ວິທີທີ່ 1: ກຳຈັດຮອຍຄາບເຫຼືອງ ດ້ວຍທິດຊູ່
ໃຫ້ນຳເອົາເກີບໄປຊັກທຳຄວາມສະອາດຕາມປົກກະຕິ ຄືແຊ່ນ້ຳສະບູ່ຝຸ່ນໄວ້ປະມານ 15-30 ນາທີ ຫຼັງຈາກນັ້ນກໍໃຊ້ແປງຊັກເຄື່ອງຖູບ່ອນທີ່ມີຮອຍເປື້ອນອອກໃຫ້ໝົດ ແລ້ວລ້າງດ້ວຍນ້ຳສະອາດ.
ສ່ວນເຄັດລັບກໍຄື ໃຫ້ໃຊ້ກະດາດທິດຊູ່ຫໍ່ເກີບໄວ້ໃຫ້ທົ່ວແລ້ວນຳໄປຕາກແດດ ເຊິ່ງກະດາດທິດຊູ່ທີ່ເຮົາຫໍ່ໄວ້ນີ້ເອງແມ່ນຈະດູດຊັບເອົາຄາບເຫຼືອງຈາກເກີບອອກ ໃຫ້ກັບມາຂາວໃໝ່ອີກຄັ້ງ.
ວິທີທີ່2: ເພີ່ມຄວາມຂາວຫຼຸດກິ່ນອັບ ດ້ວຍແປ້ງ
ເປັນເທັກນິກໃກ້ຄຽງກັບການໃຊ້ທິດຊູ່ ຄືໃຫ້ຊັກຕາມຂັ້ນຕອນປົກກະຕິທົ່ວໄປ ແຕ່ເຄັດລັບຢູ່ບ່ອນວ່າກ່ອນທີ່ຈະນຳເອົາເກີບໄປຕາກນັ້ນ ໃຫ້ນຳເອົາແປ້ງມາໂຮຍໃສ່ໃຫ້ທົ່ວເກີບ ເພາະນອກຈາກຈະຊ່ວຍເພີ່ມຄວາມຂາວຂຶ້ນແລ້ວ ຍັງສາມາດຊ່ວຍຫຼຸດກິ່ນອັບພາຍໃນເກີບອີກດ້ວຍ
ວິທີທີ່ 3: ກຳຈັດຄາບຢູ່ຂອບຢາງ ດ້ວຍຢາຖູແຂ້ວ
ວິທີນີ້ນັບວ່າໃຫ້ຜົນລັບຢ່າໜ້າປະທັບໃຈ ຄືບັນຫາສ່ວນໃຫຍ່ຂອງການຊັກເກີບກໍຄືຢູ່ບໍລິເວນຂອບຢາງທີ່ມັກຈະມີຄາບສີເຫຼືອງ ຫຼື ດຳ ໃຫ້ກວນໃຈເພາະຊັກບໍ່ອອກ ແລະ ວິທີການທຳຄວາມສະອາດແມ່ນໃຫ້ນຳໃຊ້ຢາຖູແຂ້ວບີບໃສ່ຂອບທີ່ມີຈຸດຄາບດັ່ງກ່າວນັ້ນ ພ້ອມກັບໃຊ້ແປງຂັດຖູທຳຄວາມສະອາດບໍລິເວນດັ່ງກ່າວ ແລ້ວເກີບຂອງທ່ານກໍຈະກັບມາຂາວໃໝ່ອີກຄັ້ງ.
ວິທີທີ່ 4: ຫຼຸດກິ່ນອັບ ດ້ວຍໜັງສືພິມ
ສຳລັບທ່ານໃດທີ່ຍັງບໍ່ສະດວກທີ່ຈະຊັກດ້ວຍວິທີຂ້າງເທິງນັ້ນ ສິ່ງທີ່ສາມາດຫຼຸດກິ່ນອັບຂອງເກີບໄດ້ອີກຢ່າງໜຶ່ງກໍຄືໜັງສືພິມ, ໂດຍນຳໜັງສືພິມມາຍັດເຂົ້າໃນເກີບແລ້ວປະເອົາໄວ້ປະມານ 1 ຄືນ ເມື່ອເອົາໜັງສືກພິມອອກກໍຈະພົບວ່າກິ່ນອັບເຫຼົ່ານັ້ນຈະຫາຍໄປ.
ທີ່ມາ: ວາລະສານມະຫາຊົນ