spot_img
Homeວັນນະກຳເລືອກເກີດບໍ່ໄດ້ ...

ເລືອກເກີດບໍ່ໄດ້ …

Published on

ເລື່ອງສັ້ນລາງວັນທີ 2 ວັນນະກຳສ້າງສັນ ສະຫຼອງປະເທດລາວຄົບຮອບ 35 ປີ ໂດຍ: ຊຽງກະເລັນ ບ້ານນາ

ຖ້າຖາມວ່າ ຄັນເລືອກເກີດໄດ້ທ່ານຈະເລືອກບ່ອນເກີດຄືແນວໃດ? ຄຳຕອບຂອງຫຼາຍໆຄົນກໍຄົງຈະຄ້າຍຄືກັນ ນັ້ນກໍຄືຖິ່ນຖານອັນອຸດົມສົມບູນ, ມີຄວາມກ້າວໜ້າ, ມີຖະໜົນຫົນທາງອັນກວ້າງໃຫຍ່ໄພສານ, ມີໂຮງໝໍ, ໂຮງຮຽນ, ມີໄຟຟ້າ ຫຼືເກີດໃນຄອບຄົວທີ່ພຽບພ້ອມໄປດ້ວຍຊັບສິນສົມບັດ ມີເຮືອນງາມໃຫ້ຢູ່, ມີລົດລາຄາແພງໆໃຫ້ຂີ່ ແລະມີເງິນໃຊ້ຈ່າຍແບບບໍ່ອັ້ນ. ກົງກັນຂ້າມກໍຄົງບໍ່ມີໃຜປາຖະໜາຢາກເກີດມາໃນທ້ອງຖິ່ນອັນທຸລະກັນດານ, ປ່າເຂົາລຳເນົາໄພ, ຫ່າງໄກສອກຫຼີກ ຫຼືເກີດໃນຄອບຄົວອະນາຖາ, ບໍ່ມີເງິນສົ່ງເສຍໃຫ້ໄດ້ຮຽນສູງໆ, ບໍ່ມີວຽກເຮັດງານທຳ, ແຕ່ສຸດທ້າຍກໍຕ້ອງລົງເອີຍດ້ວຍຄຳວ່າ ເລືອກເກີດບໍ່ໄດ້ ນັ້ນກໍໝາຍຄວາມວ່າ ເມື່ອເກີດມາແລ້ວເຖິງຈະຢູ່ໃນສະພາບໃດກໍຕ້ອງດິ້ນຮົນເພື່ອເອົາຕົວລອດ ແລະກໍບໍ່ໄດ້ໝາຍຄວາມວ່າບຸກຄົນທີ່ດິ້ນຮົນດ້ວຍເຫື່ອແຮງຂອງຕົນ ຈົນບາງເທື່ອໄດ້ເອົາກຽດສັກສີ, ພົມມະຈາລີ ລວມທັງເລືອດເນື້ອເຂົ້າແລກປ່ຽນ ນັ້ນບໍ່ມີແນວຄິດຈິດໃຈ ຫຼືບໍ່ຮູ້ຈັກລະອາຍຕໍ່ສັງຄົມ ແຕ່ເຂົາກະທຳລົງໄປກໍເພື່ອຕົນເອງແລະຄອບຄົວຢູ່ລອດ ໃນສັງຄົມທີ່ພວມມີການຂັດແຍ້ງແຂ່ງກັນກັນສູງ.

 

ທ່າມກາງການຈະລາຈອນຕາມທ້ອງຖະໜົນຂອງນະຄອນຫຼວງວຽງຈັນ ແອອັດພໍສົມຄວນເພາະເປັນເວລາເລີກຈາກໜ້າວຽກໜ້າງານຂອງຜູ້ຄົນ. ລົດກະບະໄຮລັກວີໂກ້ແລ່ນມາແຕ່ໄຟແດງທາດຝຸ່ນຢ່າງໄວ ເພື່ອຈະລ້ຽວຊ້າຍໄປທາງປະຕູໄຊ ແຕ່ບັງເອີນມີລົດຈັກຄັນໜຶ່ງແລ່ນມາແຕ່ທາງປະຕູໄຊ ເພື່ອຈະລ້ຽວຊ້າຍໄປທາງໂພນໄຊ ລົດຈັກຄັນດັ່ງກ່າວພະຍາຍາມລ້ຽວຊ້າຍມາຫຼາຍໆເພື່ອຫຼີກຈາກແລວຂອງລົດກະບະ ແຕ່ລົດກະບະກໍລ້ຽວຂວາມາຫຼາຍໆເພື່ອຫຼີກລົດຈັກ ຜົນສຸດທ້າຍກໍບໍ່ເວັ້ນລົດຈັກຄັນນັ້ນຍົນເຂົ້າໃສ່ຫົວລົດກະບະຄັນດັ່ງກ່າວດັງ ໂຄມ!! ບາດແຮງໆ

