ວັນທີ 26 ພຶດສະພາ 2016 ກົມແຜນການ ແລະ ການຮ່ວມມືກະຊວງອຸດສາຫະກຳ ແລະ ການຄ້າໄດ້ຈັດກອງປະຊຸມໜ່ວຍງານຂະແໜງການຄ້າ ແລະ ເອກະຊົນ ຄັ້ງທີ 9 ຂຶ້ນ ທີ່ນະຄອນຫຼວງວຽງຈັນໂດຍການເປັນປະທານຂອງ ທ່ານ ນາງ ເຂັມມະນີ ພົນເສນາ ລັດຖະ ມົນຕີກະຊວງອຸດສາຫະກຳ ແລະ ການຄ້າ ແລະປະທານຮ່ວມມີທ່ານ Michael Grau ເອກອັກຄະລັດຖະທູດແຫ່ງສະຫະພັນເຢຍລະມັນປະຈຳລາວ ແລະ ທ່ານ Michel Goffin ອຸປະທູດແຫ່ງສຳນັກງານຜູ້ຕາງໜ້າສະພາເອີຣົບປະຈຳ ສປປ ລາວ, ພ້ອມນັ້ນ ຍັງມີພາກສ່ວນກ່ຽວຂ້ອງເຂົ້າຮ່ວມ.
ທ່ານ ນາງ ເຂັມມະນີ ພົນເສນາ ກ່າວວ່າ: ກອງປະຊຸມຄັ້ງນີ້ແມ່ນກອງປະຊຸມເພື່ອປຶກສາຫາລືກ່ຽວກັບສອງບັນຫາສຳຄັນທີ່ຕິດພັນກັບການສ້າງນະໂຍບາຍເພື່ອຊ່ວຍໃນການເພີ່ມຄວາມອາດສາມາດໃນການແຂ່ງຂັນຂອງຂະແໜງການທີ່ບໍ່ນຳໃຊ້ຊັບພະຍາກອນທຳມະຊາດ ໂດຍສະເພາະຕໍ່ກັບການກຳຈັດບັນດາສິ່ງກີດຂວາງທີ່ບໍ່ແມ່ນອັດຕາພາສີ ແລະ ການນຳໃຊ້ຂະແໜງການບໍລິການເພື່ອເປັນທ່າແຮງໃນການສົ່ງເສີມຄວາມຫຼາກຫຼາຍທາງດ້ານເສດຖະກິດແລ້ວຍັງເປັນເວທີໜຶ່ງເພື່ອເປີດໂອກາດໃຫ້ກັບພາກລັດ ແລະເອກະຊົນໄດ້ແລກປ່ຽນບາງບັນຫາ ຫຼື ນະໂຍບາຍທີ່ເຫັນວ່າຍັງບໍ່ສອດຄ່ອງກັນ.
ພ້ອມດຽວກັນນັ້ນບັນດາຜູ້ເຂົ້າຮ່ວມກອງປະຊຸມຍັງຈະໄດ້ຮັບຟັງໜາກຜົນ ແລະ ຂໍ້ສະເໜີແນະຈາກບົດວິໄຈຕ່ອງໂສ້ມູນຄ່າຂອງຜະລິດຕະພັນກະສິກຳໃນ 4 ຂະແໜງການເປັນຕົ້ນແມ່ນຢາງພາລາ, ສາລີ, ມັນຕົ້ນ ແລະ ງົວ-ຄວາຍທີ່ມີຄວາມສຳຄັນໃນການຊ່ວຍຫຼຸດຜ່ອນຄວາມທຸກຍາກໃນເຂດຊົນນະບົດຊຶ່ງເປັນບົດວິໄຈຫຼ້າສຸດຂອງທະນາຄານໂລກ ພາຍໃຕ້ການສະໜັບສະໜູນ ທຶນສົມທົບຂອງໂຄງການພັດທະນາ ການຄ້າໄລຍະສອງ (TDFII) ທີ່ທະນາຄານໂລກເປັນຜູ້ບໍລິຫານ ແລະ ຜົນໄດ້ຮັບຂອງການສຶກສາຄົ້ນຄວ້າຕ່ອງໂສ້ມູນຄ່າຂອງຜະລິດຕະພັນກະສິກຳປະເພດຢາງພາລາ, ສາລີ, ມັນຕົ້ນ ແລະ ງົວ-ຄວາຍ ໃນ ສປປ ລາວ.
ໃນຂໍ້ມູນຍັງໃຫ້ຮູ້ອີກວ່າ: ສຳລັບການຄົ້ນຄວ້າສຶກສາຂອງ 4 ຂະແໜງການຍ່ອຍປະເພດຢາງພາລາ, ສາລີ, ມັນຕົ້ນ ແລະງົວ-ຄວາຍແມ່ນໄດ້ເລີ່ມການຄົ້ນຄວ້າມາແຕ່ເດືອນສິງຫາ ປີ 2015 ພາຍໃຕ້ການສະໜັບສະໜູນຈາກໂຄງ ການເຊື່ອມໂຍງເຂົ້າສາກົນດ້ານການ ຄ້າ EIF ທີ່ມີຈຸດປະສົງສຶກສາໃນ 4 ຂະແໜງການຍ່ອຍດັ່ງກ່າວ ເພື່ອຊ່ວຍໃນ ການຊອກຫາຊ່ອງທາງວ່າລັດຖະບານ ຈະສາມາດໃຫ້ການສະໜັບສະໜູນແກ່ ຊາວນາ ແລະປະຊາຊົນຜູ້ທີ່ທຸກຍາກໃນ 6 ແຂວງ ລວມມີຫຼວງນ້ຳທາ, ອຸດົມໄຊ, ໄຊຍະບູລີ, ຫົວພັນ, ຊຽງຂວາງ, ວຽງຈັນ ແລະນະຄອນຫຼວງວຽງຈັນໃນການສົ່ງເສີມການຜະລິດ ແລະເພີ່ມລາຍຮັບ ແກ່ຄອບຄົວເຂົາເຈົ້າໄດ້ແນວໃດ ຊຶ່ງການສຶກສາໃນແຕ່ລະແຂວງກໍໄດ້ມີການກຳນົດຈຳນວນຄອບຄົວ ແລະເຂດບ້ານສະເພາະທີ່ມີຄວາມທຸກຍາກ ແລະກຳ ລັງເຮັດກະສິກຳກ່ຽວກັບ 4 ຂະແໜງຜະລິດຕະພັນນີ້ເທົ່ານັ້ນ.
ທີ່ມາ: 