ໃນທ່າມກາງບັນຍາກາດທີ່ທົ່ວພັກ, ທົ່ວກອງທັບ, ທົ່ວປວງຊົນ ພວມຫ້າວຫັນຟົດຟື້ນຈັດຕັ້ງ ປະຕິບັດມະຕິກອງປະຊຸມໃຫຍ່ ຄັ້ງທີ IX ຂອງພັກ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VII (2011-2015), ພວກເຮົາພ້ອມກັນສະເຫລີມສະຫລອງ ວັນເດັກສາກົນ ວັນທີ 1 ມິຖຸນາ ເຊິ່ງໃນແຕ່ລະປີ ພວກເຮົາໄດ້ທົບທວນຄືນໃນບັນດາວຽກທີ່ກ່ຽວ ຂ້ອງກັບເດັກທີ່ຍັງຕ້ອງການການດູແລເອົາໃຈໃສ່ ແລະ ການປົກປ້ອງເພື່ອຮັບປະກັນໃຫ້ເດັກຈະເລີນເຕີບໃຫຍ່ໃນສະພາບແວດລ້ອມທີ່ເຕັມໄປດ້ວຍຄວາມຮັກ ແລະ ມີຄວາມປອດໄພ.
ໃນປີນີ້, ພວກເຮົາໄດ້ເອົາໃຈໃສ່ວຽກປ້ອງກັນຄວາມຮຸນແຮງຕໍ່ເດັກຕິດພັນກັບການສະເຫລີມສະຫລອງ ວັນເດັກສາກົນ ຢູ່ ສປປ ລາວ ທັງເປັນການກະ ກຽມຕ້ອນຮັບວັນສົນທິສັນຍາ ວ່າດ້ວຍສິດທິເດັກ ຄົບຮອບ 25 ປີ ໃນເດືອນພະຈິກ 2014 ເຊິ່ງ ພວກເຮົາເຫັນໄດ້ວ່າ: ການດຳ ລົງຊີວິດຂອງເດັກໃນ ສປປ ລາວ ແມ່ນນັບມື້ນັບດີຂຶ້ນ ຖ້າທຽບໃສ່ໃນເມື່ອກ່ອນສະແດງອອກອັດ ຕາການສັກຢາກັນພະຍາດ ແລະ ການເຂົ້າເຖິງການສຶກສານັບມື້ ນັບທົ່ວເຖິງ. ເຖິງຢ່າງໃດກໍຕາມ, ເມື່ອເວົ້າເຖິງສິດທິພື້ນຖານຂອງເດັກແຕ່ລະຄົນທີ່ຈະໄດ້ຮັບການປົກປ້ອງຈາກຄວາມຮຸນແຮງ,
ການທາລຸນ ແລະ ການຂູດຮີດ ກໍຄືກັບເດັກໃນຫລາຍປະເທດທົ່ວໂລກ ຍັງເຫັນວ່າຕ້ອງໄດ້ເອົາໃຈໃສ່ໃນຫລາຍດ້ານ. ຄວາມຮຸນແຮງຕໍ່ເດັກແມ່ນທຸກຮູບການກະ ທຳທີ່ມີຜົນກະທົບຕໍ່ເດັກທາງດ້ານຮ່າງກາຍ, ຈິດໃຈ, ທາງເພດ ແລະ ການລະເລີຍ. ຄວາມຮຸນແຮງສາມາດເກີດຂຶ້ນໃນທຸກສະຖານທີ່ເຊັ່ນ: ເຮືອນ ແລະ ຄອບຄົວ, ໂຮງຮຽນ ແລະ ສະຖາບັນການສຶກສາ, ສະຖານທີ່ໃນລະບົບດູແລເດັກ ແລະ ລະບົບຍຸຕິທຳ, ສະຖານທີ່ອອກແຮງງານ ແລະ ຊຸມຊົນ. ຜູ້ກະທຳຄວາມຮຸນແຮງຕໍ່ເດັກອາດແມ່ນຄົນໃນຄອບຄົວຂອງເດັກເຊັ່ນ: ພໍ່-ແມ່, ສະມາຊິກໃນຄອບຄົວ, ຄູອາ ຈານ, ຜູ້ດູແລເດັກ, ເຈົ້າໜ້າທີ່ປະຕິບັດກົດໝາຍ, ຄົນໃນຊຸມຊົນ ຕະຫລອດຮອດເດັກດ້ວຍກັນ. ຄວາມຮຸນແຮງຕໍ່ເດັກເກີດຂຶ້ນໃນທຸກປະເທດ ແລະ ທຸກໆຊົນຊັ້ນ ວັນນະ ບໍ່ວ່າຈະເປັນຄົນທຸກ ແລະ ຄົນຮັ່ງ, ຄົນມີການສຶກສາ ແລະ ບໍ່ມີການສຶກສາ, ຄົນທີ່ອາໄສຢູ່ຕົວເມືອງ ແລະ ຊົນນະບົດ ຫລື ເຜົ່າຊົນຕ່າງໆ ໂດຍບໍ່ຈຳແນກເພດ, ໄວ ລວມທັງຄວາມພິການຂອງເດັກ.