 

“ຫູ້ !! ຊິລ້ຽວມາຫາຕາຍອີ່ຫຍັງທາງນີ້ !” ຊາຍເຈົ້າຂອງລົດກະບະໂວຍວາຍທັງເປີດປະຕູລົດລົງມາ ໃນຂະນະທີ່ຊາຍຜູ້ໜຶ່ງກຳລັງນອນໝົດສະຕິຢູ່ກາງຖະໜົນ. ຜູ້ຄົນຈຳນວນຫຼວງຫຼາຍຫຸ້ມເບິ່ງ ແຕ່ກໍບໍ່ມີໃຜກ້າທີ່ຈະເອົາຊາຍຄົນນັ້ນໄປໂຮງໝໍ. ບາງຄົນກໍວ່າ “ຢ່າເຂົ້າໃກ້ເດີ ຈັກໜ້ອຍເຂົາຊິວ່າເຮົາເປັນຜູ້ຕຳໃດ໋ !”, ບາງຄົນກໍວ່າ “ຊ່ວຍລາວແດ່ແມ໋ ພາກັນເບິ່ງເສີຍຢູ່ເຮັດຫຍັງ !”, ພວກທີ່ໂບກລົດທີ່ກາຍທາງມາກໍຖືກປະຕິເສດ “ເຂົາເຈົ້າຢ້ານຕາຍໃສ່ລົດເຂົາ ເຂົາຢ້ານຊວຍ, ບໍ່ຄືແມ່ມານໃດ! ພວກໂຊເຟີ້ລົດເຂົາວ່າຖ້າແມ່ມານເກີດລູກໃສ່ລົດແມ່ນຈະເຮັດໃຫ້ລົດເຮັງ, ຫາເງິນຫາຄຳງ່າຍ” ແມ່ຕູ້ຍ່າງຂ້າງທາງເວົ້າຂຶ້ນ.

“ໂອ້ຍ! ຄັນຈັ່ງຊັ້ນຄົນເຈັບກາຕາຍກ່ອນຫັ້ນຕີ!, ຊ່ວຍຄົນເຈັບໃຫ້ພຸ້ນຈາກຄວາມຕາຍກາໄດ້ບຸນຫຼາຍຄືກັນຫັ້ນແລ້ວ, ຢ່າພາກັນເຊື່ອແນວບໍ່ສົມຄວນເຊື່ອຫຼາຍ” ຍິງຜູ້ໜຶ່ງອາຍຸປະມານ 30 ປີ ເວົ້າຂຶ້ນ ກ່ອນຜູ້ຊາຍຄົນນັ້ນຈະຖືກສົ່ງໄປໂຮງໝໍດ້ວຍລົດຄັນໜຶ່ງ.

 

 

– “ເປັນຈັ່ງໃດອ້າຍຄຳໃສ ຮູ້ສຶກໂຕແລ້ວບໍ? ອ້າຍບໍ່ຕ້ອງຢ້ານຫຍັງເດີ່ ທ່ານໝໍເພິ່ນວ່າອ້າຍພົ້ນຂີດອັນຕະລາຍແລ້ວ” ແມ່ຍິງທີ່ຢູ່ຂ້າງຕຽງເວົ້າຂຶ້ນຄ່ອຍໆ

 

– “ເອິ…ອະ…ແມ່ນໃຜເອົາອ້າຍມານີ້” ຜູ້ຊາຍຜູ້ນັ້ນເວົ້າຂຶ້ນມາດ້ວຍສຽງແຫບເຄືອ.

 

– “ກາ…ນ້ອງນີ້ລະເປັນຜູ້ເອົາມາ, ນ້ອງເຫັນອ້າຍນອນໝົດສະຕິຢູ່ກາງທາງ ທີ່ມີຄົນຫຸ້ມເບິ່ງຢູ່, ນ້ອງກໍເລີຍຂໍຮ້ອງເຂົາເຈົ້າເອົາອ້າຍຂຶ້ນລົດນ້ອງ ແລ້ວພາມາສົ່ງໂຮງໝໍນີ້ລະ”

 

– “ຂອບໃຈນ້ອງຫຼາຍໆເດີ ທີ່ຊ່ວຍເຫຼືອຊີວິດອ້າຍເອົາໄວ້, ອ້າຍບໍ່ຮູ້ວ່າຊິຕອບບຸນແທນຄຸນນ້ອງແນວໃດຈຶ່ງຊິເໝາະສົມ”

 

– “ບໍ່ເປັນຫຍັງດອກອ້າຍຄຳໃສ ນ້ອງເຫັນອ້າຍຟື້ນມານ້ອງກໍດີໃຈແລ້ວ, ນ້ອງຈະໂທຫາຄອບຄົວຂອງອ້າຍ. ຄ່າໃຊ້ຈ່າຍໃນການນອນໂຮງໝໍແລະສ້ອມແປງລົດ ທັງລົດອ້າຍແລະລົດເຂົາເຈົ້ານັ້ນ ນ້ອງຂໍຮັບຜິດຊອບແທນ, ເພາະ….”

