ຈໍາປາສັກ ມີເນື້ອທີ່15.410 ຕາລາງກິໂລແມັດ, ກວ້າງໃຫຍ່ເປັນອັນດັບທີ່ສາມຂອງປະເທດມີພົນລະເມືອງ 6 ແສນກວ່າຄົນກວມ 10% ຂອງພົນລະເມືອງໃນທົ່ວປະເທດ. ທີ່ຕັ້ງພູມສັນຖານໄດ້ແບ່ງອອກເປັນສອງເຂດຢ່າງຈະແຈ້ງຄື: ເຂດທົ່ງພຽງ ແລະ ເຂດພູພຽງ
ຈໍາປາສັກ ເປັນດິນແດນໃຕ້ສຸດຂອງປະເທດ ທີ່ເຕັມໄປດ້ວຍອູ່ອະລິຍະທໍາອັນເກົ່າແກ່ທີ່ຫນ້າຄົ້ນຫາ ແລະ ມີທໍາມະຊາດທີ່ສວຍສົດງົດງາມຢ່າງໂດດເດັ່ນແຫ່ງຫນຶ່ງຂອງປະເທດທີ່ບັນດາທ່ານຄວນຍາດໂອກາດໄປທ່ຽວຊົມຈັກຄັ້ງ ຫລື ນັກທ່ອງທ່ຽວຕ່າງຊາດທີ່ມີໂອກາດເດີນທາງມາທ່ອງທ່ຽວສປປ ລາວ ກໍຄວນຈັດຈໍາປາສັກເປັນຫນຶ່ງໃນເປົ້າຫມາຍປາຍທາງການທ່ອງທ່ຽວ.
ປັດຈຸບັນການທ່ອງທ່ຽວພວມຂະຫຍາຍຕົວຢ່າງແຮງ ແຕ່ຫລາຍຄົນອາດຍັງບໍ່ຮູ້ຈໍາປາສັກ ວ່າມີຄວາເປັນມາຄືແນວ? ມີສະຖານທີ່ທອງທ່ຽວໃດແດ່ທີ່ຫນ້າຄົ້ນຫາ? ລວມເຖິງການເດີນທາງສະດວກບໍ? ທີພັກຮ້ານອາຫານເດ ເປັນແນວໃດ?
1.ປະຫວັດຄວາມເປັນມາ
ຈໍາປາສັກມີຊື່ເດີມວ່າ ຈໍາປາປູຣະ (ເມືອງຊາວຈາມ), ນັກປະຫວັດສາດສາຂາມະນຸດສາດ ຫລືມະນຸດວິທະຍາ ໄດ້ຮັບຮູ້ເປັນເອກະພາບກັນວ່າຊົນຊາດທີ່ຕັ້ງຖິ່ນຖານຢູ່ຂົງເຂດພາກໃຕ້ຂອງອິນໂດຈີນກ່ອນຫມູ່ແມ່ນຊົນຊາດຈາມ ແລະ ເຊື່ອວ່າເປັນພັນໆປີມາແລ້ວ ທັງມີຄວາມຮຸ່ງເຮືອງມາແຕ່ດົນນານ.
ປັດຈຸບັນນັກວັດຖຸບູຮານຢັ້ງຢືນວ່າວັດພູຈໍາປາສັກ ບູຮານສະຖານຄູ່ບ້ານຄູ່ເມືອງຂອງຊາວ ຈໍາປາສັກ ທີ່ຖືກຮັບຮອງເປັນມໍລະດົກໂລກໃນວັນທີ 6 ທັນວາ 2001ແມ່ນມີມາກ່ອນສະໄຫມຂອມ200ກວ່າປີ ຄືຕັ້ງແຕ່ສະຕະວັດທີ IV ແລະ ເປັນຊົນຊາດຈາມສ້າງຂຶ້ນສ່ວນຫນຶ່ງ ເຊິ່ງອົງການອຸຍແນັດສະໂກ ກໍຢຶນຢັນວ່າແມ່ນສະໄຫມກ່ອນຂອມ, ນະຄອນວັດ ແລະນະຄອນທົມແມ່ນສະຕະວັດທີVIIຫາທີIX ແຕ່ກໍ່ຍອມຮັບຮູ້ວ່າ ຫລັງສົງຄາມຮຸກຮານຂອງພວກຂອມຕໍ່ຊົນເຜົ່າຈາມສິ້ນສຸດລົງ, ອໍານາດ ແລະອິດທິພົນຂອງຂອມກໍໄດ້ທໍາລາຍສ່ວນໃດສ່ວນຫນຶ່ງຂອງຜາສາດຫີນວັດພູ ທັງໄດ້ປ່ຽນແປງສິລະປະໄປເລັກນ້ອຍ.
