ວັນທີ 3 ກໍລະກົດ ປີ 1992 ຫຼືມື້ນີ້ເມື່ອ 24 ປີທີ່ແລ້ວ ເປັນມື້ວາງຈຳໜ່າຍຂອງເກມ Prince of Persia ເທິງເຄື່ອງ Super Famicom ທີ່ປະເທດຍີ່ປຸ່ນ. ໂດຍເກມ Prince of Persia ຈັດວ່າເປັນ 1 ໃນຊີຣີອຳມະຕະທີ່ໄດ້ເຮັດພາກຕໍ່ອອກມາຫຼາຍພາກ ເຊິ່ງເອກກະລັກຂອງເກມນີ້ແມ່ນເປັນເກມແອັກຊັ່ນຮູບແບບ 2D ທີ່ຜູ້ຫຼິ້ນຈະຕ້ອງຜ່ານດັນຈ້ຽນໃນແຕ່ລະດ່ານ ແລະພາຍໃນດ່ານກໍຈະມີທັງກັບດັກ, ປິດສະໜາກົນໄກຕ່າງໆ ລວມໄປເຖິງສັດຕູທີ່ເກັ່ງໆຖ້າເຮົາຢູ່. ທັງນີ້ ເກມ Prince of Persia ແມ່ນເປັນເກມທີ່ມີຕົ້ນກຳເນີດມາຈາກເຄື່ອງຄອມພິວເຕີ Apple II ແລະວາງຈຳໜ່າຍຕັ້ງແຕ່ປີ 1989 ມາກ່ອນຈົນໄດ້ຮັບກະແສຄວາມນິຍົມແບບຖະຫຼົ່ມທະລາຍ ຈຶ່ງໄດ້ມີການພອຣ໌ດສູ່ແພລັດຟອຣ໌ມອື່ນໆອີກຫຼາຍເຄື່ອງ. ອີກຢ່າງໜຶ່ງ ເກມນີ້ເປັນຜົນງານການອອກແບບໂດຍ ທ່ານຈໍແດນ ເເມກເນີ້ (Jordan Mechner) ຜູ້ທີ່ເຄີຍພັດທະນາເກມ Karateka (ເກມຕໍ່ສູ້ຄາຣາເຕ້ທີ່ຕ້ອງແລ່ນລຸຍເທິງເກາະໄປສູ້ກັບເຈົ້າສຳນັກຂອງຝ່າຍຮ້າຍເພື່ອຊ່ວຍນາງເອກອອກມາ)

ສຳລັບເນື້ອເລື່ອງຂອງ Prince of Persia ພາກທຳອິດຈະກ່າວເຖິງນະຄອນເປີເຊຍໃນຍຸກບູຮານ ເມື່ອສຸນຕ່ານຜູ້ຄອງອານາຈັກເປີເຊຍໄດ້ໄປອອກຮົບໃນແຜ່ນດິນຕ່າງແດນລະຫວ່າງນັ້ນ ຈາບຟາຣ໌ ຂຸນນາງມືຂວາຂອງສຸນຕ່ານທີ່ເປັນພໍ່ມົດສາດມືດໄດ້ຄິດແຜນກໍ່ກະບົດ ດ້ວຍການຈັບໂຕເຈົ້າຍິງທີ່ເປັນລູກສາວຂອງສຸນຕ່ານໄປຂັງໄວ້ທີ່ຫໍຄອຍ ພ້ອມກັບຍື່ນເງື່ອນໄຂທີ່ນາງຈະຕ້ອງຕັດສິນໃຈພາຍໃນ 60 ນາທີວ່າຈະຍອມຕາຍ ຫຼືຍອມຕົກເປັນເມຍຂອງຈາບຟາຣ໌ (ໃນເວີຊັ່ນ Super Famicom ເວລາຕັດສິນໃຈຈະປ່ຽນເປັນ 120 ນາທີ). ສ່ວນພະເອກຂອງເກມນີ້ ແມ່ນເຈົ້າຊາຍຈາກຕ່າງແດນຮັກກັນກັບເຈົ້າຍິງມາກ່ອນແລ້ວ ແຕ່ຖືກທະຫານຂອງຈາບຟາຣ໌ຈັບໂຕໄປທໍລະມານແລະເປັນນັກໂທດໃນດັນຈ້ຽນຂອງຈາບຟາຣ໌ ແຕ່ວ່າເຈົ້າຊາຍສາມາດແຫກຄຸກອອກມາໄດ້ ເຊິ່ງມີເປົ້າໝາຍຫຼັກຄືຫາທາງໜີອອກຈາກດັນຈ້ຽນເພື່ອໄປປາບຈາບຟາຣ໌ ແລະຊ່ວຍເຈົ້າຍິງກ່ອນທີ່ເວລາຈະໝົດລົງ.