 

– “ອ້າວ! ເປັນຫຍັງນ້ອງຈຶ່ງມາຮັບຜິດຊອບຄ່າໃຊ້ຈ່າຍໝົດທຸກຢ່າງ, ອີກອັນໜຶ່ງກໍບໍ່ແມ່ນອ້າຍເປັນຄົນຜິດ ເຮົາຕ້ອງໃຫ້ເຂົາເຈົ້າຫັ້ນຕີ ເປັນຜູ້ມາຈ່າຍຄ່າຢຸກຄ່າຢາ ພ້ອມທັງຕ້ອງແປງລົດໃຫ້ເຮົາພ້ອມ”

 

– “ອ້າຍຄຳໃສ.!… ຕຳຫຼວດເພິ່ນວ່າອ້າຍເປັນຜູ້ຜິດ ເພາະໃນເວລາເກີດເຫດນັ້ນ ອ້າຍມາແຕ່ທາງນ້ອຍ, ສ່ວນເຂົານັ້ນມາແຕ່ທາງໃຫຍ່ ພ້ອມທັງຍັງແມ່ນທາງເບື້ອງຂວາຂອງອ້າຍອີກ. ສ່ວນສາເຫດໃດນ້ອງຈຶ່ງຮັບຊ່ວຍເລື່ອງຄ່າໃຊ້ຈ່າຍນັ້ນມັນຍາວ, ບາດອ້າຍຫາຍດີແລ້ວນ້ອງຈຶ່ງຈະເລົ່າໃຫ້ຟັງ”.

 

—===000===—

 

 

 

ຄ່ຳຄືນໜຶ່ງຂອງປີ 2001 ອາກາດເໜັບໜາວພໍສົມຄວນ ຄຳໃສ ເລັ່ງລົດຈັກອອກຈາກຮົ້ວຫໍພັກຢ່າງໄວວາ ໂດຍບໍ່ຫົວຊາກັບອາກາດທີ່ໜາວເຢັນຫຍັງໝົດ, ຜູ້ຄົນທີ່ຢືນອ້ອມກອງໄຟ ພາກັນ ຫຼຽວໄປທາງສຽງລົດຄັນນັ້ນ ໄດ້ເຫັນຕັ້ງແຕ່ຄວັນ ບາງຄົນກໍເອີ້ນດ່າມັນພ້ອມ.

 

– “ແມ່ນຟ້າວໄປຕີເສິກຕີເສືອທາງໃດມັນເດ້!” ຊາຍໜຸ່ມຜູ້ໜຶ່ງເວົ້າຂຶ້ນ

 

– “ມັນຊິໄປຕີເສິກຕີເສຍຫຍັງມັນ ມັນຟ້າວໄປຮ້ານເບຍຫອມ ນ໋າຫັ້ນນ໋າ!” ຊາຍໜຸ່ມຜູ້ທີ່ສອງເວົ້າຂຶ້ນ

 

– “ແມ່ນຫຍັງເບຍມີຫຼາຍຊະນິດແທ້ຫວ໋າ, ເບຍຫອມກາມີຊັ້ນເບາະ! ?”

 

ຊາຍໜຸ່ມຜູ້ທີໜຶ່ງຫົວຂຶ້ນ “ຮາ!..ໆ..! ເບຍມັນກາມີແຕ່ເບຍດຽວຫັ້ນລະ, ອັນເບຍຫອມນັ້ນແມ່ນທັງດື່ມເບຍແດ່ ກໍໄດ້ຫອມ ໄດ້ກອດໄປນຳພ້ອມ”

 

– “ໂອ໋… ຫວ໋າ… ຄິດວ່າເບຍຫອມຄືນ້ຳໝາກພ້າວນີ້ຊັ້ນດອກ!”

