ເມື່ອເວລາ 14:00 ໂມງ ຕອນບ່າຍຂອງມື້ວານນີ້ ທີ່ສະໂມສອນຊັ້ນ 2 ຂອງມະຫາວິທະຍາໄລແຫ່ງຊາດ ໄດ້ມີກອງປະຊຸມສະຫລຸບວຽກງານທຶນມູນນິທິການສຶກສາ ສົກສຶກສາ 2015-2016 ຂຶ້ນ. ໃຫ້ກຽດເປັນປະທານໂດຍທ່ານສົນທະນີ ຫລວງໄຊຊະນະ ຮອງປະທານກອງທຶນມູນນິທິມະຫາວິທະຍາໄລແຫ່ງຊາດ ພ້ອມດ້ວຍຄູອາຈານໃນແຕ່ລະຄະນະ ທີ່ຮັບຜິດຊອບວຽກງານນີ້ ແລະນັກສຶກສາທຸກໆຄະນະທີ່ໄດ້ຮັບທຶນຈາກພາກສ່ວນຕ່າງໆເຂົ້າຮ່ວມເປັນຈຳນວນຫລວງຫລາຍ.
ທ່ານສົນທະນີ ຫລວງໄຊຊະນະ ໄດ້ໃຫ້ກຽດຂຶ້ນລາຍງານ ເຊິ່ງມີລາຍລະອຽດດັ່ງນີ້ :
“ວຽກງານມູນນິທິການສຶກສາ ແມ່ນວຽກງານໜຶ່ງທີ່ຂຶ້ນກັບຫ້ອງການຄຸ້ມຄອງນັກສຶກສາ ແລະມີຫົວໜ້າພະແນກຄຸ້ມຄອງນັກສຶກສາຄະນະວິຊາຕ່າງໆ ພ້ອມດ້ວຍອາຈານທີ່ຮັບຜິດຊອບວຽກງານມູນນິທິການສຶກສາ ເປັນຜູ້ຊ່ວຍປະສານງານກັບນັກສຶກສາ. ນອກຈາກນີ້ີ້ ທຶນ LANS&ມູນນິທິເອເຊຍ ທີ່ໄດ້ຮຽນພາສາອັງກິດທຸກວັນເສົາ ແລະອາທິດນັ້ນ ຍັງມີອາຈານສອນພາສາອັງກິດປະຈຳຫ້ອງ ເປັນຜູ້ໃຫ້ຄຳເປິກສາໄດ້ທຸກເວ ລາ.
ວຽກງານທຶນການສຶກສານີ້ ມີຄະນະກຳມະການກອງທຶນຂຶ້ນ ມຊ ຈຳນວນ 9 ທ່ານ ເຊິ່ງຕາງໃຫ້ຫ້ອງການ ແລະພາກສ່ວນທີ່ກ່ຽວຂ້ອງເຊັ່ນ : ຫ້ອງການຄຸ້ມຄອງນັກສຶກສາ, ຫ້ອງການວິຊາການ, ຫ້ອງການການເງິນ, ຫ້ອງການພົວພັນຕ່າງປະເທດ ແລະສາມອົງການຈັດຕັ້ງມະຫາຊົນຂັ້ນ ມຊ ໂດຍແມ່ນອະທິການບໍດີ ມຊ ເປັນຜູ້ຕົກລົງເຫັນດີ.
ທຶນມູນນິທິການສຶກສາ ແມ່ນທຶນການສຶກສາທີ່ອົງການສາກົນ ແລະບໍລິສັດຕ່າງໆມອບໃຫ້ແກ່ການສຶກສາ ມຊ ເພື່ອໃຊ້ຈ່າຍເຂົ້າໃນການສຶກສາຮໍ່າຮຽນໃນຂະນະທີ່ກຳລັງສຶກສາຢູ່ໃນ ມຊ, ເຊິ່ງຜູ້ທີ່ຈະໄດ້ຮັບທຶນຕ່າງໆນັ້ນ ກໍຕໍ່ເມື່ອໄດ້ຜ່ານການຄັດເລືອກ ຫລືສຳພາດຈາກຄະນະກຳມະການກອງທຶນມູນນິທິການສຶກສາແຕ່ລະຂັ້ນ ໂດຍອີງໃສ່ເງື່ອນໄຂຂອງທາງອົງການສາກົນ ຫລືບໍລິສັດກຳນົດໃຫ້ ເຊິ່ງຈະແຍກອອກເປັນ 3 ປະເພດຄື :
- ທຶນການສຶກສາສຳລັບຜູ້ທີ່ຮຽນເກັ່ງ ເຊັ່ນ : ທຶນນາກາໂອະ.
- ທຶນການສຶກສາສຳລັບສາຂາວິຊາ ແລະເປັນຜູ້ທີ່ຮຽນເກັ່ງ ມີການປະພຶດດີ ເຊັ່ນ ທຶນທະນາຄານລົງທຶນ ແລະພັດທະນາຫວຽດນາມ, ທຶນມູນນິທິເອເຊຍ.
- ທຶນການສຶກສາສຳລັບນັກສຶກສາທີ່ທຸກຍາກ, ມີການປະພຶດດີ ແລະມີຜົນການຮຽນ 2,00 ຂຶ້ນໄປ.
