ກອງປະຊຸມລັດຖະມົນຕີແຮງງານອາຊຽນ ຄັ້ງທີ 24 ແລະ ລັດຖະມົນຕີອາຊຽນບວກ 3 ຄັ້ງທີ 9 ໄດ້ໄຂຂຶ້ນຢ່າງເປັນທາງການໃນວັນທີ 15 ພຶດສະພາ 2016 ທີ່ໂຮງແຮມດອນຈັນພາເລັດ ນະຄອນຫຼວງວຽງຈັນ ໃຫ້ກຽດເຂົ້າຮ່ວມຂອງ ທ່ານ ດຣ. ສອນໄຊ ສີພັນດອນ ຮອງນາຍົກລັດຖະມົນຕີແຫ່ງ ສປປ ລາວ, ພ້ອມດ້ວຍບັນດາລັດຖະມົນຕີແຮງງານອາຊຽນ ແລະ ອາຊຽນບວກ 3, ທ່ານທູດ, ຕານຸທູດ ແລະບັນດາຜູ້ແທນກອງປະຊຸມຈາກປະເທດສະມາຊິກອາຊຽນເຂົ້າຮ່ວມ.
ທ່ານ ດຣ. ສອນໄຊ ສີພັນດອນ ໄດ້ກ່າວວ່າ: ການສ້າງປະຊາຄົມເສດຖະກິດອາຊຽນແມ່ນຈຸດປະສົງ ແລະມີເປົ້າໝາຍ ເພື່ອລວມຕົວກັນເພີ່ມຄວາມສາມາດແຂ່ງຂັນຂອງອາຊຽນສູ່ເວທີສາກົນໃນ ທຸກດ້ານ ລວມເຖິງຄວາມສາມາດໃນການຮັບມືກັບບັນຫາໃໝ່ທີ່ເກີດຂຶ້ນລະດັບພາກພື້ນ ແລະສາກົນ, ພ້ອມກັນນັ້ນປະຊາຄົມເສດຖະກິດອາຊຽນໄດ້ພະຍາຍາມສ້າງຄວາມເຂັ້ມແຂງ ແລະຊ່ວຍເຫຼືອ ເຊິ່ງກັນ ແລະກັນ, ໃຫ້ບັນດາປະເທດສະມາຊິກອາຊຽນມີສະພາບຊີວິດການເປັນຢູ່ທີ່ດີ ແລະມີຄວາມປອດໄພຫຼາຍຂຶ້ນ, ປະຊາຄົມເສດຖະກິດອາຊຽນແມ່ນຕິດພັນກັນຢ່າງສະໜິດແໜ້ນກັບຜົນປະໂຫຍດລວມຂອງແຕ່ລະປະເທດນັບມື້ນັບກວ້າງອອກ ເພື່ອກ້າວໄປສູ່ການເປັນຕະຫຼາດ ແລະຖານການຜະລິດໜຶ່ງດຽວທີ່ມີການໄຫຼວຽນຢ່າງເສລີຂອງສິນຄ້າ, ການບໍລິການ, ການລົງທຶນ, ການໄຫຼວຽນຢ່າງເສລີຂອງທຶນ, ແຮງງານທີ່ມີສີມື ແລະການເປັນພາກພື້ນທີ່ມີການແຂ່ງຂັນສູງທາງດ້ານເສດຖະກິດ.
