ແຫລ່ງຂ່າວຫລ້າສຸດຈາກລັດວິສາຫະກິດດາວທຽມລາວເປີດເຜີຍໃນວັນທີ 16 ມິຖຸນາ 2016 ນີ້ປັດຈຸບັນມີ 5 ບໍລິສັດສົນໃຈຊື້ສັນຍານດາວທຽມຈາກໂຄງການດາວທຽມ LaoSat-1 ເພື່ອນໍາໃຊ້ເຂົ້າ 4 ຂະແໜງບໍລິການຄື: ໂທລະພາບ, ອິນເຕີເນັດ, ໂທລະຄົມມະນາຄົມ-ການສື່ສານ ແລະ ວິທະຍຸ ພາຍຫລັງໂຄງການດັ່ງກ່າວສໍາເລັດການປ່ອຍດາວທຽມຂຶ້ນສູ່ວົງໂຄຈອນໃນວັນທີ 21 ພະຈິກ 2015ຜ່ານມາ.
ຈາກຜົນຂອງການປ່ອຍດາວທຽມ LaoSat-1ດວງທໍາອິດຂຶ້ນສູ່ວົງໂຄຈອນຄັ້ງປະຫວັດສາດຂອງ ສປປ ລາວ ສົ່ງເຮັດໃຫ້ ສປປ ລາວມີສ່ວນແບງຕະຫລາດຈາກຫລາຍປະເທດເປັນຕົ້ນກໍາປູເຈຍ, ມຽນມາ, ສປ.ຈີນ, ໄທ, ອິນເນເຊຍ, ມາເລຍເຊຍ, ຫວຽດນາມ ແລະ ປະເທດອື່ນໆ.
ທ່ານ ສົມນຶກ ໂພທິຣາຊ ຜູ້ອໍານວຍການໃຫຍ່ ລັດວິສາຫະກິດດາວທຽມລາວໄດ້ລາຍງານຕໍ່ສໍານັກຂ່າວສານປະເທດລາວໃນວັນທີ 16 ມິຖຸນາ 2016 ນີ້ວ່າ: ຕາມຄວາມເປັນຈິງແລ້ວໃນປັດຈຸບັນນີ້ ມີ 70 ຊ່ອງຈາກຫລາຍບໍລິສັດທັງພາຍໃນ ແລະ ຕ່າງປະເທດໃຫ້ຄວາມສົນໃຈຢາກມາຊື້ສັນຍານບໍລິການ ແຕ່ມີພຽງ 5 ບໍລິສັດເທົ່ານັ້ນທີ່ໄດ້ເຊັນສັນຍາບັນທຶກຄວາມໃຈກັນແລ້ວ. ແນວໃດກໍດີ ຜູ້ອໍານວຍການໃຫຍ່ ລັດວິສາຫະກິດດາວທຽມລາວຍັງຊີ້ແຈງວ່າ: ອາຍຸການໃຊ້ງານດາວທຽມມີພຽງແຕ່ 15 ປີ ແຕ່ຄາດວ່າປະມານ 10 ປີຈະສາມາດກຸ້ມທຶນເພື່ອນໍາເອົາໄປຖົມຂຸມ, ໃຊ້ໜີ້ ແລະ ອື່ນໆ ສ່ວນອີກ 5 ປີແມ່ນຜົນກໍາໄລລວັນໆ. ປັດຈຸບັນນີ້ ລັດວິສາຫະກິດດາວທຽມລາວຍັງພົບບັນຫາຄວາມຍຸ້ງຍາກບາງຂັ້ນຕອນທີ່ທາງລັດຖະບານຍັງພິຈາລະນາ ແລະ ອຸຍາດໃຫ້ດໍາເນີນໄດ້ຢ່າງສະດວກ. ພ້ອມດຽວກັນນີ້ ສປປ ລາວມີຈຸດໄດ້ປຽບປະເທດອື່ນໆໃນ 10 ປະເທດສະມາຊິກອາຊຽນຢູ່ບ່ອນວ່າ: ອັນທີ 1 ສປປ ລາວເປັນປະເທດທີ່ບໍ່ຕິດຈອດກັບທະເລບວກກັບ ປະເທດກໍາປູເຈຍ ແລະ ມຽນມາທີ່ຍັງບໍ່ມີດາວທຽມ ເຊິ່ງຈະເຮັດໃຫ້ສອງປະເທດນີ້ສົນໃຈມາຊື້ດາວທຽມລາວຫລາຍຂຶ້ນ; ປະເທດໄທ, ຫວຽດນາມ, ອິນໂດເນເຊຍ ແລະ ມາເຊຍມີຈໍານວນລາຍການທີ່ໃຫ້ບໍລິການດ້ວຍດາວທຽມຂອງເຂົາເຈົ້າເອງເຕັມ ແລະ ມີຈໍາກັດຈະກາຍເປັນທ່າແຮງເຮັດໃຫ້ເຂົາເຈົ້າຫັນມາຊື້ດາວທຽມ ແລະ ອື່ນ.
