ການຖາງປ່າເຮັດໄຮ່ປູກເຂົ້າແບບເລື່ອນລອຍແມ່ນວິທີການຜະລິດເຂົ້າອີກວິທີໜຶ່ງຂອງປະຊາຊົນບັນດາເຜົ່າທີ່ຕ້ອງທຳລາຍປ່າໄມ້ໃນແຕ່ລະປີຈຳນວນບໍ່ໜ້ອຍຊຶ່ງໄດ້ດຳເນີນຕໍ່ກັນມາແຕ່ດົນນານປະຈຸບັນພັກ-ລັດ ກໍຄືອົງການປົກຄອງແຂວງບໍລິຄຳໄຊໄດ້ຊອກທຸກວິທີທາງເພື່ອສະກັດກັ້ນການຖາງປ່າເຮັດໄຮ່ ເພື່ອປົກປັກຮັກສາປ່າໄມ້ແລະສະພາບແວດລ້ອມໃຫ້ມີຄວາມຍືນຍົງ.
ທ່ານ ຄຳຜີວ ພິມມະທັດ ຫົວໜ້າພະແນກກະສິກຳ ແລະປ່າໄມ້ ແຂວງບໍລິຄຳໄຊໄດ້ລາຍງານກ່ຽວກັບການແກ້ໄຂຢຸດຕິການຖາງປ່າເຮັດໄຮ່ໃນໄລຍະຜ່ານມາ ແລະມາດຕະການເພື່ອແກ້ໄຂໃນຕໍ່ໜ້າຕໍ່ກອງປະຊຸມເປີດກວ້າງຄົບຄະນະບໍລິຫານງານພັກແຂວງບໍລິຄຳໄຊ ຄັ້ງທີ 4 ສະໄໝທີ VI ຈັດຂຶ້ນວັນທີ 10-12 ພຶດສະພາ 2016 ນີ້ວ່າ: ແຜນການຈັດຕັ້ງປະຕິບັດເພື່ອແກ້ໄຂສະກັດກັ້ນການຖາງປ່າເຮັດໄຮ່ແບບເລື່ອນລອຍໃຫ້ຫຼຸດໜ້ອຍຖອຍລົງໃນສົກປີ 2015-2016 ລວມມີ 5 ມາດຕະການແກ້ໄຂຄື: 1 ຕ້ອງ ສືບຕໍ່ຍົກສະມັດຖະພາບການຜະລິດໃຫ້ສູງຂຶ້ນເພື່ອຕອບສະໜອງເຂົ້າກິນໃຫ້ພຽງພໍ, 2 ສືບຕໍ່ສຳຫຼວດເນື້ອທີ່ບ່ອນທີ່ມີເງື່ອນໄຂການປູກເຂົ້າ, ພືດ ແລະລ້ຽງສັດ,3 ດຳເນີນການສຶກສາອົບຮົມໃຫ້ ປະຊາຊົນບັນດາເຜົ່າເຂົ້າໃຈແຈ້ງຕໍ່ແນວທາງ, ແຜນນະໂຍບາຍຂອງພັກ-ລັດວາງອອກໃນແຕ່ລະໄລຍະ, 4 ດຳເນີນການກວດກາ ຫ້າງຮ້ານທີ່ຂາຍອຸປະກອນຕັດ ໄມ້(ຈັກຕັດໄມ້) ແລະ 5 ນຳເອົາບັນດາກົດໝາຍທີ່ກ່ຽວຂ້ອງລົງເຜີຍແຜ່ໃຫ້ບັນດາເປົ້າໝາຍ ແລະນຳໃຊ້ມາດຕະການຢ່າງເຂັ້ມງວດ ສະນັ້ນຕ້ອງໄດ້ເອົາ ໃຈໃສ່ແກ້ໄຂ ແລະການຈັດສັນອາຊີບໃຫ້ ປະຊາຊົນທີ່ຢູ່ຫ່າງໄກສອກຫຼີກທີ່ບໍ່ມີອາຊີບໝັ້ນຄົງຖາວອນໄດ້ເຂົ້າໃຈນຳໄປປະຕິບັດເພື່ອເຮັດໃຫ້ວຽກງານສະກັດກັ້ນການຖາງປ່າຊະຊາຍ ແລະຖາງປ່າເຮັດໄຮ່ໃຫ້ຫຼຸດລົງ ແລະໝົດໄປ.
ນັບແຕ່ປີ 2010-2015 ຢູ່ແຂວງ ບໍລິຄຳໄຊ ເຫັນວ່າມີການຖາງປ່າເຮັດໄຮ່ປູກເຂົ້າຫຼຸດຜ່ອນລົງພໍສົມຄວນຊຶ່ງປີ 2010 ມີເນື້ອທີ່ຖາງປ່າເຮັດໄຮ່ 5.155 ເຮັກຕາ,ປີ 2011 ມີ 2.884,57 ເຮັກຕາ, ປີ 2012 ມີ 3.387,94 ເຮັກຕາ, ປີ 2013 ມີ 3.858,85 ເຮັກຕາ, ປີ 2014 ມີ 3.192 ເຮັກຕາ, ປີ 2015 ມີ 2.443,50 ເຮັກຕາ.ມີ ເນື້ອທີ່ຖາງໄຮ່ແບບເລື່ອນລອຍ ປີ 2010 ມີ 370,73 ເຮັກຕາ, 2011 ມີ 85,64 ເຮັກຕາ, ປີ 2012 ມີ 266,27 ເຮັກຕາ, ປີ 2013-2015 ມີ 592,9 ເຮັກຕາ.
ເຖິງຢ່າງໃດກໍຕາມໃນຕໍ່ໜ້າທາງພັກ-ລັດກໍຄືອຳນາດການປົກຄອງແຂວງບໍລິຄຳໄຊຕະຫຼອດຮອດພະແນກການທີ່ກ່ຽວຂ້ອງຂັ້ນຕ່າງຍັງຈະໄດ້ສືບຕໍ່ ແລະ ສະກັດກັ້ນຕາມມາດຕະການວາງໄວ້ເພື່ອເຮັດໃຫ້ການຈັດຕັ້ງປະຕິບັດໃນວຽກງານດັ່ງກ່າວໃຫ້ໄດ້ຮັບປະສິດທິຜົນສູງ ແລະ ສອດຄ່ອງກັບວິໄສທັດແຕ່ນີ້ຫາປີ 2030 ວ່າ: ສ້າງແຂວງບໍລິຄຳໄຊ ເປັນປະຕູເສດຖະກິດ-ແຫຼ່ງພະລັງງານບໍລິການທາງຜ່ານ ແລະຄຸ້ມຄອງສີ່ງແວດລ້ອມແບບຍືນຍົງ.
ທີ່ມາ: 