- ທີ່ຕັ້ງດ້ານພູມສາດ
ຈໍາປາສັກ ຕັ້ງຢູ່ລະຫວ່າງເສັ້ນແວງທີ 105 ອົງສາ 13 ລິບດາ ຫາ 106ອົງສາ55ລິບດາຕາເວັນອອກ ແລະ ເສັ້ນຂະຫນາດທີ່ 13 ອົງສາ55ລິບດາຫາ15ອົງສາ22ລິບດາເຫນືອ.
ມີຊາຍແດນຕິດຈອດກັບບັນດາແຂວງ ແລະ ປະເທດໃກ້ຄຽງຄື: ທິດເຫນືອ ແລະ ຕາເວັນອອກສ່ຽງເຫນືອຕິດກັບແຂວງສາລະວັນ ມີລວງຍາວ140ກິໂລແມັດ, ທິດຕາເວັນອອກຕິດກັບແຂວງເຊກອງ ແລະ ແຂວງອັດຕາປື ຍາວ180ກິໂລແມັດ, ທິດໃຕ້ຕິດກັບລາຊະອານາຈັກກໍາປູເຈຍ ມີລວງຍາວ135ກິໂລແມັດ ແລະ ທິດຕາເວັນຕົກຕິດກັບລາຊະອານາຈັກໄທ ຍາວ 233 ກິໂລແມັດ.
- ດ້ານການປົກຄອງ
ແຂວງຈໍາປາສັກແບ່ງອອກເປັນ10ເມືອງ ມີເມືອງປາກເຊ ເປັນເທດສະບານຂອງແຂວງ, ມີເມືອງປາກຊ່ອງ, ບາຈຽງຈະເລີນສຸກ, ຊະນະສົມບູນ, ໂພນທອງ, ປະທຸມພອນ, ຈໍາປາສັກ, ສຸຂຸມາ, ເມືອງມູນລະປະໂຫມກ ແລະ ເມືອງໂຂງ, ມີພົນລະເມືອງປະມານ 642.651ຄົນ.
- ການເດີນທາງເຂົ້າສູ່ແຂວງຈໍາປາສັກ
ການເຂົ້າສູ່ແຂວງຈໍາປາສັກໃນປັດຈຸບັນ ເປັນເລື່ອງທີ່ງ່າຍຫລາຍ. ແຂວງຈໍາປາສັກມີເສັ້ນທາງບົກເຊື່ອມຕໍ່ກັບບັນດາແຂວງ ແລະ ປະເທດໃກ້ຄຽງເປັນຕົ້ນຣາຊະອານາຈັກກຳປູເຈຍ ຜ່ານດ່ານຫນອງນົກຂຽນ, ແລະ ຣາຊະອານາຈັກໄທ ຜ່ານດ່ານສາກົນວັງເຕົາ-ຊ່ອງເມັກ. ນອກນັ້ນຍັງ ມີດ່ານສາກົນສະຫນາມບີນປາກເຊ ອັນໄດ້ສ້າງຄວາມສະດວກສະບາຍໃຫ້ແກ່ການເດີນທາງເຂົ້າມາ
ສ່ວນການເດີນທາງດ້ວຍທາງບົກ ຈາກນະຄອນຫລວງວຽງຈັນ ສູ່ເມືອງປາກເຊແຂວງຈໍາປາສັກກໍສະດວກ ມີລົດໂດຍສານຫລາຍລະດັບແລ່ນບໍລິການ.