ທາງດ້ານລະບົບເກມ ຜູ້ຫຼິ້ນຈະໄດ້ບັງຄັບໂຕເຈົ້າຊາຍບຸກລຸຍດັນຈ້ຽນທັງໝົດ 20 ດ່ານ ແລະແຕ່ລະດ່ານກໍຈະມີທະຫານຂອງຈາບຟາຣ໌ປະຈຳຢູ່ໃນແຕ່ລະຈຸດ ພ້ອມດ້ວຍກັບດັກສາລະພັດຢ່າງທີ່ຖືກແລ້ວຕາຍລູກດຽວບໍ່ວ່າຈະເປັນພື້ນໜາມ, ກິໂຢຕີນ, ລູກຕຸ້ມແລະອື່ນໆ. ໃນລະຫວ່າງທີ່ເຮົາຫຼິ້ນກໍຈະມີແກ້ວຢາໃຫ້ເຮົາຈັບມາດື່ມ ບາງແກ້ວກໍຈະມີສັບພະຄຸນຟື້ນພະລັງຊີວິດທີ່ເສຍໄປ, ບາງແກ້ວເປັນຢາພິດທີ່ກິນແລ້ວຈະເສຍພະລັງຊີວິດ ແລະບາງແກ້ວກິນແລ້ວຈະເພີ່ມຂີດພະລັງຊີວິດໃຫ້ຍາວຂຶ້ນ. ໃນສ່ວນຂອງສັດຕູກໍຈະມີຕັ້ງແຕ່ພວກກະຈອກ ຈົນເຖິງລະດັບແມ່ທັບທະຫານ ຫຼືຖ້າເປັນດ່ານຫຼັງໆກໍຈະມີສັດຕູທີ່ບໍ່ແມ່ນມະນຸດເຊັ່ນ: ໂຄງກະດູກຫຼືອະສູນລະກາຍບູຮານ ອອກມາຕໍ່ສູ້ກັບເຮົາ ເຊິ່ງໃນດ່ານສຸດທ້າຍ ຜູ້ຫຼິ້ນຈະໄດ້ພົບກັບຈາບຟາຣ໌ ໃນການຕໍ່ສູ້ຮອບທຳອິດມັນຈະໃຊ້ເວດມົນສູ້ກັບເຮົາແລະຫາກເອົາຊະນະໄດ້ ມັນຈະປ່ຽນຮູບແບບການສູ້ມາເປັນດວນດາບກັບເຮົາ ສຸດທ້າຍເມື່ອເຮົາສັງຫານຈາບຟາຣ໌ໄດ້ ມົນສະກົດຈະຄາຍລົງເຮັດໃຫ້ເຮົາສາມາດເຂົ້າໄປຊ່ວຍເຈົ້າຍິງໄດ້ສຳເລັດ.

ໝາຍເຫດ: ສຳລັບກິໂຢຕີນ ແມ່ນຄຳມາຈາກ Guillotine ພາສາຝຣັ່ງ ເຊິ່ງເປັນຊື່ເອີ້ນອຸປະກອນປະຫານຊີວິດຂອງຝຣັ່ງ.

Fact ເລັກນ້ອຍກ່ຽວກັບເກມ Prince of Persia

• ທ່ານຈໍແດນ ແມກເນີ້ ໄດ້ເລີ່ມພັດທະນາເກມນີ້ມາຕັ້ງແຕ່ປີ 1985 ເຊິ່ງເປັນປີທີ່ລາວຈົບການສຶກສາທີ່ມະຫາວິທະຍາໄລເຢວ (Yale) ປະເທດສະຫະລັດອາເມຣິກາ ໂດຍໃນເວລານັ້ນທ່ານແມກເນີ້ໄດ້ເຄີຍພັດທະນາເກມ Karateka ຈົນສຳເລັດແລະວາງຈຳໜ່າຍໄປແລ້ວຮຽບຮ້ອຍ ແລະລາວເອງກໍກຳລັງທີ່ຈະເຮັດເກມພາກຕໍ່ຂອງ Karateka ຢູ່ຄືກັນ ແຕ່ທາງບໍລິສັດ Brøderbund ທີ່ເປັນຜູ້ຈັດຈຳໜ່າຍເກມ Karateka ນັ້ນຢາກຈະລອງໃຫ້ອິດສະຫຼະແກ່ທ່ານແມກເນີ້ໃນການສ້າງເກມໃໝ່ ທ່ານແມກເນີ້ເລີຍພະຍາຍາມຄົ້ນຫາແຫຼ່ງຂໍ້ມູນທີ່ພໍຈະເປັນແຮງບັນດານໃຈໃນການສ້າງເກມໃໝ່ແລະໃນທີ່ສຸດໂປຣເຈັກການພັດທະນາ Prince of Persia ກໍເລີ່ມຂຶ້ນໂດຍມີວັນນະກຳເລື່ອງ Arabian Nights ແລະຮູບເງົາເລື່ອງ Raiders of the Lost Ark ມາເປັນຕົ້ນແບບໃຫ້ກັບເກມດັ່ງກ່າວ.