ຜ່ານມາ, ທ່ານ ສົມສະຫວາດ ເລັ່ງສະຫວັດ ອະດີດຮອງນາຍົກລັດຖະມົນຕີໄດ້ວ່າ:ໂຄງການດາວທຽມລາວແມ່ນໝາກຜົນຂອງການ ຮ່ວມມືອັນຮອບດ້ານລະຫວ່າງສອງພັກ, ສອງລັດ ແລະ ປະຊາ ຊົນສອງຊາດລາວ-ຈີນ ຈະເປັນພື້ນຖານທີ່ສຳຄັນໜຶ່ງສຳລັບ ວຽກງານໂທລະຄົມມະ¬ນາຄົມ ແລະ ການສື່ສານ, ກະຈາຍ ສຽງໂທລະພາບ ໂດຍແບ່ງອອກເປັນສອງໄລຍະຄື: ໜຶ່ງແມ່ນ ດຳເນີນການທາງດ້ານເຕັກນິກຕ່າງໆຈົນຮອດການສົ່ງດາວ ທຽມໄປໄວ້ໃນຕຳແໜ່ງໂຄຈອນ 128,5 ອົງສາຕາເວັນອອກ ຈົນສຳເລັດໃນວັນທີ 21 ພະຈິກ 2015.
ສ່ວນໄລຍະຕໍ່ມາແມ່ນການບໍລິຫານລະບົບດາວທຽມ ເພື່ອໃຫ້ເກີດຜົນປະໂຫຍດທາງດ້ານເສດຖະກິດ-ສັງຄົມ, ດາວທຽມລາວແຊດ-1 ມີຊ່ອງສັນ ຍານທັງໝົດ 22 ຊ່ອງ ກວມເອົາ 15 ປະ ເທດອ້ອມຂ້າງ, ຈະນຳໃຊ້ເຂົ້າໃນວຽກ ງານສື່ສານຂອງພາກລັດ ແລະ ສັງຄົມທົ່ວໄປ, ການໃຫ້ເຊົ່າຊ່ອງສັນຍານແກ່ຕ່າງປະເທດ, ການບໍລິການຜ່ານດາວທຽມ ວຽກງານສື່ສານໃນເຂດຊົນນະບົດ, ບໍລິການໂທລະພາບຜ່ານດາວທຽມ, ນຳໃຊ້ສຳລັບການສຶກສາ-ການແພດທາງໄກ, ການສື່ສານໃນວຽກງານສຸກເສີນ ແລະ ອື່ນໆ.
ໂຄງການນີ້ໄດ້ມີການຮ່ວມທຶນລະ ຫວ່າງລັດຖະບານລາວກັບບັນດາບໍລິສັດ ຂອງສປ ຈີນ ເຊິ່ງລັດຖະບານລາວຖືຮຸ້ນ 45%, ບໍລິສັດຈີນ (China Asia-Pacific Mobile Telecommunications Satellite co.ltd (APMT) 35%, ບໍລັດສັດ Space Star Technology co.Ltd (SSTC) 15% ແລະ ບໍລິສັດ Asia-Pacific Satellite Technology (APST) 5%.
ຂ່າວ-ພາບ: ເກີດຂວັນໃຈ