ຄວາມຮຸນແຮງຕໍ່ເດັກ ເມື່ອເກີດຂຶ້ນແລ້ວໄດ້ສ້າງຄວາມສູນເສຍຢ່າງຫລວງຫລາຍຕໍ່ຊຸມຊົນ, ຊາດ ແລະ ສັງຄົມ. ນອກ ຈາກນັ້ນ ຍັງສົ່ງຜົນກະທົບຕໍ່ສຸຂະ ພາບ, ຜົນການຮຽນ, ສຸຂະພາບຈະເລີນພັນ, ຄວາມປອດໄພ, ການບັງຄັບໃຊ້ກົດໝາຍ, ຄວາມສະຫງົບສຸກໃນສັງຄົມ ແລະ ສິ້ນເປືອງງົບປະມານຂອງລັດ. ຖ້າສະພາບຂອງຄວາມຮຸນແຮງດັ່ງ ກ່າວບໍ່ໄດ້ຮັບການແກ້ໄຂ ກໍຈະສົ່ງຜົນກະທົບຕໍ່ສັງຄົມໃນແຕ່ລະໄລຍະ ລວມທັງຄວາມພະຍາ ຍາມໃນການຮັບປະກັນຄວາມສະຫງົບສຸກ ແລະ ຄວາມປອດໄພໃນສັງຄົມລາວ. ນອກຈາກນີ້ ຍັງຈະບໍ່ບັນລຸໄດ້ໃນວຽກຫລຸດ ຜ່ອນຄວາມທຸກຍາກ ແລະ ເປົ້າ ໝາຍສະຫັດສະວັດດ້ານການພັດ ທະນາໃນຊຸມປີຕໍ່ໜ້ານີ້.
ຜົນກະທົບຂອງຄວາມຮຸນແຮງຍັງຄົງຢູ່ກັບເດັກໄປຕະ ຫລອດຊີວິດ ແລະ ຈະສົ່ງຜ່ານຈາກຄົນຮຸ້ນໜຶ່ງໄປສູ່ຮຸ້ນໃໝ່. ການສຶກສາລະດັບໂລກສະແດງໃຫ້ເຫັນວ່າ: ເດັກທີ່ເຄີຍເປັນພະ ຍານ ຫລື ເປັນໂຈດຂອງຄວາມຮຸນແຮງ ແມ່ນມັກຈະກາຍເປັນຜູ້ເຄາະຮ້າຍຂອງຄວາມຮຸນແຮງ ຫລື ທຳຮ້າຍຕົວເອງ. ສະນັ້ນ, ພວກເຮົາຕ້ອງສຸມຄວາມພະຍາ ຍາມ ເພື່ອປ້ອງກັນ ແລະ ແກ້ໄຂຄວາມຮຸນແຮງຕໍ່ເດັກ ເພື່ອຮັບ ປະກັນສິດທິຂອງທຸກຄົນທີ່ດຳລົງຊີວິດຢູ່ໃນສັງຄົມຢ່າງ ປອດໄພ ແລະ ປາສະຈາກຄວາມຮຸນແຮງ ເຊິ່ງວຽກປ້ອງກັນຄວາມຮຸນແຮງຕໍ່ເດັກແມ່ນໜ້າທີ່ຂອງໝົດທຸກຄົນ.
