ສະວັດດິກະ ເຄື່ອງໝາຍແຫ່ງຄວາມຈະເລີນຂອງໂລກ

ເມື່ອເຫັນຮູບນີ້ແລ້ວ ມີຫລາຍຄົນ (ອາດຈະ) ຄິດວ່າເປັນເຄື່ອງໝາຍຂອງພັກນາຊີ ຂອງຈອມຜະເດັດການຮິດເລີ ຜູ້ນຳຟາດຊິດໃນຊ່ວງສົງຄາມໂລກຄັ້ງທີສອງ ຜູ້ສັ່ງເຂັນຂ້າຊາວຢິວໄປຫລາຍລ້ານຄົນ ເຮັດໃຫ້ເຄື່ອງໝາຍນີ້ ຖືກຕີຄວາມໝາຍຈາກຊາວຢິວວ່າບໍ່ດີ ແລະຄົນເຢຍລະມັນກໍບໍ່ມັກ. ແຕ່ໃນຄວາມຈິງແລ້ວ ເຄື່ອງໝາຍນີ້ເປັນເຄື່ອງໝາຍແຫ່ງຄວາມເປັນສິລິມຸງຄົນທີ່ສຸດ ພຽງແຕ່ວ່າມີຄົນເອົາໄປນຳໃຊ້ຜິດທີ່ຜິດທາງເທົ່ານັ້ນ ໂດຍສະເພາະກໍແມ່ນຮິດເລີນັ້ນລະ ມີຫລາຍໆຄົນໃນບ້ານເຮົາທີ່ຍັງບໍ່ທັນເຂົ້າໃຈເທື່ອ ມື້ນີ້ ເຮົາມາຮຽນຮູ້ຄວາມຈິງກ່ຽວກັບເຄື່ອງໝາຍແປກໆນີ້ນຳກັນເລີຍເນາະ!.

ຄຳວ່າ “ສະວັດດິກະ” ມາຈາກຄຳໃນພາສາສັນສະກິດວ່າ ສຸ+ອັດສະດິ+ກະ ແປວ່າ “ຄວາມສຸກສະຫວັດດີຈົ່ງມີ” (ວັດຈະນານຸກົມ ດຣ.ທອງຄໍາ ອ່ອນມະນີສອນ ໜ້າ 254) ໃຫ້ຄວາມໝາຍວ່າ ເປັນລາຍກາກະບາດເງາະລົງທາງຂວາ ໃຊ້ເປັນເຄື່ອງໝາຍມາແຕ່ບູຮານ ສັນນິຖານວ່າ ແມ່ນຮູບຕາເວັນເດີນວຽນຂວາ. ຄວາມໝາຍລວມຂອງມັນ ແມ່ນເປັນເຄື່ອງໝາຍແຫ່ງພົນລະວັດ, ການເຄື່ອນໄຫວ, ຄວາມບໍ່ຢຸດຢູ່ກັບທີ່, ຄວາມປ່ຽນແປງຕະຫລອດເວລາ ແລະເປັນເຄື່ອງໝາຍແຫ່ງການຫລໍ່ລ້ຽງຊີວິດ.

ສະວັດດິກະນີ້ ໄດ້ຖືກປາກົດໃນງານສິລະປະມາແລ້ວຫລາຍຍຸກຫລາຍສະໄໝ ເມື່ອເຮົາຍ້ອນເວລາໄປໃນອະດີດ ເຮົາຈະເຫັນມັນຕິດແປະຕິດແປດຢູ່ນຳສາສະນະສະຖານທາງສາສະໜາຮິນດູ, ສາສະໜາເຊນ ແລະສາສະໜາພຸດ ຫລາຍໆປະເທດໃນອາຊີ, ເກັກ, ເອີລົບ ແລະຄົນພື້ນເມືອງອະເມລິກາກໍນຳໃຊ້ເປັນສັນຍະລັກໃນການສື່ສານ ໂດຍສະເພາະແມ່ນການໃຊ້ເປັນສັນຍະລັກທາງສາສະໜາ ແລະເທບພະເຈົ້າ.