• Prince of Persia ພາກທຳອິດ ແມ່ນເປັນ 1 ໃນເກມທີ່ຖືກນຳໄປພອຣ໌ດລົງແພລັດຟອຣ໌ມຕ່າງໆ ຫຼາຍທີ່ສຸດເກມໜຶ່ງຂອງໂລກ ໂດຍນັບມາຈົນຮອດປັດຈຸບັນ ເກມນີ້ໄດ້ຖືກພອຣ໌ດຢ່າງເປັນທາງການມາແລ້ວ 22 ແພລັດຟອຣ໌ດ (ບໍ່ນັບລວມ Apple II ທີ່ເປັນເຄື່ອງທຳອິດທີີ່ Prince of Persia ພັດທະນາມາລົງໃຫ້)

• ເຖິງວ່າເກມນີ້ຈະໄດ້ຮັບຄຳຊົມຈາກນັກວິຈານແລະຜູ້ຫຼິ້ນຫຼາກຫຼາຍ ແຕ່ໃນດ້ານຍອດຂາຍແລ້ວເກມ Prince of Persia ພັດເຮັດໄດ້ບໍ່ດີພໍ ເມື່ອເວີຊັ່ນທຳອິດທີ່ລົງໃຫ້ກັບເຄື່ອງ Apple II ແລະ PC ຂາຍໄດ້ພຽງ 7,000 ຊຸດໃນປີທຳອິດຂອງການວາງຈຳໜ່າຍ ຈົນມາເຖິງການພອຣ໌ດລົງເກມຄອນໂຊນແລ້ວນຳມາຂາຍທີ່ປະເທດຍີ່ປຸ່ນແລະທະວີບຢຸໂຣບ ຍອດຂາຍຈຶ່ງເພີ່ມຂຶ້ນມາທັນໃດ ຈົນມາຮອດຊ່ວງພັດທະນາເກມ Prince of Persia 2: The Shadow and the Flame ກໍໄດ້ມີການນັບຍອດຂາຍພາກທຳອິດຈາກທຸກແພລັດຟອຣ໌ມອີກຄັ້ງ ແລະພົບວ່າສາມາດເຮັດຍອດຂາຍໄປໄດ້ປະມານ 2 ລ້ານຊຸດທົ່ວໂລກ.

• ສຳລັບເວີຊັ່ນເຄື່ອງ Super Famicom ທີ່ຈຳໜ່າຍໃນປະເທດສະຫະລັດອາເມຣິກາ ໄດ້ມີການຕັດເອົາສາກທີ່ເຈົ້າຊາຍຖືກທໍລະມານຕອນຕົ້ນເກມອອກໄປ ເນື່ອງຈາກຕິດຂໍ້ກົດໝາຍດ້ານການນຳສະເໜີຄວາມແຮງໃນສື່ບັນເທີງທີ່ຕິດເຣດ T (Teen) ເທິງໜ້າກ່ອງເກມທີ່ເໝາະກັບເຍົາວະຊົນອາຍຸ 13 ປີຂຶ້ນໄປນັ້ນເອງ (ໃນອາເມຣິກາເກມທີ່ຈະໃສ່ສາກຄວາມຮຸນແຮງໄດ້ຈະຕ້ອງເປັນເຣດ M (Mature) ທີ່ເໝາະກັບຜູ້ຫຼິ້ນອາຍຸ 17 ປີຂຶ້ນໄປ)

• ສຳລັບໃຜທີ່ຢາກກັບໄປຫຼິ້ນເກມນີ້ຄືນອີກເທື່ອໜຶ່ງສາມາດນຳເອົາລະຫັດນີ້ໄປໃຊ້ໄດ້ເລີຍເດີ້

– H8J12+Y = ເລີ່ມດ່ານທີ 20 (ດ່ານສຸດທ້າຍ)  ທັນທີ

– H477ST7 = ເລີ່ມດ່ານທີ 20 ໂດຍມີພະລັງຊີວິດເຕັມ 20 

– UUUUUUW = ເລີ່ມດ່ານທຳອິດໂດຍມີພະລັງຊີວິດເຕັມ 20

• ໃນດ່ານທີ 20 ຂອງເວີຊັ່ນເຄື່ອງ Super Famicom ເມື່ອເລີ່ມສາກໃຫ້ຍ່າງໄປທາງຂວາ ແລ້ວໂຕເຮົາຈະອອກມາທີ່ນອກປ່ອງຢ້ຽມຂອງປະສາດ ເມື່ອຮອດບ່ອນນີ້ໃຫ້ຢືນຊື່ໆປະມານ 6 ວິນາທີ ຈະມີພາບຂອງເຈົ້າຍິງທີ່ປະກົດເທິງທ້ອງຟ້າຍາມຄ່ຳຄືນ ເຊິ່ງເປັນ Easter Eggs ຂອງເກມນັ້ນເອງ.

ທີ່ມາ:online station,ເດັກລາວ