- ບັນດາແຫລ່ງທ່ອງທ່ຽວທີ່ສໍາຄັນ
ພູມສັນຖານ ແລະ ລະດູການທີ່ປ່ຽນແປງ ໄດ້ສ້າງດິນແດນມະຫານະທີສີພັນດອນ ໃຫ້ເຕັມໄປ ດ້ວຍຄວາມງົດງາມ ທາງອະລິຍະທໍາ ແລະ ທໍາມະຊາດ ເຮັດໃຫ້ດິນແດນໃຕ້ສຸດຂອງປະເທດແຫ່ງນີ້ ເຕັມໄປດ້ວຍຄວາມຫຼາກຫລາຍຂອງສະຖານທີ່ທ່ອງທ່ຽວ ທັງອາລິຍະທໍາອັນເກົ່າແກ່,ບູຮານສະຖານ, ເກາະດອນ, ນໍ້າຕົກ ແລະ ທໍາມະຊາດອັນອຸດົມສົມບູນດ້ວຍພູຜາປ່າໄມ້ ພືດພັນສັດປ່ານາໆຊະນິດ.
ຫລາຍທ່ານ ອ່ານໄດ້ມາທ່ຽວ ແລະສໍາພັດກັບຕົວຈິ່ງແດ່ແລ້ວ ແຕ່ກໍເຊື່ອວ່າຍັງມີຄົນອີກຈໍານວນຫລາຍທີ່ເຄີຍໄດ້ຍິນ ແຕ່ບໍ່ເຄີຍມາສໍາພັດກັບຕາ ຫລື ໄດ້ຍິນກັບຫູ ຫລື ບໍ່ເຄີຍຮູ້ວ່າກ່ອນ ເຖິງຄວາມມະຫັດສະຈັນ ແລະ ສວຍງາມສຸດພັນລະນາຂອງດິນແດນແຫ່ງນີ້.
ການເດີນທາງມາທ່ອງທ່ຽວແຂວງຈໍາປາສັກ ແມ່ນສາມາດມາໄດ້ທຸກລະດູ. ມີແຫລ່ງທ່ອງ ທ່ຽວທີ່ໂດດເດັ່ນທາງດ້ານວັດທະນາທຳ, ວັດຖຸບູຮານປະຫວັດສາດ ແລະ ທຳມະຊາດທີ່ລືຊື່ ຫລາຍໆແຫ່ງເປັນຕົ້ນແມ່ນສະຖານວັດພູຈຳປາສັກ ເຊິ່ງເປັນ ມໍລະດົກໂລກແຫ່ງທີ 2 ຂອງ ລາວຖັດມາກໍ່ແມ່ນແຫລ່ງທ່ອງທ່ຽວນ້ຳຕົກຄອນພະເພັງທີ່ໃຫຍ່ທີ່ສຸດໃນອາຊີຕາເວັນອອກສຽງໃຕ້ ແລະ ແຫລ່ງທ່ອງທ່ຽວອື່ນໆ ອີກຫລາຍແຫ່ງເຊັ່ນ: ຕາດຜາສ້ວມ, ຕາດຟານ, ຕາດເຍືອງ, ພູສະເຫລົາ, ຂົວມິດຕະພາບລາວ-ຍີ່ປຸ່ນ , ວັດຈອມເພັດ, ວັດຫລວງ, ດອນລົບປາດີ, ປ່າສະຫງວນແຫ່ງ ຊາດເຊປ່ຽນ, ປ່າສະຫງວນແຫ່ງຊາດພູຊຽງທອງ.
ຈາກສະຖິຕິການສໍາຫລວດໃນປີ2008 ຈໍາປາສັກມີແຫລ່ງທ່ອງທ່ຽວເຖິງ 206ແຫ່ງ, ໃນນັ້ນແຫລ່ງທ່ອງທ່ຽວທໍາມະຊາດ 109 ແຫ່ງ, ປະຫວັດສາດ 40 ແຫ່ງ ແລະ ວັດທະນະທໍາ 57ແຫ່ງ.
ທີ່ມາເນື້ອໃນ: http://la.laotrips.com/?p=76