ຫຼັງຈາກທີ່ປະເທດອັງກິດປະກາດແຍກໂຕອອກຈາກ EU (ອີຢູ) ຫຼາຍໆຄົນກໍເປັນກັງວົນວ່າຈະສົ່ງຜົນເຖິງສະຖານະການໃນພຣີເມຍລີກ ລີກເຕະບານແດນຜູ້ດີທີ່ມີມູນຄ່າຫຼາຍທີ່ສຸດໃນໂລກຫຼືບໍ່?.
ມື້ນີ້ເຮົາມີຂໍ້ມູນຈາກ One Football ທີ່ໄດ້ລວບລວມເອົາສະຖິຕິຈຳນວນເງິນທີ່ເສຍໄປຫຼັງຈາກ “Brexit” ຫຼື “ເບຣັກຊິດ” ພຽງຂ້າມວັນ ຈຶ່ງພົບວ່າ ເຊວຊີ ເປັນສະໂມສອນທີ່ມີມູນຄ່າຕົກລົງຫຼາຍທີ່ສຸດຕາມສະຖານະຂອງທີມທີ່ມີມູນຄ່າສູງສຸດໃນພຣີເມຍລີກ ຈາກມູນຄ່າໃນຕະຫຼາດ 499,162,500 ລ້ານຢູໂຣ ແຕ່ຫຼັງຈາກປະກາດ ເບຣັກຊິດ ພຽງຂ້າມວັນ ມູນຄ່າກໍຫຼຸດລົງຢູ່ທີ່ 478,152,000 ລ້ານຢູໂຣ ເສຍເງິນໄປເຖິງ 21,037,500 ລ້ານຢູໂຣ ພຽງມື້ດຽວເທົ່ານັ້ນ.
ຮອງລົງມາກໍເປັນ ແມນຯ ຊິຕີ້ ຈາກມູນຄ່າ 479,339,550 ລ້ານຢູໂຣ ຫຼັງຈາກປະກາດ ເບຣັກຊິດ ກໍຫຼຸດລົງຢູ່ທີ່ 459,137,500 ລ້ານຢູໂຣ ເຊິ່ງເສຍເງິນໄປເຖິງ 20,202,050 ລ້ານຢູໂຣ ເລີຍ, ສ່ວນອັນດັບ 3 ທີ່ເສຍເງິນໄປ 18,469,550 ລ້ານຢູໂຣແມ່ນ ອາຣ໌ເຊນອນ ເຖິງຈະຂຶ້ນຊື່ວ່າເປັນທີມທີ່ມີກຳໄລທຸກໆປີກໍຕາມ.
ອັນດັບ 4 ເປັນທາງ ແມນຯ ຢູໄນເຕັດ ອີກທີມທີ່ກຳໄລຂຶ້ນທຸກປີ ກໍຕ້ອງເສຍເງິນໄປ 17,397,050 ລ້ານຢູໂຣ ແລະ ອັນດັບ 5 ແມ່ນທາງ ລິເວີພູ ທີ່ເສຍເງິນໄປເຖິງ 15,033,700 ລ້ານຢູໂຣ ຖືວ່າເປັນໂຕເລກທີ່ສູງຫຼາຍຖ້າທຽບມູນຄ່າທີມກັບ ແມນຯ ຢູໄນເຕັດ ເພາະຫ່າງກັນເຖິງ 61 ລ້ານຢູໂຣ
ເຖິງວ່າໂຕເລກການປະເມີນເຫຼົ່ານີ້ອາດບໍ່ສົ່ງຜົນຮ້າຍແຮງຕໍ່ສະໂມສອນໃນພຣີເມຍລີກ ແຕ່ນີ້ກໍເປັນສັນຍານໜຶ່ງທີ່ຈະເຮັດໃຫ້ຫຼາຍໆ ທີມຕ້ອງປັບໂຕກັນຫຼາຍພໍສົມຄວນ ລວມໄປເຖິງການຊື້ຂາຍນັກເຕະທີ່ອາດຈະຕ້ອງປ່ຽນແຜນໃໝ່ອີກໄລຍະໜຶ່ງເລີຍ.