ສົກສຶກສາ 2015-2016 ມຊ ໄດ້ຮັບທຶນມູນນິທິການສຶກສາຈາກ 13 ອົງການຄື :
| ລຳດັບ | ຊື່ທຶນ | ຈຳນວນທັງໝົດ |
| 1 | A&H FUJIMOTO | 18 |
| 2 | ສະຖານທູດອົດສະຕາລີ (ທຶນແລນສ LANS) | 259 |
| 3 | WCC | 20 |
| 4 | YAMADA OSAMITSU | 40 |
| 5 | ນາກາໂອະ | 75 |
| 6 | ລາວໂທລະຄົມ | 20 |
| 7 | ສະມາຄົມ ໂຣຕາຣີ | 11 |
| 8 | ບໍລິສັດເບຍລາວ | 120 |
| 9 | ທູດ ສປ ຈີນ | 82 |
| 10 | ມູນນິທິເອເຊຍ | 35 |
| 11 | ມິດສຸບິຊິ | 20 |
| 12 | ຟູສາຄິຈິອາຣາຍ | 9 |
| 13 | ທະນາຄານລົງທຶນ ແລະພັດທະນາຫວຽດນາມ BIDV | 9 |
ມີນັກສຶກສາໄດ້ຮັບທຶນຈຳນວນທັງໝົດຈຳນວນ 718 ຄົນ; ຍິງຈຳນວນ 352 ຄົນ ຖ້າທຽບໃສ່ຜູ້ທີ່
ໄດ້ຮັບທຶນໃນປີທີ່ຜ່ານມາ ແມ່ນເພີ່ມຂຶ້ນ 14,7 ຖ້າທຽບໃສ່ຈຳນວນນັກສຶກສາທັງໝົດໃນ ມຊ ມີນັກສຶກສາໄດ້ຮັບທຶນການສຶກສາເທົ່າກັບ 3,19 ມີນັກສຶກສາທຶນທີ່ຈະສຳເລັດການສຶກສາຈຳນວນ 156 ຄົນ.
ການເບີກຈ່າຍເງິນທຶນການສຶກສາ ແມ່ນໄດ້ເບີກໃຫ້ນັກສຶກສາເປັນເດືອນລະຄັ້ງ, 3 ເດືອນຕໍ່ຄັ້ງ ແລະປີໜຶ່ງຄັ້ງດຽວ ໂດຍອີງໃສ່ຈຸດພິເສດຂອງແຕ່ລະທຶນທີ່ໃຫ້ການຊ່ວຍເຫລືອ ໃນນີ້ ມີຈຳນວນ 3 ທຶນ ທີ່ເຈົ້າຂອງທຶນເປັນຜູ້ຈ່າຍໃຫ້ເອງ ໂດຍການໂອນເງິນເຂົ້າບັນຊີຂອງນັກສຶກສາໂດຍກົງ (ທຶນ LANS, ASIA ແລະເບຍລາວ).
ຈຳນວນເງິນໃຫ້ນັກສຶກສາຜູ້ໜຶ່ງຕໍ່ປີ ຕໍ່າສຸດແມ່ນ 2.000.000 ກີບ ແລະສູງສຸດແມ່ນ 13.000.000 ກີບ. ລວມເງິນອົງການ ແລະບໍລິສັດຕ່າງໆທີ່ນັກສຶກສາ ມຊ ທັງໝົດປະມານ 2.091.733.000 ກີບ.
ນັກສຶກສາທີ່ໄດ້ຮັບທຶນ ສ່ວນຫລາຍແມ່ນຜູທີ່ຄອບຄົວທຸກຍາກ, ຂາດເຂີນທາງດ້ານເສດຖະກິດ-ການເງິນ, ແຕ່ມີຈິດໃຈສູ້ຊົນ, ບຸກບືນຕໍ່ການຮຽນ ແລະເປັນຜູ້ມີການປະພຶດດີ, ນອກຈາກນີ້ ມູນນິທິການສຶກສາຍັງໄດ້ໃຫ້ທຶນການສຶກສາແກ່ນັກສາທີ່ມີຜົນການຮຽນເກັ່ງ ໂດຍບໍ່ເລືອກເຟັ້ນຖານະຄອບຄົວທຸກຍາກ ຫລືີຮັ່ງມີ ໂດຍສະເພາະແມ່ນທຶນ ນາກາໂອະ ເຊິ່ງສົ່ງເສີມແຕ່ນັກສຶກສາທີ່ຮຽນເກັ່ງໃນສາຂາວິຊາທີ່ກ່ຽວ ຂ້ອງກັບສິ່ງແວດລ້ອມ.
ນອກນີ້ ໃນງານດັ່ງກ່າວຍັງໄດ້ມີກິດຈະກຳຮ້ອງເພງຂອງບັນດານັກສຶກສາ ແລະທາງທະນາຄານຮ່ວມພັດທະນາ ຫລື JDB BANK ໄດ້ເຜີຍແຜ່ຂໍ້ມູນກ່ຽວກັບການກູ້ຢືມທຶນການສຶກສາສຳລັບນັກສຶກສາຜູ້ທີ່ຮຽນປະລິນຍາຕີ ແລະປະລິນຍາໂທ ເຊິ່ງເປັນອີກຫົນທາງໜຶ່ງທີ່ເປີດໂອກາດໃຫ້ນັກສຶກສາໄດ້ມີທຶນຮອນ ເພື່ອໃຊ້ເຂົ້າໃນການຮໍ່າຮຽນຈົນຈົບ.
ງານດັ່ງກ່າວໄດ້ອັດລົງຢ່າງເປັນຜົນສຳເລັດ ເວລາປະມານ 16 ໂມງປາຍ ເຊິ່ງໄດ້ນຳເອົາຄວາມພາກພູມໃຈມາສູ່ທຸກໆຄົນຢ່າງທຸກຖ້ວນໜ້າ.