ລັດຖະບານແຫ່ງ ສປປ ລາວ ໄດ້ເອົາໃຈໃສ່ໃນການແກ້ໄຂຄວາມຮຸນແຮງຕໍ່ເດັກໃນທຸກລະ ດັບ ເພື່ອຮັບປະກັນໃນການປົກປ້ອງເດັກຈາກຄວາມຮຸນແຮງ ເຊິ່ງສະແດງອອກໃນການເຂົ້າ ຮ່ວມກັບບັນດາປະເທດພາກພື້ນ ແລະ ສາກົນເຊັ່ນ: ສປປ ລາວ ໄດ້ໃຫ້ສັດຕະຍາບັນຕໍ່ສົນທິສັນຍາ ວ່າດ້ວຍສິດທິເດັກ ໃນປີ 1991, ຮັບຮອງເອົາຖະແຫລງການອາຊຽນກ່ຽວກັບການລຶບລ້າງຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກ ໃນປີ 2013 ແລະ ຖະແຫລງການນິວເດນລີ ໃນຂອບການຮ່ວມມືໃຕ້-ໃຕ້ ກ່ຽວກັບສິດທິຂອງເດັກ ໃນປີ 2013.
ປັດຈຸບັນ, ສປປ ລາວ ໄດ້ມີຄວາມຄືບໜ້າຫລາຍດ້ານ ເພື່ອແກ້ໄຂບັນຫາຄວາມຮຸນແຮງຕໍ່ເດັກໃນຊຸມປີຜ່ານມາ ເຊິ່ງລັດ ຖະບານກໍໄດ້ຮັບຮອງແຜນດຳເນີນງານແຫ່ງຊາດ ເພື່ອປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກ 2014-2020 ເພື່ອກ້າວໄປເຖິງການລຶບລ້າງຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກແບບຍືນຍົງຢູ່ໃນປະເທດເຮົາ. ແຜນດຳເນີນງານແຫ່ງຊາດໄດ້ກຳນົດຂອບການປະສານງານກັບທຸກຂະແໜງການ ເພື່ອປ້ອງກັນ ແລະ ແກ້ໄຂທຸກຮູບການຂອງຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກ.
ແຜນດຳເນີນງານແຫ່ງຊາດດັ່ງກ່າວແມ່ນໄດ້ຜັນຂະຫຍາຍແນວທາງນະໂຍບາຍຂອງລັດ ຖະບານໃນການປົກປ້ອງສິດ ແລະ ຜົນປະໂຫຍດຂອງແມ່ຍິງ ແລະ ເດັກ ໂດຍສະເພາະສິດໃນການດຳລົງຊີວິດຢູ່ໃນສັງຄົມທີ່ປະຕິບັດສິດສະເໝີພາບຍິງ-ຊາຍ ແລະ ປາສະຈາກຄວາມຮຸນແຮງ ແລະ ການຂູດຮີດ. ວິໄສທັດດັ່ງ ກ່າວແມ່ນໄດ້ກຳນົດແຈ້ງຢູ່ໃນນະໂຍບາຍຂອງພັກ, ລັດຖະ ທຳມະນູນ, ບັນດາກົດໝາຍ, ແຜນພັດທະນາເສດຖະກິດ-ສັງຄົມ ແລະ ແຜນງານອື່ນໆທີ່ກ່ຽວ ຂ້ອງຂອງ ສປປ ລາວ.
ໄປຄຽງຄູ່ກັບແຜນດຳເນີນງານແຫ່ງຊາດດັ່ງກ່າວ, ຂະແໜງການກ່ຽວຂ້ອງກໍພວມກະ ກຽມຮ່າງກົດໝາຍໃໝ່ກ່ຽວກັບຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກ ເຊິ່ງກົດ ໝາຍສະບັບນີ້ຈະຊ່ວຍໃນການກຳນົດຂອບນິຕິກຳ ເພື່ອປົກປ້ອງແມ່ຍິງ ແລະ ເດັກຈາກຄວາມຮຸນແຮງ ຄືກັນກັບບົດຮຽນຂອງບັນດາປະເທດພາກພື້ນ ແລະ ຮັບ ປະກັນການປະຕິບັດພັນທະຂອງ ສປປ ລາວ ທີ່ມີຕໍ່ສົນທິສັນຍາ ວ່າດ້ວຍສິດທິເດັກ ແລະ ສົນທິສັນ ຍາວ່າດ້ວຍການລຶບລ້າງທຸກຮູບແບບການຈຳແນກຕໍ່ແມ່ຍິງ.
