ເຈົ້າໜ້າທີ່ກອງບັນຊາການ ປກສ ເມືອງປາກກະດິງ ແຂວງບໍລິຄຳໄຊ ໄດ້ໃຫ້ຮູ້ວ່າ: ໃນຄັ້ງວັນທີ 23 ພຶດສະພາ 2016 ນີ້ໄດ້ຮັບແຈ້ງຈາກພົນລະເມືອງດີວ່າ: ໄດ້ມີກຸ່ມຄົນບໍ່ດີເຄື່ອນໄຫວຄ້າຂາຍຢາເສບຕິດຢູ່ເຂດບ້ານໂພນສີ, ເມືອງປາກກະດິງ ຈາກນັ້ນເຈົ້າໜ້າທີ່ວິຊາສະເພາະ ປກສ ເມືອງປາກກະດິງ ຈິ່ງໄດ້ລົງກວດກາ ແລະ ພົບເຫັນວ່າແຫຼ່ງຂ່າວດັ່ງກ່າວແມ່ນມີຄວາມຈິງ.
ຕົກມາຮອດວັນທີ 25 ພຶດສະພາເຈົ້າໜ້າທີ່ ປກສ ເມືອງປາກກະດິງ, ຈິ່ງສາມາດເຂົ້າຈັບຕົວຜູ້ຖືກຫາໄດ້ 1 ຄົນຄື: ທ້າວ ລຸຍ ອາຍຸ 30 ປີ ຢູ່ບ້ານໜອງສະພັງ ເມືອງໄຊບູລີ ແຂວງສະຫວັນນະເຂດ. ພ້ອມດ້ວຍຂອງກາງຢາບ້າຈຳນວນ 206 ເມັດ ແລະປືນແກັບ 1 ກະບອກ; ຜ່ານ ການສືບສວນຂອງເຈົ້າໜ້າທີ່ຜູ້ກ່ຽວໄດ້ຮັບສາລະພາບວ່າຢາເສບຕິດ ແລະປືນແກັບດັ່ງກ່າວແມ່ນເປັນຂອງຕົນແທ້ຜູ້ຖືກຫາຍັງໄດ້ໃຫ້ການກັບເຈົ້າໜ້າທີ່ວ່າຕົນແມ່ນໄດ້ພົວພັນເສບຢາບ້າມາດົນແລ້ວ ຈິ່ງມີແນວຄິດຢາກຄ້າຂາຍຢາເສບຕິດຈິ່ງຕັດສິນໃຈຕົກລົງຮັບຢາບ້ານຳຜູ້ຮ່ວມຂະບວນການ ຈຳນວນ 1 ຖົງເທົ່າ ກັບ 208 ເມັດ, ໃນເວລາຕໍ່ມາຈິ່ງຖືກເຈົ້າໜ້າທີ່ເຂົ້າກັກຕົວມາດຳເນີນຄະດີ.
ຕໍ່ກັບຄະດີດັ່ງກ່າວເຈົ້າໜ້າທີ່ໜ່ວຍງານສະກັດກັ້ນ ແລະຕ້ານຢາເສບຕິດ ປກສ ເມືອງປາກກະດິງ ໄດ້ໃຫ້ຮູ້ຕື່ມວ່າ: ປະຈຸບັນໄດ້ສົ່ງຕົວຜູ້ຖືກຫາໃຫ້ເຈົ້າໜ້າທີ່ພະແນກຕຳຫຼວດສະກັດກັ້ນ ແລະຕ້ານຢາເສບຕິດ ປກສ ແຂວງ ດຳເນີນຄະດີເພື່ອສົ່ງສຳນວນໃຫ້ອົງການໄອຍະການປະຊາຊົນ ແຂວງບໍລິຄຳໄຊ ສະຫຼຸບຟ້ອງສານຕັດສິນຕໍ່ຜູ້ກ່ຽວຕາມລະບຽບກົດໝາຍ, ສ່ວນພັກພວກທີ່ຮ່ວມຂະບວນການເຈົ້າໜ້າທີ່ ປກສ ເມືອງປາກກະດິງ ໄດ້ສືບຕໍ່ສົມທົບກັບເຈົ້າໜ້າທີ່ພາກສ່ວນກ່ຽວຂ້ອງເລັ່ງຕິດຕາມນຳຕົວພວກກ່ຽວເພື່ອມາດຳເນີນຄະດີຕາມກົດໝາຍຢ່າງເຂັ້ມງວດ.
ທີ່ມາ: 