້ອ​ທີ່​ຜະລິດ​ພືດ​ກະສິກໍາ ​ແລະ ຫັນ​ເອົາ​ດິນ​ທີ່​ອຸດົມສົມບູນ ມາ​ປູກ​ຢາງພາລາ​ຢ່າງ​ຫລວງ​ຫລາຍ​ ເພື່ອ​ຫວັງ​ກໍາ​ໄລຈາ​ກການ​ຂາຍ​ຢາງພາລາ​ ທີ່​ມີ​ລາຄາ​ສູງ​ ເຖິງ17.000 ກີບ​ຕໍ່​ກິ​ໂລ​ ໃນ​ປີ 2013-2014, ​ແຕ່​ຄວາມ​​ເປັນ​ຈິງ​ ການ​ປູກ​ຢາງພາລາ ບໍ່​ໄດ້​ຕາມ​ທີ່​ຄາດ​ຫວັງ​ໄວ້ຄື​ກັບ​ການ​ໂຄສະນາ ​ເຜີຍ​ແຜ່​ຂໍ້​ມູນ​ ຈາກ​ນັກ​ລົງທຶນ ​ແລະ ພໍ່ຄ້າ​ຄົນ​ກາງ ວ່າ​​ໃຜ​ປູກ​ຢາງພາລາຈະ​ຮັ່ງມີ, ​ພ້ອມທັງ​ສ້າງ​ວຽກ​ເຮັດ​ງານ​ທໍາ​ໃຫ້​ປະຊາຊົນ. ຫລ້າ​ສຸດຕົກ​ມາ​ປີ 2015-2016 ລາຄາ​ຢາງພາລາ​ໃນ​ທ້ອງ​ຕະຫລາດ​​ ໄດ້ຫລຸດ​ລົງ​ຈາກ 17.000 ກີບ​ ມາ​ເປັນ 3-5.000 ກີບ​ຕໍ່​ກິໂລ.

ຈາກບັນຫາ​ດັ່ງກ່າວ, ຊາວ​ສວນ​ຢາງພາລາ ​ຈຶ່ງຮຽກຮ້ອງ​ໃຫ້ທາງ​ພັກ​ລັດ ​ຄວນ​ມີ​ການ​ຄົ້ນ​ຄວ້າ, ສໍາ​ຫລວດ, ສຶກສາຜົນ​ກະທົບ​ທີ່​ຕະຫລາດ​ຮອງ​ຮັບ, ​ແຜນ​ສໍາຮອງ​ເມື່ອ​ເກີດ​ວິ​ກິດ, ຫລຸດຜ່ອນ​ຂັ້ນ​ຕອນ​ພໍ່ຄ້າ​ຄົນ​ກາງ, ກໍານົດ​ເງື່ອນ​ໄຂ, ​ເນື້ອ​ທີ່​ການ​ຜະລິດ ​ວ່າ​ອັນ​ໃດຄວນ​ເປັນ​ສິນຄ້າປາຍ​​ແຫລມ ​ແລະ ​ເປັນ​ບູລິ​ມະ​ສິດ​ ໃນ​ການ​ແກ້​ໄຂ ​ຄວາມທຸກ​ຍາກ​ ເພື່ອ​ຮັບປະກັນ​ບໍ່​ໃຫ້​ປະ​ຊາ​ຊົນ ຫລື ຜູ້​ຜະລິດ​ພາຍ​ໃນ​ເສຍ​ຜົນ​ປະ​ໂຫຍ​ດ.

ຫລ້າ​ສຸດ ລະຫວ່າງກອງ​ປະຊຸມ​ລັດຖະບານ ຮ່ວມ​ກັບ​ເຈົ້າ​ຄອງ​ນະຄອນຫລວງວຽງຈັນ ​ແລະ ເຈົ້າ​ແຂວງ ໃນທົ່ວປະເທດ​ ໄດ້​ໄຂ​ຂຶ້ນ​ໃນ​ວັນ​ທີ 23-24 ມິຖຸນາ 2016, ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ​ແຫ່ງ ສປປ ລາວ​ ໄດ້​ແນະ​ນໍາ ​ແລະ ມອບ​ໃຫ້​ກະຊວງອຸດສາຫະກຳ ​ແລະ ການ​ຄ້າ ຊອກ​ຕະຫລາດ​ ເພື່ອ​ຮອງ​ຮັບ​ການ​ຜະລິດ​ສິນຄ້າ ຂອງ​ປະຊາຊົນ, ພ້ອມ​ດຽວ​ກັນ​ນັ້ນ​ ກໍ​ໃຫ້​ຄົນ​ຄວ້າ​ດັດສົມ​ລາຄາ​ສິນຄ້າ ​ຕາມ​ທ້ອງ​ຕະຫລາດ ລວມທັງ​ໃຫ້​ຕິດ​ສະ​ແຕມລາຄາ​ສິນຄ້າ​​ເປັນ​ພາສາ​ລາວ.

ສ່ວນບັນດ​າ​ເຈົ້າ​ແຂວງ ​ກໍ​ໄດ້​ປະກອບ​ຄໍາ​ເຫັນ​ບາງ​ບັນຫາສຳຄັນ ​ຄື: ຜູ້​ຜະລິດ​​ເປັນ​ສິນຄ້າ​ສ່ວນ​ໃຫຍ່ ​ຍັງ​​ເພີ່ງ​ພາ​​​ຕົນ​ເອງ ເພື່ອ​ຊອກ​ຫາ​ຕະຫລາດ​ຈໍາໜ່າຍ​ສິນຄ້າ, ບາງ​ຄັ້ງ​ກໍ​ພົບ​ບັນຫາ​ຫຍຸ້ງ​ຍາກ​ ຍ້ອນ​ທຶນ​ໜ້ອຍ, ການ​ຕໍ່​ລອງ​ບໍ່​ສູງ, ​ຄວາມເຊື່ອ​ໝັ້ນ​ບໍ່​ຫລາຍ. ນອກຈາກ​ນີ້, ພາກສ່ວນ​ກ່ຽວຂ້ອງ ກໍ​ຄວນ​ລົງ​ຕິດຕາມກວດກາ, ຄົ້ນ​ຄວ້າໃຫ້​ເຫັນ ​ສາເຫດ​ສິນຄ້າ​ເໜັງ​ຕີງ ​ແລະ ລາຄາ​ຂຶ້ນ​ລົງຕົວ​ຈິງ ເພື່ອ​ຫລີກ​ເວັ້ນການ​ສວຍ​ໂອກາດ​. ພ້ອມດຽວ​ກັນ​ນັ້ນ ​ກໍ​ຕ້ອງ​ໃຫ້​ພໍ່ຄ້າ​-ແມ່​ຄ້າ ​ແລະ ຜູ້​ປະກອບ​ການ ​ຕິດ​ສະ​ແຕມ​ລາຄາ​ສິນຄ້າ​ທີ່​ນໍາ​ເຂົ້າ​ ​ແລະ ຜະລິດ​ພາຍ​ໃນ​ເປັນ​ພາສາ​ລາວ ຕື່ມ​ອີກ.

ແຫລ່ງຂ່າວ:

ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!