ລັດຖະບານລາວພວມດຳເນີນການສຳຫລວດຄວາມຮຸນແຮງຕໍ່ເດັກໃນລະດັບຊາດ ເພື່ອເປັນຂໍ້ມູນກ່ຽວກັບຂະໜາດ ແລະ ຮູບແບບຂອງຄວາມຮຸນແຮງ. ຜົນຂອງການສຳຫລວດດັ່ງກ່າວຈະເປັນຂໍ້ມູນພື້ນຖານໃຫ້ລັດຖະບານ, ຄູ່ຮ່ວມພັດທະ ນາ, ອົງການຈັດຕັ້ງທີ່ບໍ່ສັງກັດລັດຖະບານເພື່ອພັດທະນາ, ປັບປຸງ ແລະ ສ້າງຍຸດທະສາດເພື່ອປ້ອງກັນ ແລະ ລຶບລ້າງຄວາມຮຸນແຮງຕໍ່ເດັກ.
ຍິ່ງໄປກວ່ານັ້ນ, ລັດຖະບານກໍໄດ້ມີຄວາມຄືບໜ້າໃນຫລາຍຂົງເຂດວຽກງານ ເພື່ອປ້ອງກັນ ແລະ ແກ້ໄຂຄວາມຮຸນແຮງຕໍ່ເດັກ ເປັນຕົ້ນການສ້າງຕາໜ່າງ ປົກປ້ອງເດັກຂັ້ນບ້ານ, ເປີດສາຍດ່ວນ ເພື່ອໃຫ້ຄຳປຶກສາຕໍ່ໄວໜຸ່ມ ໂດຍບໍ່ເສຍຄ່າ, ສ້າງຕັ້ງສານເດັກ, ສ້າງຕັ້ງສູນໃຫ້ຄຳປຶກສາ ແລະ ປົກປ້ອງແມ່ຍິງ-ເດັກນ້ອຍ, ອອກກົດໝາຍວ່າດ້ວຍການດຳເນີນຄະດີເດັກ, ເປີດຂະບວນແຂ່ງຂັນຮັກຊາດ ແລະ ພັດທະນາໃນການສ້າງຄອບຄົວ, ບ້ານ ແລະ ເມືອງພັດທະນາທີ່ປະຕິບັດສິດສະເໝີພາບຍິງ-ຊາຍທີ່ປາ ສະຈາກຄວາມຮຸນແຮງຕໍ່ແມ່ຍິງ ແລະ ເດັກນ້ອຍ, ປັບປຸງລະບົບສັງຄົມສົງເຄາະ ແລະ ລະບົບຍຸຕິທຳສຳລັບເດັກ ແລະ ຄອບ ຄົວ ແລະ ສ້າງນັກສັງຄົມສົງເຄາະໃຫ້ຫລາຍຂຶ້ນທັງປະລິມານ ແລະ ຄຸນນະພາບ.