 

ຄຳໃສເປັນຊາຍໜຸ່ມທີ່ຂຶງຂັງມັງມໍ, ກ້າມແຄ່ງກ້າມຂາເປັນຫຼຳເປັນກ້ອນ, ຕື່ນນອນແຕ່ລະມື້ກໍແມ່ນ ແປດໂມງຍັງພຸ້ນລະໄປ໋ ໄຄແດ່ແຕ່ຫໍພັກຢູ່ໃກ້ກັບໂຮງຮຽນ ແຕ່ປານນັ້ນກໍຍັງເຂົ້າຫ້ອງຊ້າເກືອບທຸກມື້. ແຕ່ຖ້າມີຊຸມມີແຊວຢູ່ໃສກໍແມ່ນເພິ່ນມີໜ້າກ່ອນໝູ່, ເບິ່ງເຂົາແລ້ວຄືຄົນບໍ່ມີຫົວໃຈນີ້ລະ ແຕ່ລະມື້ມີແຕ່ຫຼິ້ນກັບກິນ, ໄປໂຮງຮຽນກໍໄປພໍແລ້ວຮີດ, ຕອນແລງກໍພໍແຕ່ມືດເພິ່ນກໍບິດຄັນເລັ່ງດັງຄັບບ້ານຄັບເມືອງເຂົ້າໄປຫຼິ້ນແຖວໃນເມືອງພຸ້ນ ກວ່າຈະກັບກໍຕ້ອງສາມສີ່ໂມງເຊົ້າ, ດີແຕ່ວ່າພໍ່ແມ່ເປັນຄົນມີເງິນ ເຂົາຈຶ່ງຍຸທ່າງຫຼິ້ນຍຸທ່າງກິນ.

 

ຮ້ານຂາຍເບຍຮ້ານໜຶ່ງປະດັບເອ້ດ້ວຍດອກໄຟສີລະຍິບລະແຍັບ, ຢູ່ທາງໃນມີໂຕະອາຫານຢູ່ສາມສີ່ໜ່ວຍ, ຢູ່ແຈເບື້ອງຊ້າຍມືຂອງປະຕູແມ່ນໂຊຟາ, ແສງສະຫວ່າງໃນຮ້ານພໍລົວໆ, ຫຼຽວເຫັນໜ້າກັນເປັນບາດຕາມຈັງຫວະຂອງດອກໄຟ.

 

– “ເຈ້ໆ!… ເບຍສອງ ນ້ຳກ້ອນໜຶ່ງ” ຄຳໃສ ຍົກມືເບື້ອງໜຶ່ງຂຶ້ນ ຊີ້ນິ້ວອອກເປັນງ່າມແຖມດ້ວຍນິ້ວໂປ້ຢູ່ຫວ່າງກາງ.

 

– “ເຈົ້າ..!.. ຖ້າບຶດໜຶ່ງເດີເຮຍ” ເຈ້ ເຈົ້າຂອງຮ້ານຕອບພ້ອມທັງສົ່ງສັນຍານໃຫ້ຜູ້ສາວເອົາເບຍແລະນ້ຳກ້ອນມາໃຫ້.

 

– “ອ້າຍ ບໍ່ເອົາຂອງແກ້ມແດ່ຫວ໋າ, ກິນເບຍບໍ່ມີຂອງແກ້ມ ກໍປານນອນຍາມໜາວບໍ່ມີສາວກອດຫັ້ນຕີ໋ອ້າຍ..!”

 

ຄຳໃສ ທັງຍິ້ມທັງຄິດໃນໃຈວ່າ “ອັນເອີ້ນໝູ່ເປັນອ້າຍຫັ້ນນ໋າ ເບິ່ງໜ້າເຖົ້າກວ່າແມ່ຊ້ຳອີກ ຊິໃຫ້ຂ້ອຍເອີ້ນເຈົ້າເປັນນ້ອງໄດ້ຈັ່ງໃດ”

 

– “ເອົາຫອມແກ້ມດີກວ່າ… ເລືອກເອົາໃບອ່ອນໆແດ່ເດີ ອາຍຸອ່າວຫຼາຍແລ້ວແຂ້ວບໍ່ຄ່ອຍດີ”

 

– “ຈັ່ງໃດກາໄດ້ອ້າຍ ແຕ່ລຸ້ນທີ່ໃບຍັງອ່ອນມັນຫາຍາກ ລາຄາກໍຂ້ອນຂ້າງແພງ” ເຈ້ເຈົ້າຂອງຮ້ານເວົ້າແລ້ວກໍຍ່າງເຂົ້າໄປອີກຫ້ອງໜຶ່ງ.

 

ບໍ່ພໍສອງນາທີທຸກຢ່າງກໍພຽບພ້ອມ ທັງເບຍນ້ອງມືອ່ອນທີ່ມີໃບໜ້າສົດໃສ ເບິ່ງຊົງແລ້ວກໍບໍ່ຄືສາວທີ່ບໍລິການຢູ່ຕາມຮ້ານແບບນີ້ພໍປານໃດ

 

– “ຂໍໂທດ ນ້ອງຊື່ຈັ່ງໃດ ບອກອ້າຍໄດ້ບໍ ພໍໄດ້ຮ້ອງງ່າຍ”

 

– “ນ້ອງຊື່ດາວ, ອ້າຍເດຊື່ຫຍັງ?”

