ເຂົ້າອໍເກນິກກະສີກຳສະອາດຜະລິດຕະພັນຈາກບໍລິສັດປາວິນາ ພັດທະນາກະສີກຳ ຈຳກັດ ໄດ້ຮັບຄວາມສົນໃຈສູງຈາກສັງຄົມ ພາຍຫຼັງທີ່ເຈົ້າຂອງຜະລິດຕະພັນດັ່ງກ່າວໄດ້ນຳໄປວາງສະແດງຂາຍໃນງານມະຫະກຳທ່ອງທ່ຽວອະນຸຮັກອາຊຽນປີ 2016 ທີ່ແຂວງຈຳປາສັກເປັນເຈົ້າພາບ, ຂະນະທີ່ເຈົ້າຂອງກິດ ຈະການດີໃຈ ແລະຢືນຢັນຈະພັດທະນາຜະລິດຕະພັນດັ່ງກ່າວອອກສູ່ວົງກວ້າງ.
ທ່ານ ນາງ ບຸນມີ ແກ້ວສີປະເສີດ ຜູ້ອຳນວຍການບໍລິສັດ ປາວິນາ ພັດທະນາ ກະສີກຳ ຈຳກັດ ໃຫ້ຮູ້ໃນໂອກາດທີ່ໄດ້ ນຳເອົາຜະລິດຕະພັນຂອງຕົນເຂົ້າຮ່ວມວາງສະແດງໃນງານມະຫະກຳການທ່ອງທ່ຽວອະນຸຮັກອາຊຽນທີ່ຈັດຂຶ້ນໃນລະຫວ່າງວັນທີ 22-25 ມິຖຸນາ 2016 ຜ່ານ ມານີ້ຢູ່ແຂວງຈຳປາສັກວ່າ: ບໍລິສັດຂອງພວກເຮົາໄດ້ສ້າງຕັ້ງຂຶ້ນໃນປີ 2010 ເປົ້າໝາຍຂອງບໍລິສັດແມ່ນສ້າງຂຶ້ນເພື່ອສົ່ງເສີມປະຊາຊົນປູກເຂົ້າ ແລະໄດ້ເລີ່ມ ບຸກເບີກເນື້ອທີ່ເພື່ອທຳການຜະລິດເຂົ້າອໍເກນິກ ຫຼຶຶື ກະສີກຳທີ່ສະອາດໃນເນື້ອທີ່ 400 ເຮັກຕາ, ຢູ່ເຂດບ້ານໜອງບົວທອງ ເມືອງມົນລະປະໂມກ ແຂວງຈຳປາສັກ, ຊຶ່ງໃນເບື້ອງຕົ້ນປີ 2005 ການຜະລິດຍັງບໍ່ທັນເປັນຂະບວນການເນື່ອງຈາກເປັນພື້ນທີ່ບຸກເບີກໃໝ່ ເຮັດໃຫ້ການຜະລິດຍັງບໍ່ທັນເຕັມມິດເຕັມໜ່ວຍ ແຕ່ຕົກມາຮອດປະຈຸບັນທາງບໍລິສັດໄດ້ມີເນື້ອທີ່ເພື່ອທຳການຜະລິດແລ້ວ 700 ກວ່າ ເຮັກຕາ ແລະສາມາດປູກເຂົ້າໄດ້ທັງໝົດ 5 ຊະນິດຄື: ເຂົ້າໄກ່ນ້ອຍ, ເຂົ້າບົວຈະ, ເຂົ້າຈ້າວພໍ່ເຖົ້າ, ເຂົ້າຈ້າວຫອມປາວິນາ ແລະເຂົ້າໜຽວຫອມປາວິນາ ຊຶ່ງເຂົ້າທີ່ປູກດັ່ງກ່າວໄດ້ນຳມາຜະລິດເປັນຜະລິດຕະພັນເຂົ້າອໍເກນິກ ກະສີກຳທີ່ສະອາດຄື: ເຂົ້າໜຽວຫອມໄກ່ນ້ອຍ, ເຂົ້າຈ້າວຫອມປາວິນາ, ເຂົ້າຈ້າວຫອມພໍ່ເຖົ້າກາຊາວນາ ແລະຊາເຂົ້າໜຽວບົວຈະກາຮວງເຂົ້າ ຊຶ່ງປະຈຸບັນໄດ້ວາງຈຳໜ່າຍຢູ່ທີ່ສູນການຄ້າແຟຣນຊິບຂອງກຸ່ມບໍລິສັດຕັງຈະເລີນ ແລະຈຳໜ່າຍທີ່ບໍລິສັດເອງບ້ານໂຊກອຳນວຍ ເມືອງປາກເຊ ແຂວງຈຳປາສັກ.
ນອກຈາກບໍລິສັດປະວິນາພັດທະນາກະສີກຳ ຈຳກັດ, ໄດ້ລົງທຶນເຂົ້າໃສໃນການປູກເຂົ້າອິນຊີແລ້ວ ປະຈຸບັນບໍລິສັດຍັງໄດ້ສົ່ງເສີມ ແລະເກັບຊື້ເຂົ້າຈ້າວທົ່ວ ໄປນຳປະຊາຊົນເຂດດັ່ງກ່າວນຳອີກ ຊຶ່ງບໍລິສັດມີຕະຫຼາດຮອງຮັບທີ່ແນ່ນອນຢູ່ປະເທດມົງໂກເລຍ ໃນການເຊັນສັນຍາຮ່ວມກັນເພື່ອໃຫ້ບໍລິສັດສະໜອງເຂົ້າຈ້າວໃຫ້ປີໜຶ່ງ 1 ພັນໂຕນ.
ທ່ານຜູ້ອຳນວຍການຍັງໃຫ້ຮູ້ຕື່ມວ່າ: ຕົນມີຄວາມດີໃຈຫຼາຍທີ່ເຫັນວ່າສັງຄົມ ໃຫ້ຄວາມສົນໃຈຕໍ່ຜະລິດຕະພັນທີ່ຜະລິດອອກມາ, ໂດຍສະເພາະໃນງານມະຫະ ກຳທ່ອງທ່ຽວອະນຸຮັກອາຊຽນປີ 2016 ເຖິງແມ່ນວ່າການຜະລິດຍັງມີຈຳກັດ ແລະຍັງບໍ່ທັນກວ້າງຂວາງກໍຕາມ ແຕ່ຕົນຈະພະຍາຍາມສ້າງໃຫ້ຜະລິດຕະພັນດັ່ງກ່າວມີການຂະຫຍາຍຕົວອອກໄປເລື້ອຍໆ ຊຶ່ງມາຮອດປະຈຸບັນແມ່ນໄດ້ສຳເລັດການປັກດຳເຂົ້ານາປີ 700 ເຮັກຕາ, ເພື່ອກຽມໃສ່ການຜະລິດຕອບສະໜອງສັງຄົມໃຫ້ຫຼາຍຂຶ້ນ.
ທີ່ມາ: 