ຂປລ. ຕະຫລາດຫລັກຊັບລາວ (ຕລຊລ) ຮ່ວມກັບຄະນະເສດຖະສາດ-ບໍລິຫານທຸລະກິດ ມະຫາວິທະຍາໄລແຫ່ງຊາດ ແລະ ບໍລິສັດ ເອພີເອັມ-ລາວ ເປີດອົບຮົມຫລັກສູດ “ແຜນລາຍການ ຝຶກອົບຮົມ-ການທະນາຄານ ເພື່ອການລົງທຶນຢ່າງມືອາຊີບລາວ” ຊຸດທີ 4 ໃນວັນທີ 7 ພຶດສະພາ 2016 ທີ່ຕະຫລາດຫລັກຊັບລາວ ໃຫ້ບຸກຄົນທີ່ຕ້ອງການ ໃບຢັ້ງຢືນວິຊາຊີບທຸລະກິດຫລັກຊັບ, ທັງນີ້ກໍ ເປັນການສ້າງບຸກຄະລາກອນມືອາຊີບຂອງ ຕະຫລາດຫລັກຊັບລາວ ໃນຍຸກເຊື່ອມໂຍງສາກົນ ແລະ ຍຸກ AEC ເຊິ່ງ ຊຸດອົບຮົມຄັ້ງນີ້ ຈະໃຊ້ເວລາ 8 ອາທິດ ຈຶ່ງຈະສຳເລັດ.
ທ່ານ ວັນຄໍາ ວໍຣະວົງ ຜູ້ອໍານວຍການໃຫຍ່ ຕລຊລ ກ່າວວ່າ: ຕະຫລາດຫລັກຊັບ ເປັນວຽກໃໝ່ ທີ່ຫລາຍຄົນ ຕ້ອງມີຄວາມຮູ້-ຄວາມເຂົ້າໃຈໃນວຽກງານດັ່ງກ່າວ, ເຊິ່ງຜູ້ເຂົ້າຮ່ວມຝຶກອົບຮົມ ຈະໄດ້ຮັບຟັງການນໍາສະເໜີ ກ່ຽວກັບພາບລວມການພັດທະນາຕະຫລາດທຶນລາວ, ຄວາມສໍາຄັນຂອງວຽກງານກວດສອບພາຍນອກ, ກົດໝາຍວ່າດ້ວຍຫລັກຊັບ ແລະ ລະບຽບການຕ່າງໆ ທີ່ກ່ຽວຂ້ອງກັບວຽກງານຫລັກຊັບ ລວມໄປເຖິງການນໍາສະເໜີ ພາບລວມຂອງການພັດທະນາ ຕະຫລາດທຶນຂອງປະເທດໄທ ແລະ ຜົນປະໂຫຍດຂອງ ການຈົດທະບຽນໃນຕະຫລາດຫລັກຊັບ ນັບແຕ່ປີ 2014 ເປັນຕົ້ນມາ 3 ພາກສ່ວນດັ່ງກ່າວ ໄດ້ດໍາເນີນ ການຈັດຕັ້ງເປີດຮຽນ ແລະ ສອນຫລັກສູດແຜນລາຍການ ຝຶກອົບຮົມ-ການທະນາຄານ ເພື່ອການລົງທຶນ ຢ່າງມືອາຊີບລາວ ສໍາລັບບຸກຄົນທົ່ວໄປ ທີ່ຕ້ອງການໃບຢັ້ງຢືນ ວິຊາຊີບທຸລະກິດຫລັກຊັບ ເພື່ອນໍາໄປປະກອບ ວິຊາຊີບທາງດ້ານ ນາຍໜ້າຄ້າຂາຍຫລັກຊັບ ມາໄດ້ 3 ຊຸດ ໂດຍມີຜູ້ເຂົ້າຝຶກອົບຮົມ ທັງໝົດ 179 ຄົນ ໃນນີ້ສາມາດ ສອບຜ່ານຫລັກສູດ ໄດ້ພຽງແຕ່ 64 ຄົນ ແລະ ມາເຖິງມື້ນີ້ ໄດ້ມີການຝຶກອົບຮົມ ໃນຫຼັກສູດດັ່ງກ່າວ ເປັນເທື່ອທີ 4.
ແຫລ່ງຂ່າວ:
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!