ມໍລະດົກວັດທະນະທຳ ດ້ານສະຖາປັດຕະຍະກຳ ຂອງວັດວາອາຮາມອັນເກົ່າແກ່ຫລາຍແຫ່ງ ທີ່ມີເອກະລັກສະເພາະ ແລະ ມີຄຸນຄ່າທາງປະຫວັດສາດ ກຳລັງຖືກທຳລາຍຈາກຄວາມຫວັງດີ ຂອງປະຊາຊົນໃນທ້ອງຖິ່ນ ດ້ວຍການບູລະນະ ແລະ ປະຕິສັງຂອນ ແບບບໍ່ມີການຄຸ້ມຄອງຈາກອົງການຈັດຕັ້ງທີ່ກ່ຽວຂ້ອງ ຊຶ່ງຜົນໄດ້ຮັບແມ່ນການທຳລາຍ ຄຸນລັກສະນະເດີມຂອງມໍລະດົກ ທີ່ຄວນແກ່ການອະນຸລັກ ໂດຍທີ່ບໍ່ຮູ້ສຶກຕົວ, ຫລ້າສຸດ ໄດ້ມີສຽງຮຽກຮ້ອງ ຈາກນັກປະຫວັດສາດຕ່າງແດນ ມາຍັງພາກລັດຂອງລາວ ໃຫ້ຊ່ວຍເຂົ້າໄປຄຸ້ມຄອງພະທາດອຸງໄຫ ຫລື ພະທາດອົງໄຫ ຢູ່ເມືອງຍອດອູ ແຂວງຜົ້ງສາລີ ຢ່າງຮີບດ່ວນ ກ່ອນທີ່ຈະມີການບູລະນະໂດຍປະຊາຊົນໃນທ້ອງຖິ່ນ ດ້ວຍຄວາມເປັນຫ່ວງ ຢ້ານສູນເສຍເອກະລັກເດີມ ທີ່ມີຄຸນຄ່າຫາອັນປຽບບໍ່ໄດ້.
ທ່ານ ກາຍ ອິນທະຣະໂສພາ ນັກປະຫວັດສາດຊາວໄທເຊື້ອສາຍລາວ ຜູ້ທີ່ໄດ້ກິ້ງເກືອກລີເລືອ, ສຶກສາຄົ້ນຄ້ວາ ປະຫວັດສາດ ແລະ ສີລະປະວັດທະນະທຳຂອງຊົນຊາດລາວ ຊຶ່ງໄດ້ເດີນທາງເຂົ້າມາສຶກສາຄົ້ນຄ້ວາ ກ່ຽວກັບຮ່ອງຮອຍປະຫວັດສາດ ແລະ ວິຖີຊີວິດ, ວັດທະນະທຳຂອງປະຊາຊົນລາວບັນດາເຜົ່າ ຢູ່ຫລາຍແຂວງ ໄດ້ສະແດງຄວາມເປັນຫ່ວງຂອງຕົນ ດ້ວຍການຂຽນໂພສຕ໌ລົງທາງເຟສບຸກສ່ວນຕົວ Kay Intarasopa ເມື່ອວັນທີ 15 ພຶດສະພາ 2016 ຜ່ານມານີ້ ຮຽກຮ້ອງມາຍັງເຈົ້າເມືອງຍອດອູ, ເຈົ້າແຂວງຜົ້ງສາລີ, ລັດຖະມົນຕີ (ກະຊວງຖະແຫລງຂ່າວ, ວັດທະນະທຳ ແລະ ການທ່ອງທ່ຽວ) ຕະຫລອດຮອດເຈົ້າໜ້າທີ່ ທີ່ກ່ຽວຂ້ອງຂອງລາວ ໃຫ້ເຂົ້າໄປຄຸ້ມຄອງ ແລະ ອະນຸລັກຮັກສາ ເຂດບູຮານສະຖານພະທາດອົງໄຫ ຫລື ວັດອົງໄຫ ທີ່ຕັ້ງຢູ່ເມືອງຍອດອູ ແຂວງຜົ້ງສາລີ ຢ່າງຮີບດ່ວນ, ເນື່ອງຈາກພະທາດອົງນີ້ ເປັນພະທາດທີ່ສຳຄັນຂອງເມືອງ ແລະ ເປັນທີ່ສັກກາລະບູຊາ ຂອງປະຊາຊົນເຜົ່າລື້ ພາຍໃນທ້ອງຖິ່ນດັ່ງກ່າວ, ອົງພະທາດ ມີຮູບແບບດ້ານສີລະປະອັນງົດງາມ ທີ່ມີເອກະລັກສະເພາະບໍ່ຄືແຫ່ງອື່ນໆ ສ້າງຂຶ້ນຢູ່ເທິງຍອດພູສູງ, ພ້ອມກັນນັ້ນ ພາຍໃນວັດດັ່ງກ່າວ ຍັງມີບໍ່ນ້ຳສັກສິດທີ່ປະຊາຊົນເຄົາລົບບູຊາ ໄຫລລິນຢູ່ຕະຫລອດປີອີກດ້ວຍ.