 

– “ອ້າຍຊື່ຄຳໃສ, ນ້ອງມາເຮັດວຽກຢູ່ນີ້ດົນປານໃດແລ້ວ?”

 

– “ນ້ອງຫາກໍ່ມາບໍ່ທັນຮອດອາທິດຊ້ຳ”

 

– “ໂອ… ຫວ໋າ, ຈັ່ງຊີ້ລະອ້າຍມັກ“ ຄຳໃສທັງເວົ້າ ທັງຍົກມືເບື້ອງທີ່ໜີບກອກຢາຂຶ້ນມາລູບປາກຂອງໂຕເອງ ດ້ວຍທ່າທີອ່ານກິນແນວໃດກໍແນວນັ້ນ.

 

ນ້ອງດາວສາວບ້ານນາທີ່ຫາກໍມາພໍ້ແສງສີບໍ່ພໍເທົ່າໃດມື້ ຊວນຄຳໃສຍົກຈອກນີ້ຈອກໃໝ່ ພ້ອມທັງປ່ອຍຄາລົມອັນໜ້າຮັກແບບໄຮ້ດຽງສາ ປາສະຈາກເລ່ລ່ຽມໃດໆ.

 

ຍິ່ງດື່ມຍິ່ງແຊບ, ຍິ່ງເດິກຍິ່ງໜາວ, ຍິ່ງໜາວຍິ່ງຍັບເຂົ້າ ແຕ່ຄຳໃສກໍຕ້ອງແປກໃຈເມື່ອດາວເຫັນຄຳໃສຍັບເຂົ້າ ເຂົາຊ້ຳພັດຍັບອອກ. ຄຳໃສພະຍາຍາມປະຕິບັດການດ້ວຍມືອັນເປື້ອນດ້ວຍນ້ຳເຫຼົ້ານ້ຳເບຍຢ່າງຖະໜັດ ແຕ່ດາວກໍພະຍາຍາມປ້ອງກັນຕົນເອງໄວ້ເພື່ອບໍ່ໃຫ້ຄຳໃສລວນລາມເກີນຂອບເຂດ.

 

– “ເຈົ້າເປັນຫຍັງ, ເຈົ້າບໍ່ເຕັມໃຈບໍລິການຂ້ອຍຫວ໋າ?” ຄຳໃສໂວຍວາຍຂຶ້ນ ພ້ອມທັງສົ່ງສາຍຕາສະແດງອາການຂົ່ມຂູ່.

 

– “ນ້ອງຂໍໂທດ, ນ້ອງໃຫ້ອ້າຍລວນລາມຕາມໃຈມັກບໍ່ໄດ້ດອກ”

 

– “ເປັນຫຍັງຈັ່ງບໍ່ໄດ້, ເຈົ້າຢ້ານຫຍັງ… ຢ້ານຂ້ອຍບໍ່ມີເງິນຈ່າຍໃຫ້ເຈົ້າຫວ໋າ?”

 

– “ບໍ່ແມ່ນຢ້ານອ້າຍບໍ່ມີເງິນ, ແຕ່ນ້ອງຢ້ານ…” ດາວທັງເວົ້າທັງສັ່ນທົດໆ

 

– “ຢ້ານຫຍັງ.!.!.. ຫຼືເຈົ້າລັງກຽດຂ້ອຍຫວ໋າ, ເບິ່ງຊິລາຍງານເລື່ອງເຈົ້າໃຫ້ເຈ້ຟັງເດີ່”

 

– “ໂອ້ຍ! ຂໍນຳເທາະອ້າຍ ຄັນເອື້ອຍເພິ່ນຮູ້ຢ້ານເພິ່ນຊິຮ້າຍຊິດ່ານ້ອງ” ດາວນົບມືຂໍຮ້ອງ

 

– “ຄັນເຈົ້າບໍ່ມັກເລື່ອງແບບນີ້ ເຈົ້າຄືມາເຮັດວຽກຢູ່ນີ້?”

 

– “ກະ…!. ບໍ່ແມ່ນນ້ອງຢາກເຮັດວຽກແນວນີ້, ແຕ່ນ້ອງບໍ່ຮູ້ວ່າຢູ່ບ່ອນນີ້ຕ້ອງເຮັດວຽກຄືຈັ່ງຊີ້, ຖ້າບໍ່ດັ່ງນັ້ນນ້ອງກໍບໍ່ມາດອກ ອ້າຍເອີຍ! ເມື່ອມານີ້ແລ້ວນ້ອງຊິກັບເມືອບ້ານມືເປົ່າກໍຄືວ່າເຮັດໃຫ້ພໍ່ແມ່ຜິດຫວັງໂພດ, ດຽວນີ້ແມ່ນແຕ່ເງິນຈະຈ້າງລົດກັບບ້ານກໍຍັງບໍ່ມີ !”