ພ້ອມກັນນັ້ນ ກອງປະຊຸມໃນເທື່ອນີ້ຈະເປັນເວທີໃຫ້ແກ່ການທົບທວນຄວາມຄືບໜ້າໃນການຈັດຕັ້ງປະຕິບັດແຜນງານ ຂອງລັດຖະມົນຕີແຮງງານອາຊຽນ, ກອງປະຊຸມເຈົ້າໜ້າທີ່ອາວຸໂສແຮງງານອາຊຽນ ແລະບັນດາໂຄງການຮ່ວມມືລະຫວ່າງປະເທດສະມາຊິກອາຊຽນ ແລະອາຊຽນບວກ 3, ພ້ອມນັ້ນກອງປະຊຸມຈະໄດ້ພ້ອມກັນປຶກສາຫາລື ແລະຮັບ ຮອງເອົາບັນດາເນື້ອໃນສຳຄັນທີ່ຕິດພັນ ກັບຫົວຂໍ້ທີ່ກອງປະຊຸມໄດ້ຕັ້ງຂຶ້ນ ໂດຍ ສະເພາະຮ່າງຖະແຫຼງການວຽງຈັນ ວ່າດ້ວຍ “ການຫັນປ່ຽນຈາກການຈ້າງງານນອກລະບົບໄປສູ່ການຈ້າງງານໃນລະບົບ ເພື່ອກ້າວໄປການສົ່ງເສີມວຽກທີ່ມີຄຸນຄ່າ ແລະເປັນທຳ” ທີ່ຈະເປັນການປະກອບສ່ວນສຳຄັນເຂົ້າໃນການຈັດຕັ້ງຜັນຂະຫຍາຍວິໄສທັດປະຊາຄົມອາຊຽນ ຮອດປີ 2025 ແລະເປົ້າໝາຍການພັດທະນາແບບຍືນຍົງຫຼັງປີ 2015 ຂອງອົງ ການສະຫະປະຊາຊາດກ່ຽວກັບການ ເຕີບໂຕເສດຖະກິດທຸກດ້ານທີ່ຍືນຍົງ ແລະການຈ້າງງານ, ຜະລິດຕະພາບ ແຮງງານຢ່າງເຕັມສ່ວນ ແລະການເຮັດ ວຽກທີ່ມີຄຸນຄ່າ ແລະເປັນທຳສຳລັບທຸກ ຄົນໃຫ້ເປັນຮູບປະທຳເທື່ອລະກ້າວແນໃສ່ ສົ່ງເສີມການຮຽນຮູ້ຕະຫຼອດຊີວິດ ແລະ ການພັດທະນາທັກສະພ້ອມທັງສະໜັບສະໜູນຂະແໜງການພາກລັດ-ເອກະຊົນ ແລະຊຸມຊົນພັດທະນາລະບົບການຝຶກອົບຮົມຢ່າງຕໍ່ເນື່ອງ ແລະການຝຶກອົບຮົມຄືນຂອງຜູ້ອອກແຮງງານໃນທຸກລະດັບ.
ນອກນັ້ນການຫັນປ່ຽນການຈ້າງງານນອກລະບົບໄປສຸ່ການຈ້າງງານໃນລະບົບ ເພື່ອກ້າວໄປການສົ່ງເສີມວຽກທີ່ມີຄຸນຄ່າ ແລະເປັນທຳຈະເປັນສ່ວນໜຶ່ງທີ່ສຳຄັນໃນການສ້າງໂອກາດໃຫ້ແກ່ການຈ້າງງານໃນລະບົບຫຼາຍຂຶ້ນ, ທັງເປັນການແກ້ໄຂຄວາມບໍ່ດຸນດ່ຽງໃນການພັດທະນາລະຫວ່າງຕົວເມືອງ ແລະ ຊົນນະບົດ, ທັງເປັນການເສີມຂະຫຍາຍທ່າແຮງຂອງຜູ້ປະກອບການ, ແນວຄວາມຄິດປະດິດສ້າງ, ຄວາມຫຼາກຫຼາຍ, ສີມືແຮງງານ ແລະຄວາມອາດສາມາດໃໝ່ຂອງຜູ້ອອກແຮງງານ ແລະ ຫົວໜ່ວຍເສດຖະກິດໃນລະບົບ ເພື່ອສ້າງຊ່ອງທາງໃນການພັດທະນາເສດຖະກິດທີ່ມີຫຼາຍຮູບແບບ ເພື່ອສືບຕໍ່ປະກອບສ່ວນເຂົ້າໃນການແກ້ໄຂຄວາມທຸກຍາກຂອງບັນດາປະເທດສະມາຊິກອາຊຽນໃຫ້ຫຼຸດລົງເທື່ອລະກ້າວ.
ທີ່ມາ: 