ກອງທຶນສະຫະກອນເປັນອີກສະຖາບັນການເງິນທີ່ເປັນສ່ວນໜຶ່ງໃນການປະກອນສ່ວນເຂົ້າໃນການພັດທະນາເສດຖະກິດ-ສັງຄົມຂອງປະເທດ ໂດຍສະເພາະການປ່ອຍສິນເຊື່ອແກ່ສັງຄົມເຮັດໃຫ້ປະຊາຊົນສາມາດເຂົ້າເຖິງແຫຼ່ງທຶນເພື່ອມາສ້າງທຸລະກິດຄອບຄົວ, ທຸລະກິດຂະໜາດນ້ອຍ-ກາງໃຫ້ມີການຂະຫຍາຍຕົວຂຶ້ນເລື້ອຍໆ.
ທ່ານ ເພັດດາລາ ມະນີວົງ ຜູ້ອຳນວຍການກອງທຶນສະຫະກອນ ຈຳກັດໃຫ້ສຳພາດວ່າ: ກອງທຶນສະຫະກອນຈຳກັດ ແມ່ນເປີດໃຫ້ບໍລິການມາແຕ່ປີ 2002 ເປັນຕົ້ນມາ ໂດຍການໃຫ້ບໍລິການເງິນຝາກ ແລະບໍລິການເງິນກູ້, ສຳລັບການບໍລິການເງິນກູ້ ຫຼື ການປ່ອຍສິນເຊື່ອປະກອບມີຂະແໜງກະສິກຳ, ລ້ຽງສັດ, ຫັດຖະກຳ, ບໍລິການ, ຈໍລະຈອນສິນຄ້າ, ການຜະລິດຂະໜາດນ້ອຍ ແລະພະນັກງານ, ສ່ວນເງື່ອນໄຂໃນການກູ້ຢືມສະເພາະພະນັກງານບັນດາບໍລິສັດຕ່າງໆທີ່ຕ້ອງການກູ້ຢືມສາມາດເອົາເງິນເດືອນຄ້ຳປະກັນໄດ້ ແລະໃນຂະແໜງອື່ນໆແມ່ນຕ້ອງມີຫຼັກຊັບ ຫຼື ໃບຕາດິນຄ້ຳປະກັນ ໂດຍການປ່ອຍສິນເຊື່ອຊ້າສຸດແມ່ນບໍ່ເກີນ 3 ວັນ ດ້ວຍຫ 2-3% ຕໍ່ເດືອນ, ຈຳນວນເງິນທີ່ປ່ອຍແມ່ນຢູ່ໃນລະຫວ່າງ 1-300 ລ້ານກີບ, ສຳລັບເງິນຝາກມີອັດຕາດອກເບ້ຍ 14% ຕໍ່ປີ ຊຶ່ງທາງສະຖາບັນຈະເນັ້ນເງິນຝາກມີກຳນົດຫຼາຍກວ່າເງິນຝາກປະຢັດ.
ພ້ອມດຽວກັນນັ້ນ ການປ່ອຍສິນເຊື່ອທີ່ກວມເອົາອັດຕາສ່ວນຫຼາຍກວ່າແມ່ນຂະແໜງການຈໍລະຈອນສິນຄ້າ ແລະບໍລິການ ກວມເອົາປະມານ 30%, ຖັດລົງມາຂະແໜງກະສິກຳ ປະມານ 10-20% ແຕ່ວ່າກໍຂຶ້ນກັບພື້ນທີ່ໆມີທ່າແຮງ ໂດຍສະເພາະສາຂານາຊາຍທອງຂະແໜງກະສີກຳ ກວມເອົາກວມ 90%, ສາຂາກາສີ ກະສິກຳ ກວມ 70% ໂດຍລວມ ແລ້ວທັງໝົດ 9 ສາຂາ 1 ສຳນັກງານໃຫຍ່ ສຳລັບການຈໍລະຈອນສິນຄ້າກວມເອົາປະມານ 30%.
ສຳລັບໃນປີ 2016 ນີ້ ກອງທຶນສະຫະກອນວາງເປົ້າໝາຍການປ່ອຍສິນເຊື່ອໃຫ້ໄດ້ປະມານ 18 ຕື້ກວ່າກີບ ແລະ ເງິນຝາກໃຫ້ໄດ້ 18 ຕື້ກວ່າກີບ ໂດຍຕາມການເຄື່ອນໄຫວຕົວຈິງຂອງທຸລະກິດເຫັນວ່າມາຮອດເຄີ່ງປີຕົວເລກການປ່ອຍສິນເຊື່ອ ແລະ ເງິນຝາກບັນລຸເກືອບຮອດແຜນທີ່ວາງໄວ້ ຊຶ່ງຄາດວ່າໝົດປີຈະລື່ນຄາດໝາຍ.
ສ່ວນທາງດ້ານໜີ້ສິນຊັກຊ້າຢູ່ໃນລະດັບ 2-3% ຕໍ່ປີ ທີ່ສາມາດຄວບຄຸມໄດ້ຕາມລະບຽບຂອງທະນາຄານກາງແມ່ນບໍ່ໃຫ້ເກີນ 5% ຕໍ່ປີ ຊຶ່ງກ່ອນປີ 2012 ຢູ່ປະມານ 30% ຕໍ່ມາໄດ້ມີການປັບທີມງານ, ປັບລະບົບ ຈິ່ງເຮັດໃຫ້ອັດຕາສ່ວນໜີ້ສິນຊັກຊ້າຫຼຸດລົງຕາມລຳດັບ ປະຈຸບັນທາງກອງທຶນສະຫະກອນມີລູກຄ້າເງິນກູ້ປະມານ 600 ກວ່າຄົນ ແລະເງິນຝາກກໍຢູ່ໃນລະດັບດຽວກັນ.
ທ່ານ ເພັດດາລາ ມະນີວົງ ໃຫ້ຮູ້ຕື່ມອີກວ່າ: ໃນອະນາຄົດຂ້າງໜ້າທາງກອງທຶນສະຫະກອນຈະປັບປຸງລະບົບໄປຕາມກົນໄກຕະຫຼາດ ແລະຂະຫຍາຍສາຂາເພີ່ມ ເພື່ອໃຫ້ປະຊາຊົນທີ່ຢູ່ເຂດຫ່າງໄກໄດ້ເຂົ້າເຖິງແຫຼ່ງທຶນໄດ້ຫຼາຍຂຶ້ນ ທັງນີ້ ຍັງໄດ້ປ່ຽນຊື່ຈາກກອງທຶນສະຫະກອນຈຳກັດ ມາເປັນສະຖາບັນການເງິນຈຸລະພາກທີ່ຮັບເງິນຝາກດອກຄູນ ຈຳກັດ ໂດຍຂະນະນີ້ ທະນາຄານແຫ່ງ ສປປ ລາວ ແມ່ນໄດ້ອອກໃບອະນຸຍາດໃຫ້ດຳເນີນທຸລະກິດແລ້ວໃນວັນທີ 1 ມິຖຸນາ 2016 ປະຈຸບັນແມ່ນຢູ່ໃນຂັ້ນຕອນຂໍທະບຽນວິສາຫະກິດ.
ທີ່ມາ: 