ໃນພາບແຕ້ມພະພິຄະເນດໃນປະເທດອິນເດຍສ່ວນຫລາຍແລ້ວ ຈະມີເຄື່ອງໝາຍສະວັດດິກະວາດແຕ້ມໃສ່ໄວ້ໃຫ້ຢູ່ໃນສ່ວນໃດສ່ວນໜຶ່ງຂອງພາບນັ້ນໆ ເຊັ່ນ ກາງໜ້າຜາກ, ບໍລິເວນງວງ, ຝ່າມື ຫລືປາກົດໃນສ່ວນອື່ນໆ ທີ່ບໍ່ແມ່ນຮ່າງກາຍຂອງພະພິຄະເນດ ເປັນຕົ້ນວ່າ ໜັງສື, ຕາມຝາໃນບ່ອນຕ່າງໆ…. ເມື່ອຊາວຮິນດູພົບພໍ້ກັບສັນຍະລັກນີ້ ຈະໃຫ້ຄວາມເຄົາລົບເປັນຢ່າງຍິ່ງເຊັ່ນດຽວກັບເຄື່ອງໝາຍໂອມ.

ບາດນີ້ ເຮົາມາຮູ້ເລື່ອງຄວາມແຕກຕ່າງລະຫວ່າງເຄື່ອງໝາຍຂອງພັກນາຊີ ກັບເຄື່ອງໝາຍສະວັດດິກະພະພິຄະເນດກັນເນາະ!

ເຄື່ອງໝາຍສະວັດດິກະຂອງພັກນາຊີ ຈະອຽງ 45 ອົງສາ ແລະບໍ່ມີຈຸດ.

ເຄື່ອງໝາຍສະວັດດິກະຂອງພະພິຄະເນດ ຈະຕັ້ງຊື່ ບໍ່ອຽງ ແລະມີຈຸດ 4 ຈຸດ ຢູ່ລະຫວ່າງແຂນທັງສີ່ ສຳລັບແຂນທີ່ຫັກອອກນັ້ນ ຈະຫັກໄປທາງຊ້າຍຫລືຂວາກໍແລ້ວແຕ່ນັກຈິດຕະກອນຈະວາດແຕ້ມໄວ້ ໂດຍສ່ວນໃຫຍ່ຈະມີແຂນຫັກຊີ້ອອກໄປທາງຂວາ (ຕາມເຂັມຂອງໂມງ).

ສັນຍະລັກສະວັດດິກະ ຖືວ່າເປັນເຄື່ອງໝາຍທີ່ເກົ່າແກ່ທີ່ສຸດຢ່າງໜຶ່ງຂອງໂລກ ມີມາບໍ່ຕໍ່າກວ່າ 5 ພັນປີແລ້ວ ບາງປຶ້ມບາງຕຳລາຈະໃຫ້ຄວາມໝາຍວ່າ 4 ແຊກຂອງສັນຍະລັກສະວັດດິກະນັ້ນ ໝາຍເຖິງມືທັງສີ່ຂອງພະພິຄະເນດ ຫລືໝາຍເຖິງຄຳພີພະເວດທັງ 4 ເຫລັ້ມ, ສ່ວນໃນຕຳລາຂອງພະພຸດທະສາສະໜາທາງຝ່າຍມະຫາຍານເພິ່ນກໍວ່າ 4 ແຊກຂອງສະວັດດິກະນັ້ນໝາຍເຖິງ ດິນ, ນ້ຳ, ລົມ ແລະໄຟ ທາດທຳມະຊາດຂອງໂລກ ເຊິ່ງນິຍົມໃຊ້ຄຽງຄູ່ກັບເຄື່ອງໝາຍ ຫຍິນ-ຫຍາງ ຕະຫລອດຮອດເປັນເຄື່ອງໝາຍແຫ່ງທຳມະຈັກ ແລະມີອີກຫລາຍຕຳລາທີ່ເວົ້າໄປໃນແງ່ຂອງຄວາມເປັນສິລິມົງຄຸນ.

ຮູບລຸ່ມນີ້ ຄືເຄື່ອງໝາຍສະວັດດິກະທີ່ປາກົດໃນທຸກພາກສ່ວນ ແລະທຸກມູມຂອງໂລກ