ຫຼັງຈາກທີ່ເຮົາໄດ້ສະເໜີຂ່າວໄປແລ້ວເມື່ອ 3 ມື້ກ່ອນວ່າມີຂ່າວລືຈາກປະເທດຈີນລະບຸວ່າ Microsoft ກຽມທີ່ຈະຖິ້ມຕະຫຼາດຟີເຈີໂຟນ ແລະຂາຍຊື່ Nokia ໃຫ້ກັບ Foxconn ແລະມື້ນີ້ຂ່າວລືດັ່ງກ່າວກໍເປັນຄວາມຈິງແລ້ວ, ເມື່ອ Microsoft ປະກາດອອກມາຢ່າງເປັນທາງການວ່າໄດ້ເຮັດຂໍ້ຕົກລົງເລື່ອງການຊື້ຂາຍທຸລະກິດຟີເຈີໂຟນ ກັບ Foxconn ໃນມູນຄ່າ 350 ລ້ານໂດລາສະຫະລັດ!!

ສຳລັບສ່ວນໜຶ່ງຂອງການຕົກລົງຊື້ຂາຍຄື: Foxconn ຈະໄດ້ຮັບສິດຢ່າງຖືກຕ້ອງໃນການໃຊ້ຊື່ Nokia ໃນການເຮັດຕະຫຼາດສຳລັບຟີເຈີໂຟນ, ບໍລິສັດຍັງສາມາດຄວບຄຸມເລື່ອງຊ໋ອບແວຣ໌ ແລະ ບໍລິການຂອງໂນເກຍຟີເຈີໂຟນ, ລວມເຖິງຂໍ້ຕົກລົງສັນຍາທີ່ສຳຄັນ ແລະ ສັນຍາອະນຸຍາດຂອງລູກຄ້າ.

ນອກຈາກນນີ້ແລ້ວ Foxconn ຍັງຈະສາມາດໃຊ້ໂຮງງານຜະລິດຂອງ Microsoft ທີ່ຮາໂນຍ ປະເທດຫວຽດນາມອີກນຳ. ລວມໄປເຖິງພະນັກງານ 4,500 ຄົນຈາກທີ່ຖືກປົດອອກຍັງມີໂອກາດທີ່ຈະໄດ້ເຂົ້າຮ່ວມເຮັດວຽກກັບບໍລິສັດ Foxconn ຫຼື ບໍລິສັດລູກ. ໂດຍ Microsoft ຍັງກ່າວອີກວ່າການຊື້ຂາຍນີ້ຈະສຳເລັດໃນໃນຊ່ວງເຄິ່ງຫຼັງຂອງປີນີ້.

ໃນຂະນະທິ່ສະມາດໂຟນຈາກ Microsoft ທິ່ໃຊ້ລະບົບ Windows 10 Mobile ນັ້ນກໍຍັງຈະມີການພັດທະນາຕໍ່ໆໄປ ເຊັ່ນ: Lumia 950, 950 XL ແລະ 650, ແນ່ນອນວ່າບໍລິສັດອື່ນທີ່ເປັນສ່ວນຮ່ວມກໍຍັງຄົງໃຫ້ການສະໜັບສະໜູນອີກຕໍ່ໄປ ເປັນຕົ້ນແມ່ນ Acer, HP, Alcatel, VAIO ຫຼື Trinity

ປິດທ້າຍດ້ວຍການກັບມາອິກຄັ້ງຂອງຕຳນານຍັກໃຫຍ່ໃນວົງການໂທລະສັບມືຖຶນັ້ນກໍຄື Nokia ເຊິ່ງຈະເຂົ້າມາມີສ່ວນຮ່ວມໃນຕະຫຼາດສະມາດໂຟນ ແລະແທັບເລັດອີກຄັ້ງໃນໄວໆນີ້ ໂດຍຈະໃຊ້ລະບົບປະຕິບັດການ Android ເປັນຫຼັກໃນການບຸກຕະຫຼາດ.

ທີ່ມາ:phonearena