ຕໍ່ຜົນສຳເລັດດັ່ງກ່າວ, ຕາງໜ້າໃຫ້ລັດຖະບານ ແຫ່ງ ສປປ ລາວ ຂ້າພະເຈົ້າ ຂໍສະແດງຄວາມຍ້ອງຍໍສັນລະເສີນມາຍັງຄະນະກຳມາທິການ ເພື່ອແມ່ ແລະ ເດັກແຫ່ງຊາດ ແຕ່ຂັ້ນສູນກາງລົງຮອດທ້ອງຖິ່ນ, ບັນດາຂະແໜງການ ແລະ ອຳນາດການປົກຄອງທ້ອງຖິ່ນ, ແນວລາວສ້າງຊາດ ແລະ ບັນດາອົງການຈັດຕັ້ງມະຫາຊົນ, ບັນ ດາການຈັດຕັ້ງ ແລະ ຫົວໜ່ວຍທຸລະກິດທັງພາກລັດ ແລະ ເອກະຊົນ ຕະຫລອດຮອພີ່ນ້ອງລາວບັນດາເຜົ່າທີ່ໄດ້ປະກອບສ່ວນຢ່າງຕັ້ງໜ້າໃນວຽກງານແມ່ ແລະ ເດັກ. ໃນໂອກາດທີ່ມີຄວາມໝາຍສຳຄັນນີ້, ຂ້າພະເຈົ້າ ຂໍສະແດງຄວາມຂອບໃຈມາຍັງບັນດາປະເທດເພື່ອນມິດ, ອົງ ການຈັດຕັ້ງສາ ກົນ ແລະ ສະຖາບັນການເງິນສາກົນ ຕະຫລອດຮອດອົງການຈັດຕັ້ງທີ່ບໍ່ສັງກັດລັດຖະບານທີ່ໄດ້ໃຫ້ການຊ່ວຍເຫລືອແກ່ ສປປ ລາວ ໃນວຽກງານດັ່ງກ່າວ ແລະ ຫວັງວ່າພວກທ່ານຈະສືບຕໍ່ໃຫ້ການສະ ໜັບສະໜູນພວກເຮົາໃນຕໍ່ໜ້າ. ພວກເຮົາຕ້ອງສືບຕໍ່ຮ່ວມມືກັນເອົາໃຈໃສ່ ແລະ ປັບປຸງວຽກງານປົກປ້ອງເດັກຕິດພັນກັບການປູດຈິດສຳນຶກໃນຄອບຄົວ, ຊຸມຊົນ ແລະ ທົ່ວສັງ ຄົມກ່ຽວກັບຜົນຮ້າຍຂອງການໃຊ້ຄວາມຮຸນແຮງຕໍ່ເດັກເພື່ອຮ່ວມກັນແກ້ໄຂຄວາມຮຸນແຮງ ແລະ ປົກປ້ອງເດັກ ໂດຍສະເພາະເດັກດ້ອຍໂອກາດ. ການຮ່ວມແຮງຮ່ວມໃຈກັນຂອງທຸກພາກສ່ວນ ເພື່ອລົງທຶນໃສ່ການພັດທະນາ ແລະ ການປົກປ້ອງເດັກຍິງ ແລະ ເດັກຊາຍໃນມື້ນີ້ ກໍຄືການສົ່ງເສີມຄວາມຕ້ອງການ ແລະ ພອນສະຫວັນຂອງເດັກທີ່ຈະຊ່ວຍສ້າງອະນາຄົດທີ່ສົດໃສຢູ່ ເຊິ່ງ ຈະນຳໄປສູ່ຜົນສຳເລັດໃນການລຶບລ້າງຄວາມຮຸນແຮງຕໍ່ເດັກຢູ່ ສປປ ລາວ.
ສຸດທ້າຍນີ້, ຂ້າພະເຈົ້າ ຕາງໜ້າໃຫ້ລັດຖະບານ, ອີກເທື່ອໜຶ່ງ ຂໍຮຽກຮ້ອງມາຍັງພີ່ນ້ອງຮ່ວມຊາດທຸກຖ້ວນໜ້າ ຈົ່ງພ້ອມກັນປະຕິບັດຄຳຂວັນຂອງປີນີ້ ລະດົມ ແລະ ລົງທຶນໃສ່ການພັດ ທະນາເດັກຮອບດ້ານຢ່າງມີປະ ສິດທິຜົນ, ຕັ້ງໜ້າປະຕິບັດໂຄງ ການ “ໄວໜຸ່ມລາວຫ່າງຢາເສບຕິດ” ເພື່ອພັດທະນາເດັກນອກໂມງຮຽນ ແລະ ສ້າງສັງຄົມ ແລະ ສິ່ງແວດລ້ອມທີ່ປາສະ ຈາກຄວາມຮຸນແຮງຕໍ່ເດັກ, ອວຍພອນໃຫ້ການສະເຫລີມສະຫລອງວັນເດັກສາກົນຈົ່ງປະສົບຜົນສຳເລັດຢ່າງຈົບງາມ.
ຂໍຂອບໃຈຂ່າວຂາກ http://laophatthananews.blogspot.com/