ຫຼັງຈາກທີ່ທາງ Nubia ເປີດໂຕສະມາດໂຟນເຮືອທຸງ Z11 ຢ່າງເປັນທາງການທີ່ມີຈຸດເດັ່ນໃນເລື່ອງຂອງສະເປັກແລະຂອບດຳທີ່ໜ້າຈໍໜ້ອຍລົງແລ້ວ, ຫຼ້າສຸດນີ້ກໍໄດ້ເປີດໂຕໂທລະສັບລຸ້ນໃໝ່ແບບງຽບໆຄື Nubia N1 ທີ່ເວັບໄຊຢ່າງເປັນທາງການຂອງບໍລິສັດ. ສຳລັບ N1 ແມ່ນຈະມຸ່ງເນັ້ນໄປທີ່ຕະຫຼາດລະດັບກາງ ແລະນີ້ກໍອາດເປັນເຫດຜົນໜຶ່ງທີ່ບໍລິສັດບໍ່ໄດ້ເປີດໂຕລຸ້ນນີ້ໃນງານເພາະປະສິດຕິພາບບໍ່ສູ້ລຸ້ນ Z11.
ສຳລັບ Nubia N1 ມາພ້ອມໜ້າຈໍ IPS LCD ຂະໜາດ 5.5 ນິ້ວ, ຄວາມລະອຽດ FullHD (1920 x 1080 ພິກເຊວ) 401ppi ແລະປົກປ້ອງດ້ວຍ Corning Gorilla Glass 3. ໃຊ້ງານຊິບປະມວນຜົນອ໋ອກຕ້າຄໍ Helio P10, RAM 3GB ແລະ ROM 64GB ສາມາດເພີ່ມ microSD ສູງສຸດ 128GB.
ດ້ານກ້ອງຫຼັງແມ່ນຕິດຕັ້ງມາ 13 ລ້ານພິກເຊວ ພ້ອມກັບ PDAF, ຄວາມໄວໂຟກັດ 0.2 ວິນາທີ ແລະເທັກໂນໂລຢີ 3D Noise reduction. ດ້ານຄຸນສົມບັດອື່ນໆກໍມີ ລະບົບປ້ອງກັນພາບສັ່ນໄຫວ, ປັບປຸງລະບົບຖ່າຍກາງຄືນໄດ້ດີ, LTM ຄວບຄຸມສີໃນພື້ນທີ່ ແລະຄ່າ f/2.2. ສ່ວນກ້ອງໜ້ານັ້ນໃຫ້ຄວາມລະອຽດມາ 13 ລ້ານພິກເຊວ ພ້ອມດ້ວຍຄຸນສົມບັດຖ່າຍຮູບໃນບ່ອນແສງໜ້ອຍໄດ້ດີ.
ທາງດ້ານຊ໋ອບແວຣ໌ແມ່ນໃຊ້ງານລະບົບ Android 6.0 ຄອບດ້ວຍ Nubia 4.0 UI ພ້ອມກັບຄຸນສົມບັດໃຊ້ງານ 2 ແອັບພ້ອມກັນ. ແບັດເຕີຣີໃຫ້ມາ 5000mAh ແລະດ້ານຫຼັງໂຕເຄື່ອງມີເຊັນເຊີ້ສະແກນນິ້ວມື ທີ່ສາມາດປົດລ໋ອກໄດ້ໄວ 0.2 ວິນາທີ.
ສຳລັບລາຄາຂອງ Nubia N1 ແມ່ນຢູ່ທີີ 1699 ຢວນ (2.056.000 ກີບ) ແລະມີ 2 ສີໃຫ້ເລືອກຄື: ສີເງິນ ແລະສີຄຳ. ສ່ວນມື້ກຳນົດວາງຈຳນ່າຍນັ້ນຍັງບໍ່ມີການກ່າວເຖິງໃດໆ.
ທີ່ມາ:gizmochina,ເດັກລາວ