 

– “ອ້າວ ກະດຽວວ່າມາເຮັດວຽກແບບນີ້ມັນໄດ້ເງິນດີ ບໍ່ແມ່ນຫວ໋າ?“

 

“ໂອ້ຍ ! ຊິໄດ້ດິບໄດ້ດີຈັ່ງໃດເດ້ ອ້າຍເອີຍ ! ຂາຍເບຍແກ້ວໜຶ່ງນ້ອງກໍໄດ້ເປີເຊັນສອງພັນກີບ ອ້າຍວ່ານ້ອງຕ້ອງຂາຍເບຍຈັກແກ້ວຈັ່ງຊິໄດ້ເງິນພໍທີ່ຈະໃຫ້ຄ່າລົດກັບບ້ານ”

 

– “ບໍ່ຍາກຖ້າຢາກໄດ້ເງິນກັບບ້ານ ທະແນມແຕ່ວ່າຕອບສະໜອງຕາມທີ່ຂ້ອຍຕ້ອງການ”

 

– “ໂອ້..! ຄັນອ້າຍມີວຽກດີໆໃຫ້ນ້ອງເຮັດກໍແນະນຳນ້ອງແດ່ ”

 

– “ເອີ…ກະ… ມື້ນີ້ໄປນອນນຳຂ້ອຍ !… ” ຄຳໃສເວົ້າອອກມາແບບໜ້າຕາເສີຍ

 

– “ໂອຍ !… ນ້ອງໄປນຳອ້າຍບໍ່ໄດ້ດອກອ້າຍເອີຍ, ຂໍນຳທ້ອນ ນ້ອງໄປນຳບໍ່ໄດ້ ນ້ອງຢ້ານ !…”

 

– “ເປັນຫຍັງຈັ່ງບໍ່ໄດ້” ເຈ້ ເຈົ້າຂອງຮ້ານເວົ້າຂຶ້ນພາຍຫຼັງທີ່ຈອບຟັງການຖົກຖຽງກັນຂອງຄຳໃສກັບດາວມາດົນແລ້ວ. “ບໍ່ໄດ້ກໍຕ້ອງໄດ້ ! ມັນຊິຍາກຫຍັງ ທະແນມແຕ່ທົນດົມກິ່ນເຫຼົ້າກິ່ນເບຍ ກິ່ນຢາສູບໃຫ້ໄດ້ແລ້ວ ທຸກຢ່າງມັນກໍຫາກເປັນໄປເອງດອກ”

 

– “ເອື້ອຍເອີ້ຍ..!.. ນ້ອງຂໍນຳທ້ອນ ນ້ອງເຮັດແບບນັ້ນບໍ່ໄດ້ດອກ, ນ້ອງອາຍສັງຄົມ ອາຍເທວະດາ ແລະກໍລະອາຍໃຈໂຕເອງ”

 

– “ມຶງຊິຕາຍຍ້ອນອາຍຫັ້ນລະ ເຮັດແນວຊິໄດ້ເງິນໄດ້ຄຳກໍຕ້ອງອົດຕ້ອງທົນແດ່ຫັ້ນລະ”

 

– “ກໍແມ່ນຢູ່ດອກເອື້ອຍ, ຖ້າມັນເປັນວຽກທີ່ຜ່ອງໃສຂາວສະອາດ ເຖິງຈະໜັກໜາສາຫັດສ່ຳໃດນ້ອງກໍຊິອົດທົນເຮັດ”

 

– “ມຶງຊິວ່າອາຊີບນີ້ບໍ່ບໍລິສຸດຊັ້ນຫວ໋າ!, ອາຊີບນີ້ບໍ່ໄດ້ໄປລັກໃຜມາກິນເດີ ກູຊິບອກໃຫ້!”

 

– “ແຕ່ນ້ອງເຫັນວ່າອາຊີບນີ້ເປັນອາຊີບທີ່ສັງຄົມຍອມຮັບບໍ່ໄດ້”

 

– “ເປັນຫຍັງຈັ່ງບໍ່ໄດ້ ມີແຕ່ມຶງຫັ້ນລະຮັບບໍ່ໄດ້, ຄັນຮັບບໍ່ໄດ້ເຂົາຊິຕັ້ງຮ້ານຂຶ້ນມາບໍ?”

