ເລື່ອງນີ້ໄດ້ເກີດຂຶ້ນໃນປີ 2011 ທີ່ຜ່ານມາ ແລະ ກາຍເປັນອຸທາຫອນໃຫ້ແກ່ຫຼາຍໆຄົນທີ່ຮູ້ເທົ່າບໍ່ເຖິງການ ຫຼື ຄິດໜ້ອຍເກີດໄປໃນການຕັດສິນໃຈໂດຍບໍ່ຄຳນຶງເຖິງຜົນກະທົບໄລຍະຍາວ.ໂດຍມີກໍລະນີມີເດັກຊາຍຈີນຄົນໜຶ່ງອາຍຸ 17 ປີ ໄດ້ຕັດສິນໃຈລັກຂາຍໄຕຂອງຕົນເອງ ເພື່ອທີ່ຈະເອົາເງິນໄປຊື້ໄອໂຟນ.
ໃນປີ 2011 ນັ້ນ, ໄອໂຟນ 4 ກາຍມາເປັນສັນຍະລັກທາງເຕັກໂນໂລຊີ ທີ່ໃຜມີແລ້ວຈະຕ້ອງເປັນຄົນທີ່ຖືກຍອມຮັບຈາກສັງຄົມ ແຕ່ຍ້ອນຄອບຄົວຂອງເດັກຊາຍຄົນນີ້ມີຖານະຍາກຈົນ ຈຶ່ງເຮັດໃຫ້ໄດ້ແຕ່ຄິດ ເພາະບໍ່ມີເງິນຊື້ໂທລະສັບຄືຄົນອື່ນ.
ມາມື້ໜຶ່ງໄດ້ມີຂໍ້ຄວາມສົ່ງເຂົ້າມາຫາເດັກຊາຍຄົນນີ້ ໂດຍບອກວ່າ ຄົນເຮົາມີໄຕສອງຂ້າງແຕ່ໃຊ້ພຽງຂ້າງດຽວກໍມີຊີວິດຢູ່ໄດ້ແລ້ວ. ເປັນຫຍັງເຈົ້າຄືບໍ່ຂາຍຂ້າງໜຶ່ງແລ້ວເອົາເງິນມາໃຊ້. ພາຍຫຼັງໄດ້ຮັບຂໍ້ຄວາມນີ້ ເດັກຊາຍກໍໄດ້ລັກຕິດຕໍ່ກັບຄົນແປກໜ້າ ແລະ ຍອມຂາຍໄຕໄປຂ້າງໜຶ່ງ, ໃນການຜ່າຕັດໄດ້ດຳເນີນການຂຶ້ນແບບຜິດກົດໝາຍ ແລະ ຫຼັງຈາກຜ່າເອົາໄຂ່ຫຼັງອອກແລ້ວກໍໄດ້ມອບເງິນໃຫ້ເດັກຊາຍ ຈໍານວນ 20,000 ຢວນ ຫຼື ປະມານ 60,000,000 ລ້ານກີບ, ເຊິ່ງພຽງພໍທີ່ຈະສາມາດຊື້ ໄອໂຟນ 4 ໄດ້.
ພາຍຫຼັງການຜ່າຕັດ, ແມ່ຂອງເດັກຊາຍກໍໄດ້ສົງໄສເຮັດໃຫ້ເດັກຊາຍຈຶ່ງໄດ້ສາລະພາບວ່າຂາຍໄຂ່ຫຼັງໄປແລ້ວ ເຊິ່ງກຸ່ມນາຍໜ້າທີ່ຮັບຊື້ບອກວ່າຈະສາມາດຟື້ນຕົວໄດ້ພາຍໃນ 1 ອາທິດ, ແຕ່ໃນການຜ່າຕັດໃນຄັ້ງນັ້ນບໍ່ໄດ້ມີມາດຕະຖານ ສົ່ງຜົນກະທົບໃຫ້ເຮັດໃຫ້ໄຂ່ຫຼັງອີກຂ້າງໜຶ່ງມີການຕິດເຊື້ອຮຸນແຮງ ຕ້ອງເຂົ້າຮັບການຮັກສາຢູ່ໂຮງໝໍ ແລະ ຕ້ອງຟອກໄຂ່ຫຼັງເປັນປະຈຳ ລວມເຖິງມີພາວະແຊກຊ້ອນອື່ນໆອີກເຊັ່ນ: ເມື່ອຍ, ໄຂ້ ແລະ ປັດສະວະເປັນເລືອດ.
ຜ່ານມາ 14 ປີ, ຈາກເດັກຊາຍກາຍເປັນຜູ່ໃຫຍ່ນີ້ມີອາຍຸ 31 ປີ ແລະ ກາຍມາເປັນຄົນເຈັບຕິດຕຽງ ທີ່ຖືກຈັດຢູ່ໃນລະດັບພິການຂັ້ນທີ 3 ທີ່ສູນເສຍການເຮັດວຽກຂອງໄຂ່ຫຼັງໄປເຖິງ 75%, ເຖິງແມ່ນວ່າທາງເຈົ້າໜ້າທີ່ຈະສາມາດກັກໂຕກຸ່ມຄົນຄ້າມະນຸດໄດ້ແລ້ວ ແລະ ພວກເຂົາໄດ້ຈ່າຍຄ່າຊົດເຊີຍໃຫ້ແກ່ຄອບຄົວເດັກຊາຍຄົນນີ້ ຈໍານວນ 1,000,000 ຢວນ ຫຼື ປະມານ 3 ຕື້ກີບ ແຕ່ມັນກໍບໍ່ຄຸ້ມຄ່າກັບສຸຂະພາບ ແລະ ຊີວິດທີ່ຕ້ອງແລກ.ຈົນຮອດປັດຈຸບັນເລື່ອງນີ້ຍັງຄົງເປັນບົດຮຽນໃຫ້ຫຼາຍໆຄົນ ບໍ່ຄວນທີ່ຈະເຫັນແກ່ສິ່ງຂອງຈົນລືມໄປວ່າ ສຸຂະພາບຂອງຕົນກໍເປັນອີກສິ່ງໜຶ່ງທີ່ສຳຄັນບໍ່ໜ້ອຍໄປກວ່າສິ່ງຂອງ.
ແຫຼ່ງຂໍ້ມູນ: sanook