ວັນທີ 20 ມິຖຸນາ 2016 ທີ່ນະຄອນຫຼວງວຽງຈັນ ກົມນະໂຍບາຍ ແລະແຜນພະລັງງານ, ກະຊວງພະລັງງານ ແລະບໍ່ແຮ່ ຮ່ວມກັບສະຖາບັນເສດຖະສາດພະລັງງານແຫ່ງປະເທດຍີ່ປຸ່ນ ໄດ້ຮັບກຽດເປັນເຈົ້າພາບຈັດກອງປະຊຸມຄັ້ງທີ 4 ອາຊຽນ+3 ແຜນການສ້າງຄັງນ້ຳມັນເຊື້ອໄຟ ແລະກອງ ປະຊຸມຄັ້ງທີ 13 ອາຊຽນ +3 ຄວາມໝັ້ນຄົງພະລັງງານ ໂດຍການເປັນປະທານຂອງທ່ານ ດາວວົງ ພອນແກ້ວ ຫົວໜ້າກົມນະໂຍບາຍ ແລະແຜນການກະຊວງພະລັງງານ ແລະບໍ່ແຮ່,ບັນດາພະນັກງງານວິຊາການ ແລະພາກສ່ວນທີ່ກ່ຽວຂ້ອງເຂົ້າຮ່ວມ.
ກອງປະຊຸມດັ່ງກ່າວເປັນການສະແດງເຖິງການຮ່ວມມືດ້ານພະລັງງານຂອງປະ ເທດສະມາຊິກອາຊຽນ ແລະປະເທດຄູ່ຮ່ວມເຈລະຈາໃນຂອບອາຊຽນ+3 ກໍຄື ສປ ຈີນ, ຍີ່ປຸ່ນ ແລະ ສ ເກົາຫຼີ ໂດຍມີເນື້ອໃນສຳຄັນຫຼັກຄືສືບຕໍ່ສຶກສາແຜນສ້າງຄັງນ້ຳມັນເຊື້ອໄຟເພື່ອແກ້ໄຂບັນຫາການຂາດແຄນນ້ຳມັນໃນພາວະສຸກເສີນໃນບັນດາປະເທດສະມາຊິກອາຊຽນ.
ສຳລັບກອງປະຊຸມຄວາມໝັ້ນຄົງພະລັງງານໄດ້ເນັ້ນໃສ່ການພັດທະນາການເຊື່ອມຈອດທໍ່ສົ່ງແກ໊ດລະຫວ່າງປະເທດ, ທ່າອຽງການເພີ່ມຂຶ້ນການຊົມໃຊ້ພະລັງງານ, ພະລັງງານນິວເຄຍເພື່ອຜະລິດໄຟຟ້າ, ເພື່ອການພັດທະນາແບບຍືນຍົງໃນພາກພື້ນ, ນອກຈາກນີ້ ຍັງໄດ້ມີການຫາລືກ່ຽວກັບການສ້າງຄວາມອາດສາມາດໃຫ້ກັບບຸກຄະລາກອນຂອງປະເທດສະມາຊິກອາຊຽນ ເພື່ອຄຸ້ມຄອງຄັງແຮຮອງນ້ຳມັນເຊື້ອໄຟ.
ພະລັງງານຖືເປັນປັດໄຈທີ່ສຳຄັນໃນການດຳລົງຊີວິດ ແລະການພັດທະນາ ເສດຖະກິດ ສຳລັບ ສປປ ລາວ ໃນປີ 2014 ທີ່ຜ່ານມາການນຳໃຊ້ນ້ຳມັນເຊື້ອ ໄຟມີປະມານ 1.019 ລ້ານລິດ ໂດຍມີການນຳເຂົ້າ 100% (ປະມານ 80% ນຳເຂົ້າຈາກປະເທດໄທ ແລະ 20% ນຳເຂົ້າຈາກ ສສ ຫວຽດນາມ) ປະຈຸບັນມີບໍລິສັດຜູ້ໃຫ້ບໍລິການນ້ຳມັນເຊື້ອໄຟມີ 22 ບໍລິສັດ ແລະມີສະຖານີບໍລິ ການຫຼາຍກວ່າ 1.200 ແຫ່ງ.
ກອງປະຊຸມຄັ້ງນີ້ນອກຈາກຈະໄດ້ ປຶກສາວຽກງານທີ່ໄດ້ກ່າວມາແລ້ວຍັງຈະເປັນການກະກຽມລາຍງານໃຫ້ແກ່ ກອງປະຊຸມເຈົ້າໜ້າທີ່ອາວຸໂສພະລັງງານອາຊຽນຄັ້ງທີ 34 ທີ່ຈະຈັດຂຶ້ນທີ່ປະ ເທດມຽນມາ ໃນວັນທີ 1215 ກໍລະກົດ 2016 ທີ່ຈະມາເຖິງນີ້.
ທີ່ມາ: ນສພ ເສດຖະກິດ-ສັງຄົມ