 

– “ກໍຫາກແມ່ນຢູ່ດອກເອື້ອຍເອີຍ! ແຕ່ເອື້ອຍກໍຕັ້ງຮ້ານຂາຍເບຍຕີ ບໍ່ໄດ້ຕັ້ງຮ້ານແນວອື່ນຕີ໋ !…”

 

– “ມຶງຢ່າມາຖຽງ ຄັນມຶງເກັ່ງເປັນຫຍັງມຶງຈຶ່ງມາເຮັດວຽກຢູ່ນີ້”

 

– “ບໍ່ແມ່ນນ້ອງຖຽງ ຄັນນ້ອງຮູ້ວ່າໃຫ້ມາເຮັດວຽກແບບນີ້ ຈ້າງນ້ອງກໍບໍ່ມາດອກ, ຢູ່ບ້ານເຮັດໄຮ່ເຮັດສວນ ກັບພໍ່ແມ່ນ້ອງ ກໍຍັງມີຄວາມສຸກດີກວ່ານີ້”

 

– “ເອີຄັນມຶງມັກຈັ່ງຊັ້ນກູູກະຊິໃຫ້ມຶງຢ່າງສົມໃຈ,… ມຶງກຽມເອົາເຄື່ອງຂອງມຶງໜີອອກຈາກຮ້ານກູໄປແຕ່ດຽວນີ້” ເຈ້ເຈົ້າຂອງຮ້ານເວົ້າແລ້ວກໍຈັບເອົາຖົງເຄື່ອງຂອງດາວຖິ້ມໃຫ້ດາວທັນທີ.

 

ດາວທັງເກັບເອົາເຄື່ອງໃສ່ຖົງທັງຮ້ອງໄຫ້ຢ່າງໜ້າອີ່ດູຕົນ, ຄວາມຫວັງທີ່ດາວວາດຝັນມາແຕ່ບ້ານຄືມາຊອກວຽກເຮັດງານທຳເພື່ອຈະໄດ້ສົ່ງເງິນໃຫ້ພໍ່ແມ່ເດືອນລະເລັກລະໜ້ອຍ ແຕ່ດາວໂຊກຮ້າຍທີ່ຖືກຕົວະໃຫ້ມາເຮັດວຽກທີ່ຕົນເອງຖືວ່າເປັນວຽກທີ່ບໍ່ຖືກຕ້ອງຕາມຮີດຄອງປະເພນີລາວ, ກາງຄ່ຳຍາມຄືນຂະໜາດນີ້ດາວຊິໄປທາງໃດ, ດາວຊິກັບບ້ານໄດ້ຈັ່ງໃດ, ພໍ່ແມ່ຂອງດາວຢູ່ບ້ານຄືຊິຄິດວ່າດາວຄົງຈະໄດ້ວຽກດີມີເງິນເດືອນ ແຕ່ອະນິດຈາ ດາວຕ້ອງມາຕົກຢູ່ໃນສະພາບແບບນີ້, ອາຊີບເສີມສວຍທີ່ມີໃນໃຈຄົງຈະບໍ່ປະສົບຜົນສຳເລັດ, ໃຜເດຈະມາຊ່ວຍເຫຼືອດາວ, ອະນາຄົດຂອງດາວຈະເປັນຈັ່ງໃດໃຜຊິຮູ້… ຂ້ອຍໄດ້ແຕ່ພາວະນາຂໍໃຫ້ດາວຈົ່ງໄດ້ໃນສິ່ງທີ່ເຂົາປາຖະໜາ

 

-“ດາວ… ນ້ອງຕັ້ງໃຈດີໆ ຟັງອ້າຍເວົ້າເດີ, ນ້ອງບໍ່ຕ້ອງຢ້ານອ້າຍອີກ ອ້າຍເຮັດຫຍັງໃຫ້ນ້ອງບໍ່ໄດ້ແລ້ວລະ, ຖ້ານ້ອງບໍລິສຸດຜຸດຜ່ອງແທ້, ຕ້ອງການເຮັດວຽກແທ້ ອ້າຍອາດຈະຊ່ວຍເຫຼືອນ້ອງໄດ້, ດຽວນີ້ອ້າຍຮູ້ແລ້ວວ່າຫົວໃຈນ້ອງເປັນແນວໃດ, ອ້າຍກໍເປັນຄົນມາແຕ່ບ້ານນອກຄືກັນ ອ້າຍເຂົ້າໃຈນ້ອງດີ ແລ້ວອ້າຍຊິພານ້ອງໄປຫາວຽກທີ່ນ້ອງຢາກເຮັດໃຫ້ໄດ້…” ຄຳໃສເວົ້າໃຫ້ກຳລັງໃຈ ພ້ອມທັງພາດາວໄປນອນກັບໝູ່ຜູ້ຍິງຢູ່ຮ້ານເສີມສວຍແຫ່ງໜຶ່ງ ກ່ອນທີ່ຄຳໃສຈະກັບເມືອນອນຫໍພັກ.