ທັງນີ້ ເນື່ອງຈາກນັກປະຫວັດສາດທ່ານດັ່ງກ່າວ ໄດ້ຮັບຂ່າວມາວ່າ ເຈົ້າອາວາດວັດຫລວງ ແລະ ປະຊາຊົນໃນທ້ອງຖິ່ນ ກຳລັງມີແຜນການທີ່ຈະບູລະນະພະທາດແຫ່ງນີ້ ພາຍຫລັງທີ່ພວກເພິ່ນ ໄດ້ທຳການບູລະນະສິມວັດຫລວງ ດ້ວຍການຮື້ຖອນ ສະຖາປັດຕະຍະກຳສີລະປະລື້ບູຮານ ອາຍຸຫລາຍຮ້ອຍປີ ເມື່ອເດືອນເມສາ ປີ 2015 ຜ່ານມາ ແລ້ວສ້າງສິມໃໝ່ຂຶ້ນໃສ່ແທນ ຊຶ່ງເປັນສິ່ງທີ່ໜ້າເສຍດາຍຫລາຍ ທີ່ມໍລະດົກທາງດ້ານວັດທະນະທຳ ອັນເປັນເອກະລັກຂອງທ້ອງຖິ່ນ ຖືກທຳລາຍລົງ ດ້ວຍຄວາມຮູ້ເທົ່າບໍ່ເຖິງການ ຊຶ່ງເກີດຈາກຄວາມຫວັງດີຂອງຄົນໃນທ້ອງຖິ່ນ ທີ່ຕ້ອງການບູລະນະ ແຕ່ຂາດການຄຸ້ມຄອງຮັກສາ ໂດຍຜູ້ຊ່ຽວຊານສະເພາະດ້ານ.
” ຂ້າພະເຈົ້າ ບໍ່ຮຽກການກະທຳອັນເກີດຈາກຄວາມຫວັງດີນັ້ນວ່າ ການບູລະນະປະຕິສັງຂອນ ເພາະການບູລະນະ ຄືການສ້ອມແຊມຂອງເດີມໃຫ້ສະພາບດີ, ແຕ່ກໍລະນີວັດຫລວງ ຄືການຮື້ຂອງເດີມຖິ້ມ ແລະ ສ້າງຂອງໃໝ່ຂຶ້ນ ” ທ່ານ ກາຍ ລະບຸໃນເຟສບຸກຂອງຕົນ.
ແນວໃດກໍຕາມ, ເພື່ອປ້ອງກັນບໍ່ໃຫ້ເກີດການທຳລາຍເພີ່ມຂຶ້ນ ແລະ ເພື່ອປົກປັກຮັກສາມໍລະດົກແຫ່ງຊາດນັ້ນ, ເວົ້າສະເພາະແມ່ນ ວັດອົງໄຫ ທີ່ກຳລັງຕົກຢູ່ໃນສະພາວະສ່ຽງໃນປັດຈຸບັນ ແມ່ນມີຄວາມຈຳເປັນຢ່າງຮີບດ່ວນ ທີ່ອົງການຈັດຕັ້ງພາກລັດທີ່ກ່ຽວຂ້ອງ ໂດຍສະເພາະແມ່ນ ຂະແໜງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ຢູ່ຂັ້ນສູນກາງ ກໍຄືຢູ່ແຂວງຜົ້ງສາລີ ແລະ ເມືອງຍອດອູ ຈະຕ້ອງໄດ້ເອົາໃຈໃສ່ ເຂົ້າໄປດຳເນີນການຄຸ້ມຄອງ ເພື່ອເຮັດໃຫ້ການບູລະນະ ແລະ ປະຕິສັງຂອນ ທີ່ກຳລັງຈະເກີດຂຶ້ນໃນອານາຄົດ ເປັນໄປຢ່າງຖືກຕ້ອງ ຕາມກົດໝາຍວ່າດ້ວຍມໍລະດົກແຫ່ງຊາດ ຢ່າງເຂັ້ມງວດ.
ຟັງປະຫວັດຫຍໍ້ ພະທາດອົງໄຫ ທີ່ຂຽນຈາລຶກເປັນພາສາລື້ (ວີດີໂອຈາກ ເຟສບຸກ Kay Intarasopa)
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!