ບົດຄວາມຫຼ້າສຸດ

ສຕລ ປະກາດລາຍຊື່ນັກກິລາທີມຊາດລາວ ຍູ 23 ເຂົ້າຮ່ວມການແຂ່ງຂັນບານເຕະ ຊາຍຊິງແຊ້ມອາຊຽນ ຮຸ່ນອາຍຸບໍ່ເກີນ 23 ປີ ທີ່ປະເທດອິນໂດເນເຊຍ.

ປະກາດ 23 ລາຍຊື່ນັກກິລາທີມຊາດລາວ ຮ່ວມການແຂ່ງຂັນບານເຕະ ຊາຍຊິງແຊ້ມອາຊຽນ ຮຸ່ນອາຍຸບໍ່ເກີນ 23 ປີ ທີ່ປະເທດອິນໂດເນເຊຍ. ໃນວັນທີ 11 ກໍລະກົດ 2025 ສະຫະພັນບານເຕະແຫ່ງຊາດລາວ (ສຕລ)...

ດາວດວງໃໝ່! ສາຍແສງໃນເວທີສາກົນ ອອດສະກ້າ ນັກກິລາໜຸ່ມນ້ອຍລາວ ອອກເດີນທາງຮ່ວມຝຶກຊ້ອມກັບສະໂມສອນ ຄອນເນຢາ

ນ້ອງ ອອດສະກ້າ ອາຍຸ 11 ປີ ໜຸ່ມນ້ອຍແຄ່ງລູກເຂົ້າໜຽວ ອອກເດີນທາງຮ່ວມຝຶກຊ້ອມກັບສະໂມສອນ ຄອນເນຢາ ທີ່ປະເທດແອັດສະປາຍ. ກາຍເປັນອີກຂ່າວດີຂອງວົງການກິລາບານເຕະເຍົາວະຊົນລາວ ອີກໜຶ່ງຜົນງານໃນເວທີສາກົນ ທ້າວ ສີນໄຊ ຫຼວງບຸນເຮືອງ ຫຼື...

ເຈົ້າໜ້າທີ່ຕຳຫຼວດໄທຈັບກຸມ ໜຸ່ມຮັກສັດເລືອກທາງຜິດ ຂາຍຢາບ້າເພື່ອຫາເງິນຊື້ອາຫາານໃຫ້ໝາ-ແມວ

ໜຸ່ມໄທຮັກສັດເລືອກທາງຜິດ ຂາຍຢາບ້າເພື່ອຊື້ອາຫານມາລ້ຽງໝາ-ແມວ 30 ກວ່າໂຕ ສຳນັກຂ່າວໄທລັດລາຍງານໃນວັນທີ 9 ກໍລະກົດ 2025 ຜ່ານມາ, ເຈົ້າໜ້າທີ່ຕຳຫຼວດໄທ ຮ່ວມກັບພາກສ່ວນກ່ຽວຂ້ອງໄດ້ລົງພຶ້ນທີ່ເພື່ອແກ້ໄຂບັນຫາຢາເສບຕິດ ຕາມການລາຍງານຂອງພົນລະເມືອງດີວ່າມີກຸ່ມຄົນຄ້າຂາຍຢາເສບຕິດໃນຊຸມຊົນແຫ່ງໜຶ່ງໃນ ຈັງຫວັດ ສຣະແກ້ວ ປະເທດໄທ. ຕາມການລົງພຶ້ນທີ່ຕົວຈິງຂອງເຈົ້າໜ້າທີ່ໄທສາມາດຈັບຕົວຜູ້ຖືກຫາໄດ້ໜຶ່ງຄົນ...

ມອບ-ຮັບວຽກງານສື່ມວນຊົນ (ວຽກຖະແຫລງຂ່າວ) ມາຂຶ້ນກັບຄະນະໂຄສະນາອົບຮົມສູນກາງພັກ ຢ່າງເປັນທາງການ

ມອບ-ຮັບວຽກງານສື່ມວນຊົນ (ວຽກຖະແຫລງຂ່າວ) ມາຂຶ້ນກັບຄະນະໂຄສະນາອົບຮົມສູນກາງພັກ. ພິທີເຊັນບົດບັກທຶກ ມອບ-ຮັບວຽກງານສື່ມວນຊົນ (ວຽກຖະແຫລງຂ່າວ) ຈາກກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ມາຂຶ້ນກັບຄະນະໂຄສະນາອົບຮົມສູນກາງພັກ ຈັດຂຶ້ນໃນວັນທີ 8 ກໍລະກົດ 2025,...